1 Veigauna 16 - Vakavakadewa Vou kei na iVola tale eso

Sa Vakatikori na Kato e Loma ni Valelaca Vakarautaki

¹ Era sa kauta mai na Kato ni Veiyalayalati ka la'ki biuta ena loma ni valelaca sa vakarautaka oti tu o Tevita. Era a qai vakacabora na i soro kama eso kei na i soro ni veivinakati vua na Kalou.

² Ni sa vakacabora oti o Tevita na i soro kece sara, sa qai vosa vakalougatataki ira na tamata ena yaca i Jiova

³ ka vota vei ira yadua kece sara na kakana. A sa solia vei ira yadua na tagane kei na yalewa e tau yadua na i buli madrai, e dua na tiki ni lewe ni manumanu tavu, kei na dua na i soso qerepi mamaca.

⁴ Sa qai lesia o Tevita eso vei ira na Livai me ra liutaka na sokalou vei Jiova na Kalou ni Isireli ena mata ni Kato ni Veiyalayalati, ka me ia na lagalaga sere kei na vakamolimoli vua.

⁵ A lesi kina o Esava me kena i liuliu, ka me nona i vukevuke o Sakaraia. Ia me ratou dauqiria na api o Jieli, o Simiramoci, o Jeieli, o Maticaia, o Iliavi, o Penaia, o Opeti Itomi vata kei Jieli. O Esava me dauqiria na sibali,

⁶ ka me rau dau uvuca vakawasoma tiko na davui ena mata ni Kato ni Veiyalayalati oi rau na bete o Penaia kei Jesieli.

⁷ Sa i koya o ya na i matai ni gauna me solia kina o Tevita vei Esava kei ira na Livai na i tavi ni kena lagati na veisere ni vakavinavinaka vei Jiova.

A Sere ni Vakavinavinaka

⁸ Dou ia na vakavinavinaka vei Jiova, dou kacivaka yani na nona lagilagi; Dou tukuna ki na veimatanitu na veika sa vakayacora.

⁹ Dou sere vei Jiova; Dou tukuna na veika talei sa cakava.

¹⁰ Dou marau ni da sa wili me nona; Io me marau na lomadra era sa qaravi koya!

¹¹ Dou goleva na veivuke nei Jiova, Ka cuva tikoga vua ena veigauna.

¹² Dou nanuma na nona cakacaka veivakurabuitaki sa vakayacora oti, Na nona cakacaka mana, kei na lewa sa vakatauca.

¹³ Oi kemudou na kawa i Isireli na nona tamata, Oi kemudou na luve i Jekope, na nona digitaki.

¹⁴ O Jiova ga sa noda Kalou; Na nona i vakaro sa roboti vuravura taucoko.

¹⁵ Dou kakua ni guilecava na veiyalayalati ni Kalou, Ka sa vakayacora o koya me yacova na tawa mudu,

¹⁶ na veiyalayalati erau sa cakava kei Epara-ama, kei na nona bubului kivei Aisake.

¹⁷ A sa veiyalayalati o Jiova kei Jekope, a veiyalayalati sa tawa mudu.

¹⁸ A sa kaya, “Au na solia vei iko na vanua o Kenani, Ai votavota mo dou taukena vakadua.”

¹⁹ Era sa lewe lailai ga na tamata ni Kalou, Era sa vulagi ki na vanua o Kenani.

²⁰ Era sa lako mai na dua na vanua ki na dua tale, Mai na dua na matanitu ki na dua tale.

²¹ Ia sa sega ni vakatara na Kalou e dua me vakacacani ira; Me baleta na nodra taqomaki, a sa vunauci ira kina na tui vakaoqo:

²² “Kakua ni vakacacani ira na noqu tamata digitaki; Kakua ni tarai ira na noqu parofita.”

²³ Dou sere vei Jiova, na vuravura kecega! Kacivaka voli e veisiga na i tukutuku vinaka ni nona vakabulai keda.

²⁴ Kacivaka na nona lagilagi ki na veimatanitu, Na nona cakacaka talei vei ira na tamata kecega.

