1 Veigauna 17 - Vakavakadewa Vou kei na iVola tale eso

Na i Tukutuku i Necani kivei Tevita

¹ A sa tiko ena nona valenitui o Tevita na tui. Ena dua na siga, sa qai talatala vei Necani na parofita me lako mai, ka sa kaya vua, “Raica, au sa tiko oqo ena dua na vale sa tara ena kau sitari, ia na Kato ni Veiyalayalati i Jiova e sa maroroi tikoga ena dua na valelaca!”

² Sa qai kaya o Necani vei Tevita, “Mo vakayacora na veika sa tu e lomamu, ni sa tiko vata kei iko na Kalou.”

³ Ia ena bogi o ya, a sa kaya na Kalou vei Necani,

⁴ “Mo la'ki tukuna vei Tevita na noqu tamata ni'u sa kaya vakaoqo vua, ‘Sa sega ni o iko me na tara na vale tabu me'u tiko kina.

⁵ Me tekivu mai na gauna ka'u a vakabulai kemuni kina na Isireli mai Ijipita me yacova mai na gauna oqo, au se sega mada ni bau vakatikori ena dua na vale tabu; ia ka'u sa dau tiko voli ga ena valelaca, ka veikauyaki voli mai na dua na vanua ki na dua tale.

⁶ Ena noqu veilakoyaki kece kei ira na Isireli, au se sega mada ni bau taroga vua e dua vei ira na i liuliu ka'u a digitaka se na cava na vuna era sega ni vakarautaka kina e dua na vale sa tara mai na kau sitari me noqu.’

⁷ Ena ka oqo, mo qai vosa kina vei Tevita na noqu tamata ni'u sa kaya vakaoqo oi au, o Jiova ni lewevuqa, ‘Au a kauti iko mai na vakatawani ira na sipi ena kedra bai ka buli iko mo nodra tui na noqu tamata na Isireli.

⁸ Au sa dau tiko vata ga kei iko ena veivanua kecega o lako kina, ka'u sa vakamlumalumutaki ira taucoko na kemu meca o veivala kaya.

⁹ Au sa digia e dua na nodra vanua na noqu tamata na Isireli me'u vakatikori ira kina, ka me ra na tiko kina ka sega ni vakasosataki tale.

¹⁰ Me vakatekivu mai na gauna era a tawana kina na vanua oqo, era sa valuti vakaukauwa sara mai vei ira na tamata i tovo kaukauwa, ia ena sega ni yaco tale na ka oqo. Au sa yalataka ni'u na vakamalumalumutaki ira na kemu meca kecega ka vakatubura na nomu kawa.

¹¹ Ena gauna o mate kina, ka la'ki bulu vata kei ira na nomu qase, au na vakayacora me veiliutaki vakatui e dua vei ira na luvemu, ka'u na vakataudeitaka na nona matanitu.

¹² Sa i koya oqo ena qai tara e dua na vale tabu me noqu, ka'u na qarauna me na drodrova tikoga na nona kawa na veiliutaki vakatui.

¹³ Au na tamana oi au, ka na luvequ o koya. Au na sega ni vakasuka na noqu veitokoni vua me vaka na noqu a vakayacora vei Saula, o koya ka'u a vagalalataka me rawa kina ni o buli me tui.

¹⁴ Au na vakatikori koya na luvemu me lewai ira na noqu tamata kei na noqu matanitu ka tawa mudu. Na veiliutaki vakatui ena drodrova sobu na nona kawa ka sega ni mudu.’ ”

¹⁵ A la'ki tukuna vei Tevita o Necani na veika kece sa vakaraitaka vua na Kalou.

Na Masu ni Vakavinavinaka i Tevita

¹⁶ Sa qai lako yani o Tevita na tui ki na loma ni Valelaca Tabu i Jiova, a sa dabe sobu, ka masu vakaoqo, “Kemuni na Kalou, sa sega sara ni kilikili vei au me noqu na veika lelevu o ni sa vakayacora e vukuqu kei na noqu vuvale.

¹⁷ Ia oqo, sa qai levu cake sara na ka o ni se cakava tikoga; o ni sa vosa ni yalayala me baleti ira na noqu kawa ena veitabayabaki yani ki muri, ka o ni sa okati au me vaka e dua na tamata rogo ka kilai levu.

¹⁸ A cava tale li me'u qai kaya vei kemuni! O ni sa kilai au vinaka, ia o ni sa vakatakila vua na nomuni tamata na i tovo e veidokai.

¹⁹ A sa lomamuni ga ka nomuni i naki mo ni cakava na veika oqo ena vukuqu, ka vakatakila vei au na veika lelevu me baleti au ena veigauna ki liu.

²⁰ Kemuni Jiova, sa sega tale ni dua e vakataki kemuni; ka keimami sa kila deivaki ni sa sega tale na Kalou, oi kemuni duadua ga.

²¹ Sa sega tale na matanitu e vuravura me vakataki Isireli, o ira o ni a vueta mai na veivakabobulataki ka vakayacori ira me ra nomuni tamata. Na veika cecere ka veivakurabuitaki o ni vakayacora vei ira sa vakatetea na kemuni i rogorogo e vuravura taucoko. O ni a vakabulai ira na nomuni tamata mai Ijipita ka vakasevi ira tani na veimatanitu eso ena gauna era yaco yani kina na nomuni tamata.

²² O ni sa digitaki ira na Isireli me ra nomuni tamata ka tawa mudu, ka o ni sa yaco, i Jiova, mo ni nodra Kalou.

²³ “Ia oqo, kemuni Jiova, mo ni vakayacora me tawa mudu na nomuni yalayala me baleti au kei ira na noqu kawa, ka vakayacora na veika o ni sa vosa oti kina.

²⁴ Ena ka levu sara na kemuni i rogorogo, ka ra na dau kaya na tamata ena veigauna kece sara, ‘O Jiova ni lewevuqa sa nodra Kalou na Isireli.’ O ni na qai vakataudeitaka na noqu veiliutaki vakatui me drodrova sobu tikoga na noqu kawa.

²⁵ Sa tu vei au na yalo doudou me'u cavuta yani kina na masu oqo vei kemuni na noqu Kalou, baleta ni o ni sa vakatakila oti kece sara vei au na nomuni tamata na veika oqo, ka tukuna vei au ni o ni na vakayacora me ra tui o ira na noqu kawa.

²⁶ O kemuni Jiova, o ni sa Kalou, ka o ni sa yalataka na ka vinaka oqo vei au.

²⁷ Au sa kerei kemuni mo ni vakalougatataki ira na noqu kawa, me rawa kina ni ra marautaka tikoga na nomuni vinaka. O kemuni, i Jiova, o ni sa vakalougatataki ira, ka na sobuti ira tawa mudu na nomuni veivakalougatataki.”