1 Veigauna 21 - Vakavakadewa Vou kei na iVola tale eso

Wili Lewe ni Vanua o Tevita

¹ A vinakata o Setani me vakatubu leqa vei ira na Isireli, ka vakauqeti Tevita kina me tauca na lewa me vakayacori na wili lewenivanua.

² A vakaroti Joape kei ira na turaganivalu o Tevita, ka kaya, “Dou lako yani ki na vanua taucoko o Isireli, me tekivu mai na dua na muana me yaco ki yasana kadua, ka wiliki ira na lewe ni vanua. Au vinakata me'u kila na kedra i wiliwili taucoko.”

³ A sa kaya o Joape, “Me qai vakayadrautaka tale o Jiova na kedra i wiliwili na Isireli sa tiko rawa edaidai! Kemuni na noqu turaga na tui, era sa nomuni tamata vakaidina o ira oqo. A cava li o ni vinakata kina me vakayacori na ka oqo ka vakavuna me ra sa cala kina na matanitu taucoko o Isireli?”

⁴ Ia a sa vakaroti Joape na tui me muria ga na nona lewa. Sa qai lako yani o Joape vei ira kece na Isireli, ka lesu tale yani ki Jerusalemi.

⁵ A la'ki tukuna o koya vei Tevita na tui na i wiliwili taucoko ni tamata ka ra yaga me ra curu ki na mataivalu. Era sa lewe 1,100,000 e Isireli ka ra lewe 470,000 e Juta.

⁶ Ena vuku ni nona a cata na lewa vakatui o Joape, a sega kina ni wiliki ira na Livai kei ira na Penijamini.

⁷ A sa rarawa sara na Kalou ena vuku ni ka oqo, ka cudruvi Isireli kina.

⁸ A sa tukuna vua na Kalou o Tevita, “Au sa cakava na cala levu sara ena noqu vakayacora na ka oqo! Mo ni yalo vinaka ka vosoti au na nomuni tamata. Au sa cakava e dua na i vakarau lialia.”

⁹ A sa vosa o Jiova vei Kata, o koya na parofita i Tevita, ka kaya,

¹⁰ “Mo lako ka tukuna vei Tevita ni'u sa solia vua e tolu na digidigi. Au na vakayacora ga na ka e sa digitaka o koya.”

¹¹ A sa lako yani vei Tevita o Kata, ka la'ki tukuna vua na ka sa kaya vua o Jiova, ka taroga, “E vei o sa digitaka?

¹² Me ia na dausiga me yabaki tolu? Se, me vula tolu taucoko na nomu dro tiko mai na nodra mataivalu na kemu meca? Se, me siga tolu na kena kani iko tiko na i seleiwau i Jiova ka tala yani na mate ca ki na nomu vanua, ni sa taurivaka na nona agilosi me vakatubu mate ena veiyasana e Isireli? Na i sau ni taro cava li me'u na la'ki tukuna tale vei Jiova?”

¹³ A sauma lesu vei Kata o Tevita, “Au sa tu oqo ena dua na vanua dredre sara! Ia au sa sega ga ni vinakata me'u cudruvi mai vei ira na tamata. Me qai cudruvi au ga vakataki koya o Jiova, ni sa levu na nona loloma.”

¹⁴ A sa tala yani e dua na mate ca o Jiova vei ira na Isireli, ka ra mate kina e lewe 70,000 na tamata.

¹⁵ A sa qai tala na Kalou e dua na agilosi ki Jerusalemi me la'ki vakarusa, ia a qai veisautaka na lomana ka tukuna vua na agilosi, “Kua! Sa rauta oqori!” A sa tucake volekata tu na rara ni samu witi nei Arauna na Jepusaiti o koya na agilosi.

¹⁶ A tacake o Tevita ka raica na agilosi ni sa tu ena maliwa ni vuravura kei lomalagi, ka taura tu e ligana na nona i seleiwau, ni sa vakarau vakarusai Jerusalemi. A qai cuva sobu e ra o Tevita kei ira na nona qase, ni ra sa vakaisulu taga taucoko tu, ka sa tara qele na matadra.

¹⁷ A sa masu o Tevita, ka kaya, “Oi kemuni na Kalou, sai au ga o koya sa caka cala. Sa i au ga o koya sa vakarota me ia na wili lewenivanua. Na cala cava beka era sa cakava na tamata vakaloloma oqo? I Jiova, na noqu Kalou, mo ni cudruvi au ga kei na noqu vuvale, ka me ra vakabulai ga na nomuni tamata.”

¹⁸ Sa qai vosa vei Kata na agilosi i Jiova me vakaroti Tevita me lako ka tara e dua na i cabocabonisoro vei Jiova ena vanua ni samu witi nei Arauna.

¹⁹ A sa muria o Tevita na i vakaro i Jiova ka mani lako yani, me vaka sa tukuna vua o Kata.

²⁰ E ratou a samu witi tiko o Arauna kei iratou na luvena tagane e lewe va. Ia ena gauna e ratou a raica kina na agilosi, e ratou a cici yani ka la'ki vuni.

²¹ Ena gauna ga e raica kina o Arauna ni sa lako voleka yani vua o Tevita na tui, a qai biuta na rara ni samu witi ka cuva sobu ki ra, ka sa tara qele na matana.

²² A qai kaya o Tevita vei Arauna, “Solia mai vei au na nomu vanua ni samu witi me'u volia, ka me'u cakava kina na i cabocabonisoro vei Jiova, me tarova na mate ca oqo. Au na solia vei iko na kena i sau taucoko sara.”

²³ A sa tukuna o Arauna, “Kemuni na Tui, mo ni taura saka ga me nomuni. Ni vakayacora ga na ka e sa lomamuni. Oqo eso na bulumakau ka'u sa solia me i soro kama, kei na vava rabaraba ni samu witi me kena buka, kei na witi me i madrali laukana. Au sa solia kece oqo vei kemuni.”

²⁴ Ia sa sauma vakaoqo na tui, “E sega, au na volia ga ena kena i sau taucoko sara. Au na sega ni la'ki cabora me i soro kama vei Jiova e dua na ka sa nomu, e dua na ka sa sega ni'u volia vakailavo.”

²⁵ A sa sauma o Tevita vei Arauna e 600 na i lavo koula me i voli ni vanua o ya.

²⁶ A sa tara e kea o Tevita e dua na i cabocabonisoro vei Jiova, ka vakacabori kina na i soro kama eso kei na i soro ni veivinakati. A sa masu, ka sa sauma mai o Jiova ni sa tala sobu mai na bukawaqa mai lomalagi me vakama na i soro kama ena dela ni cabocabonisoro kama.

²⁷ A sa vakarota vua na agilosi o Jiova me daramaka lesu tale na nona i seleiwau ki na kena taga, a sa muria na agilosi.

²⁸ A vakadinata mai na ka oqo o Tevita ni sa donu vei Jiova na nona masu, ka sa ia kina na vakacaboisoro kama ena i cabocabonisoro ka tiko ena vanua ni samu witi nei Arauna.

²⁹ Ena gauna o ya, e sa tiko ga kina ena vanua ni sokalou mai Kipioni na Valelaca tabu i Jiova ka cakava o Mosese ena vanua dravuisiga, ka vakakina na i cabocabonisoro e dau vakamai kina na i soro kama;

³⁰ ia sa sega ni rawa vei Tevita me la'ki sokalou e kea, baleta ni sa rerevaka tiko na i seleiwau ni agilosi i Jiova.