1 Veigauna 12 - Vakavakadewa Vou kei na iVola tale eso

O Ira na Penijamini ka a Muri Tevita Taumada

¹ A sa tiko o Tevita mai Sikilaki, na vanua a tiko vakavuni kina ena nona dro tani mai vei Saula na tui. Era a tomani koya mai kea eso na sotia makawa ka nuitaki,

² era lewe ni mataqali o Penijamini, ka lewena talega o Saula. Era matai sara ena vanataki dakaititi, ka rawa ni rabotaka na vatu ena ligadra i matau se na ligadra i mawi.

³ Era a tiko ena ruku ni veiliutaki nei Eieseri kei Joasa, na luvedrau tagane o Sima-a mai Qibea. Oqo o ira na sotia: o Jisieli kei Peleti ka rau luve i Asimavece tagane, o Piraka kei Jeu mai Anacoci,

⁴ o Isimaia mai Kipioni, e dua na sotia qaqa ka rogo, a sa dua vei ira na i liuliu ni “Lewe Tolusagavulu” o Jeremaia, o Jesieli, o Jonani kei Josapati mai Kitera;

⁵ o Elusei, o Jirimoci, o Pialaia, o Semaraia kei Sepataia mai Arufi,

⁶ o Ilikana, o Isaia, o Esareli, o Joeseri kei Jasopiami, mai na mataqali i Kora;

⁷ kei rau o Joela kei Sepataia, oi rau na luve i Jiroame tagane mai Kitori.

Na Lewe ni Mataqali o Kata ka Muri Tevita

⁸ Oqo na yacadra na sotia rogo ka kena dau ena i valu mai na mataqali i Kata, o ira era a la'ki duavata kei na mataivalu i Tevita ena nona a tiko voli ena koronivalu mai na vanua dravuisiga. Era sa matai sara ena vakayagataki ni sasabai kei na moto, ka ra rairai rerevaki me vaka na laione, ka ra vuki totolo me vaka na me kila ni veidelana.

⁹ Ai matai ka i liuliu o Esa, ai karua ena veiliutaki o Opetaia, ai katolu o Iliavi;

¹⁰ ai kava o Misimana, ai kalima o Jeremaia;

¹¹ ai kaono o Atai, ai kavitu o Ilieli;

¹² ai kawalu o Jonani, ai kaciwa o Elisapati;

¹³ ai katini o Jeremaia, ai katinikadua o Makipanai.

¹⁴ Eso vei ira na tamata oqo mai na mataqali i Kata era turaganivalu lelevu ni yayaudolu, ka so era turaganivalu lalai ni yayadrau.

¹⁵ Ena i matai ni vula ni dua na yabaki, ka donumaka oqo na waluvu ni Uciwai na Joritani, era a qai kosova na uciwai ka ra vakasevi ira tani kece na tamata era tiko ena veibuca mai na tokalau kei na ra ni uciwai.

O Ira na Penijamini kei na Juta era Muri Tevita

¹⁶ Ena dua na gauna, era a lako yani vei Tevita ena koronivalu ka tiko kina eso vei ira na Penijamini kei na Juta.

¹⁷ A lako yani o Tevita me tavaki ira, ka kaya, “Kevaka dou sa lako mai me vaka na i tokani sa vinakata me vukei au, dou sa ciqomi eke. Mai, dou mai tomani keimami! Ia kevaka e lomamuni mo ni bukiveretaki au vei ira na kequ meca, ka dina ga ni'u sa sega mada ni cakava e dua na ka ca vei kemudou, ena kila ka cudruvi kemudou ga kina o koya na Kalou ni noda qase.”

¹⁸ A sa qai curu na yalo ni Kalou vei Amasai, e dua vei ira, ka sa yaco e muri me komada ni “Lewe Tolusagavulu”, ka sa kailavaka yani, “I Tevita na luve i Jese, keimami sa duavata kei kemuni! Me nomuni na qaqa kei ira kece era vukei kemuni! Na Kalou e sa tiko e yasamu.” A sa ciqomi ira o Tevita ka vakatikori ira me ra vakailesilesi ni nona mataivalu.

O Ira na Mataqali o Manasa era Muri Tevita

¹⁹ Era a vuki eso vei ira na sotia ni mataqali o Manasa me ra tovata kei Tevita ena gauna sa tayabe yani kina kei ira na kai Filisitia me veivala kei Saula. (Ia sa sega ga ni vukei ira na kai Filisitia o Tevita kei ira na nona tamata, baleta na nodra rerevaka o ira na tui ni Filisitia de na la'ki bukiveretaki ira tale o koya ka soli ira yani vei Saula na nona turaga e liu, ka ra vakauti koya lesu kina ki Sikilaki.)

