1 Veigauna 11 - Vakavakadewa Vou kei na iVola tale eso

Buli me Tui o Tevita

¹ Era a lako kece yani ki Epironi na Isireli vei Tevita ka ra kaya vua, “O kemami oqo na lewemuni dina ka wekamuni vakadra.

² Ena veigauna sa oti yani ni se tui tiko kina o Saula, sai kemuni ga ka dau liutaki ira na Isireli ki na i valu, ka sa yalataka vei kemuni o Jiova na nomuni Kalou ni o ni na liutaki ira na nona tamata ka yaco mo nodra tui.”

³ Ena ka oqo era sa lako kece yani kina ki Epironi na qase ni Isireli kivei Tevita na tui. A sa cakava o koya e dua na veiyalayalati tabu kei ira, era sa lumuti koya, ka sa yaco me tui Isireli me vaka sara ga na vosa i Jiova ena gusu i Samuela.

⁴ A sa lako o Tevita na tui kei ira kece na Isireli ka ra valuta na koro levu o Jerusalemi. A kilai tu na koro oqo ena gauna o ya me o Jepusa, ka ra tiko voli kina na Jepusaiti, o ira na i taukei ni vanua.

⁵ Era a kaya vei Tevita na Jepusaiti ni na sega ni curuma rawa vakaukauwa na koro o ya, ia sa qai vesuka o Tevita na nodra koro ni valu o Saioni, ka sa vakatokai na “Koro i Tevita”.

⁶ A sa kaya o Tevita, “O koya e vakamatea rawa na i matai ni Jepusaiti ena lesi me liutaka na mataivalu!” A liutaka na kabakoro o Joape na luve i Seruwaia, ka sa mani lesi me komada ni mataivalu.

⁷ Ia me vaka ni sa la'ki tiko o Tevita ena koro ni valu, a sa vakatokai kina me yacana na “Koro i Tevita”.

⁸ A tara vakavolivolita na koro o koya me vakatekivu mai na vanua bulu ena yasana vaka ki na tokalau ni delana. A sa vakavinakataka o Joape na veitikina sa vo ena koro.

⁹ A sa tubu ka kaukauwa cake tikoga mai o Tevita baleta ni sa tiko vata kei koya o Jiova ni lewevuqa.

Na Sotia Qaqa ka Rogo i Tevita

¹⁰ Oqo na yacadra na sotia qaqa ka rogo i Tevita. Era a veitokoni vata kei ira kece na Isireli ena vukei ni sasaga me buli o Tevita me tui, me vaka na vosa ni yalayala i Jiova, ka ra a taqomaka vata na nona matanitu me kaukauwa ka tudei.

¹¹ Na i matai o Jasopiami mai na mataqali i Akimoni ka nodratou i liuliu “Na i Lawalawa e Tolu”. A sa vakayagataka na nona moto me vala kei ira na lewe 300 na tamata ka vakamatei ira kecega ena dua ga na i valu.

¹² A taravi iratou “Na i Lawalawa e Tolu” o Iliesa na luve i Toto, mai na mataqali i Eoa.

¹³ A vala o koya ena yasa i Tevita ena i valu kei ira na kai Filisitia mai Pasi Tamini. A tiko o Iliesa ena dua na loga ni barile ena gauna era a vakatekivu dro kina na Isireli e matadra na kai Filisitia.

¹⁴ A qai bolea o koya kei ira na nona matasotia me ra duri ena lomadonu ni loga sila o ya ka vala kei ira na kai Filisitia. A sa solia vua o Jiova na qaqa.

¹⁵ Ena dua na siga, sa lako yani ki na uluvatu e toka volekata na qara vatu mai Etulama ka tiko voli kina o Tevita e lewe tolu vei ira na lewe 30 na turaganivalu, ka donumaka oqo na nodra keba tiko e dua na mataivalu ni Filisitia ena Buca o Refeimi.

¹⁶ Oqo e donumaka talega na gauna e tiko kina o Tevita ena dua na delana sa taqomaki vakaivalu, ka ra sa tawani Peceliema tiko e dua na matasotia ni Filisitia.

¹⁷ A sa tuburi Tevita e dua na viagunu levu ka kaya, “Isa, me dua mada ga e la'ki kauta mai vei au na wai mai na mataniwai voleka ki na matamata ki Peceliema me'u gunuva!”