²⁵ Ni sa cecere o Jiova, ka sa dodonu me vakacerecerei vakalevu; Sa dodonu me rokovi vakalevu cake mai vei ira na kalou kecega.

²⁶ Ni ra sa matakau kecega na nodra kalou na veimatanitu tani, Ia o Jiova ga sa bulia na lomalagi.

²⁷ Sa wavoliti koya na i serau kei na lagilagi, Na kaukauwa kei na reki sa vakasinaita na nona i tikotiko.

²⁸ Dou vakalagilagi Jiova na lewe i vuravura kecega, Dou vakacaucautaka na nona i serau kei na nona kaukauwa.

²⁹ Dou vakacerecerea na yaca lagilagi i Jiova; Dou kauta mai na i solisoli me cabori ka curu ki na nona vale tabu. Dou cuva ena mata i Koya sa Yalosavasava ni sa rairai mai;

³⁰ Dou sautaninini e matana, na vuravura kecega! Sa tudei o vuravura ena kena i tutu, ka na sega ni yavalati rawa.

³¹ Me reki o lomalagi, ka marau o vuravura! Me tukuni ki na veimatanitu ni sa tui o Jiova.

³² Me vadugu na wasawasa, kei na veika bula era tiko kina; Me reki na veivanua kei na veika kece era bula kina.

³³ Na veivunikau mai veikau era na kaila ena marau Ni sa lako mai o Jiova me lewai vuravura.

³⁴ Dou ia na vakavinavinaka vei Jiova, ni sa yalovinaka o koya; Ni sa sega ni mudu na nona loloma.

³⁵ Dou kaya vua, “Ni vakabulai keimami, na Kalou na neimami i Vakabula; Ni vakasoqoni keimami vata, ka vueti keimami mai vei ira na veimatanitu, Me keimami vakasinaiti kina ena yalo ni vakavinavinaka, Ka vakalagilagia na yacamuni tabu.”

³⁶ Me vakavinavinakataki o Jiova, na nodra Kalou na Isireli! Me vakacaucautaki ena gauna oqo ka tawa mudu! Era sa qai kaya na tamata kece sara, “Emeni!”, ka vakavinavinakataki Jiova.

Na Sokalou e Jerusalemi kei Kipioni

³⁷ A sa lesi Esava kei ira na wekana na Livai o Tevita na tui me ra liutaka na kena qaravi na sokalou ena tikina sa koto kina na Kato ni Veiyalayalati. Era sa lesi me ra vakayacora na nodra i tavi oqo ena veisiga me vaka na kena i valavala.

³⁸ A veivuke vei ira o Opeti Itomi na luve i Jitucuni tagane kei na 68 na lewe ni nona mataqali. E rau a lesi o Opeti Itomi kei Osa me rau liutaka na kena yadravi na matamata.

³⁹ O Setoki na bete kei ira na nona i tokani vakabete sa nodra i tavi na veiqaravi vei Jiova ena vanua ni sokalou e Kipioni.

⁴⁰ Era dau vakacabora tiko na i soro kama taucoko ena dela ni cabocabonisoro ena veimataka kei na veiyakavi, me muria na veika kecega sa volai ena Lawa sa vakarota o Jiova vei ira na Isireli.

⁴¹ A sa tiko vata kei ira e kea o Imani kei Jitucuni, vata kei ira na kena vo era sa digitaki me ra seretaka na vakavinavinaka vei Jiova ena vuku ni nona loloma tawa mudu.

⁴² A sa nodrau i tavi talega o Imani kei Jitucuni na liutaki ni kena uvuci na davui, kei na qiriti ni sibali kei na i yaya ni vakatagi tale eso ena gauna e lagati kina na sere eso ni vakavinavinaka vua na Kalou. Era a lesi na lewe ni mataqali i Jitucuni me ra dau yadrava na matamata.

⁴³ Era sa qai dui lesu ki na nodra i tikotiko na tamata kecega, ka sa lesu talega o Tevita me la'ki tiko vata mada kei iratou na nona lewe ni vuvale.