1 Veigauna 13 - Vakavakadewa Vou kei na iVola tale eso

Tokitaki na Kato ni Veiyalayalati

¹ A sa ia na veivosaki o Tevita na tui kei ira kecega na turaganivalu ni yayaudolu kei na yayadrau.

² A sa qai kacivaka vei ira taucoko na Isireli era sa soqoni vata yani e kea, ka kaya, “Kevaka o ni solia vei au na nomuni veivakadonui ka sai naki vakakina i Jiova na noda Kalou, ia me da qai tukuna yani vei ira na wekada sa vo tiko ena veivanua e Isireli ka okati kina o ira na bete kei na Livai ena nodra veikoro me ra soqoni vata mai ki ke.

³ Me da qai lako yani ka la'ki kauta mai na nona Kato ni Veiyalayalati na Kalou, ni sa sega tu ni galeleti ena gauna ni veiliutaki vakatui i Saula.”

⁴ Era a marautaka na Isireli na ka sa vakaturi oqo, ka ra sa vakadonuya vakakina.

⁵ A vakasoqoni ira vata kece na Isireli mai na veivanua o Tevita me vakatekivu mai na i yalayala kei Ijipita ena ceva ki na i curucuru i Emaci ena vualiku. Era a soqoni vata oqo me rawa kina ni ra la'ki kauta mai na Kato ni Veiyalayalati mai Kiriaci Jiarimi ki Jerusalemi.

⁶ A lako cake o Tevita kei ira kecega na Isireli ki Beala, o ya ki na koro o Kiriaci Jiarimi ena vanua vaka-Juta, me kau mai kina na Kato ni Veiyalayalati ni Kalou ka cavuti kina na Yacana.

⁷ Era sa qai vakavodoka na Kato ni Veiyalayalati mai na vale i Apinatapi ki na dua na qiqi vou, ka rau kauta mai na qiqi o Usa vata kei Eio.

⁸ A sa mekemeke ena marau o Tevita kei ira kece na Isireli ena mata ni Kalou, era sa qiria na i vakatagi eso me vaka na api, na lali, na sibali kei na davui.

⁹ Ia ni ra yaco ki na rara ni samu witi i Jitoni, a sa tarabe na bulumakau ka tuya tiko na qiqi ka qai dodoka yani na ligana o Usa me taura na Kato ni Veiyalayalati.

¹⁰ E a tubu na cudru i Jiova vei Usa ka vakamatei koya ena vuku ni nona a tara na kato. A sa mate e kea o koya ena mata ni Kalou.

¹¹ A sa rarawa na loma i Tevita ena vuku ni nona cudruvi Usa o Jiova; a sa vakatoka kina na vanua o ya me yacana o Peresi Usa ka yacova na siga oqo.

¹² A sa rerevaka na Kalou o Tevita ena siga o ya, ka sa kaya kina, “Au na qai kauta rawa vakacava na Kato ni Veiyalayalati oqo?”

¹³ A mani sega ni kauta na Kato o Tevita ki Jerusalemi. Ia sa kau vakatikitiki ga na Kato ni Veiyalayalati ki na vale i Opeti Itomi na kai Kaca me la'ki maroroi kina.

¹⁴ A la'ki vula tolu e kea na Kato ka vakalougatataki ira na vuvale i Opeti Itomi o Jiova, ka vakakina na veika kece e taukena.