²⁰ Oqo o ira na sotia mai vei ira na Manasa ka ra a vuki me ra tovata kei Tevita ena nona sa lako tiko ki Sikilaki: o Atina, o Josapati, o Jitieli, o Maikeli, o Josapati, o Ilaiu vata kei Silicei. O iratou kece oqo eratou i liuliu ni yayaudolu ena vanua o Manasa.

²¹ Era sa qaravi Tevita me nona vakailesilesi ni mataivalu, baleta ni ra sa sotia rogo ka qaqa. E muri era qai la'ki turaganivalu ni mataivalu ni Isireli.

²² Era a yacoyaco tikoga yani ena veisiga na tamata me ra lewe ni mataivalu i Tevita, ka sa totolo na kena vakaitamera na nona mataivalu.

Yacadra na Lewe ni Mataivalu i Tevita

²³ Ni sa tiko mai Epironi o Tevita, a sa tomani koya mai kea e levu sara na sotia vinaka me ra vukea na nona vakatikori me tui ni sa veisosomitaki vei Saula, me vaka na vosa i Jiova. Na kedra i wiliwili sa vakaoqo:

²⁴ Mai vei ira na Juta: e 6,800 era sa vakaiyaragitaki vinaka, era tauri sasabai kei na moto;

²⁵ Mai vei ira na Simione: e 7,100 era sa vakarautaki vinaka ena i valu;

²⁶ Mai vei ira na Livai: e 4,600 na tagane;

²⁷ Mai vei ira era muri Jioiata, e kawa mai vei Eroni: e 3,700 na tagane;

²⁸ Mai vei ira na weka i Setoki, e dua na cauravou gone ka dauvala: e 22 na tagane dauvakacibi i valu;

²⁹ Mai vei ira na Penijamini (mataqali vata kei Saula): e 3,000 na tagane (e vuqa vei ira na Penijamini era a yalodina tikoga vei Saula);

³⁰ Mai vei ira na Ifereimi: e 20,800 na tamata ni valu qaqa sa rogo ka kilai ena nodra dui mataqali;

³¹ Mai na Ra ni Vanua o Manasa: e 18,000 na tagane sa digitaki me ra lako ka la'ki buli Tevita me tui;

³² Mai vei ira na Isakari: e 200 na qase veiliutaki kei ira na tamata ena ruku ni nodra lewa (o ira na qase veiliutaki oqo era kila deivaki na veika me cakava o Isireli, kei na gauna dodonu me caka kina);

³³ Mai vei ira na Sevuloni: e 50,000 na tamata nuitaki ka yalodina, ka tu vakarau me vala, ka kila na taurivaki ni veimataqali yaragi kece;

³⁴ Mai vei ira na Navitalai: e 1,000 na qase veiliutaki, vata kei na 37,000 na tamata era vakaiyaragi ena i sasabai kei na moto;

³⁵ Mai vei ira na Tani: e 28,600 na tamata sa vakarautaki ki na i valu;

³⁶ Mai vei ira na Aseri: e 40,000 na tamata sa tu vakarau me ravuravu;

³⁷ Mai vei ira na veimataqali ena tokalau ni Joritani, o ya o ira na Rupeni, kei na Kata, vata kei ira na Manasa ena tokalau: e 120,000 na tamata era sa vakarautaki ena taurivaki ni veimataqali yaragi kece.

³⁸ O ira kece sara na sotia oqo, ni ra sa tu vakarau me ra vala, era sa lako ki Epironi, ka ni ra sa vakataudeitaka me buli o Tevita me tui Isireli taucoko. Era a lomavata o ira kece na vo ni lewe i Isireli ena i naki vata ga oqo.

³⁹ Era a siga tolu vata e kea kei Tevita na tui, era a kana ka gunu, ka ra vakarautaka na kedra na wekadra.

⁴⁰ Mai na vanua yawa sara era tiko kina na veimataqali mai na vualiku na Isakari, na Sevuloni kei na Navitalai, era sa lako mai na tamata ka ra kauta mai na asa, na kameli, na meule kei na bulumakau ni siviyara sa dreta voli mai na kakana me vaka na valawa, na vuanilolo, na i soso qerepi mamaca, na waini kei na waiwai olive. Era kauta talega mai na bulumakau kei na sipi me vakamatei ka laukana. Na veika kece e caka oqo e sai vakaraitaki ni marau kei na reki sa vakilai ena veivanua kece o Isireli.