¹⁸ E ratou sa qai lako yani na tolu na sotia qaqa ka rogo, ka curuma vakaukauwa yani na i tikotiko ni valu ni Filisitia, ka la'ki takiva na wai mai na mataniwai, ka kauta yani vei Tevita. Ia a sa bese ga ni gunuva na wai o koya; a sa sova ga yani me i soro vei Jiova

¹⁹ ka sa kaya, “Me'u tabu sara ni gunuva oqo. Sa na vaka ni'u gunuva na nodratou dra na noqu i tokani oqo, ka ratou a bolea na mate me ratou la'ki kauta mai na wai!” Ena ka oqo, a sa sega kina ni gunuva. A veika oqo e ratou sa cakava na tolu na sotia qaqa ka rogo.

²⁰ O Apisai na taci Joape sa nodra i liuliu na sotia rogo sa vakatokai “Na Lewe Tolusagavulu”. A sa vakayagataka na nona moto o koya me vala kei ira na lewe 300 na tamata ka sa vakamatei ira kece; a sa rogo ka kilai ena kedra maliwa na “Lewe Tolusagavulu”.

²¹ A sa tamata rogo ka kilai o koya ena kedra maliwa na “Lewe Tolusagavulu” ka sa yaco kina me nodra i liuliu, ia sa sega ga ni rogo ka kilai levu cake sara me vakataki iratou “Na Lewe Tolu”.

²² A sa dua na sotia rogo ka kilai o Penaia na luve i Jioiata mai Kapisieli. A sa vakayacora na veika lelevu o koya ka bau wili kina na nona vakamatea e rua na sotia qaqa ni Moapi. Ena dua na gauna, sa sirova sobu e dua na qara ni lulutu tiko na uca vulavula, ka la'ki vakamatea kina e dua na laione.

²³ A vakamatea talega o Penaia e dua na kai Ijipita, a tamata levu ka sivia na 2 na mita na kena balavu, ka vakaiyaragi tu ena dua na moto levu. A mokuti koya o Penaia ena dua na i wau, ka qai kaliraka tani na moto mai na liga i koya na tuwawa ni Ijipita, ka qai vakamatei koya kina.

²⁴ Oqori na i valavala qaqa eso sa vakayacora o Penaia, e dua vei ira “Na Lewe Tolusagavulu”.

²⁵ A sa duatani duadua toka o koya mai vei ira “Na Lewe Tolusagavulu,” ia a sega soti ga ni rogo ka kilai levu cake sara me vakataki iratou “Na Lewe Tolu”. A sa lesi Penaia o Tevita me nodra i liuliu na matayadra ni tui.

²⁶ Oqo na yacadra na sotia qaqa ka rogo: o Asaeli na taci Joape, o Elanani na luve i Toto tagane mai Peceliema,

²⁷ o Samoci mai Eroti, o Elesi mai Peleti,

²⁸ o iratou na luve i Ikesi tagane mai Tikoa, o Episeri mai Anacoci,

²⁹ o Sipikei mai Usa, o Ilai mai Eoi,

³⁰ o Merei mai Nitofa, o Elepi na luvena tagane o Peana mai Nitofa,

³¹ o Icei na luvena tagane o Ripei mai Qibea e Penijamini, o Penaia na kai Piraconi,

³² o Urei mai na veiuciwai mai Keasi, o Epieli na kai Arapa,

³³ o Asimavece na kai Peurimi, o Elaiapa mai Seliponi,

³⁴ o Asemi mai Kisoni, o Jonacani na luvena tagane o Sake mai Arari,

³⁵ o Eiami na luvena tagane o Sakari mai Arari o Ilifali na luve i Uri tagane,

³⁶ o Efari na kai Makera, o Eaija na kai Piloni,

³⁷ o Esero mai Kameli, o Neri na luve i Esipei tagane,

³⁸ o Joeli na taci Necani, o Mipari na luve i Ariki tagane,

³⁹ o Seleki na luve i Amoni tagane, o Neeri na kai Pieroci, na daucola i yaragi i Joape na luve i Seruwaia,

⁴⁰ o Ira na Icaraiti, o Karipi na Icarati,

⁴¹ o Uraia na Itaiti, o Sapati na luve i Alai tagane,

⁴² o Etini na luve i Sisa tagane, ka nodra i liuliu na Rupeni, kei ira na lewe tolusagavulu vata kaya,

⁴³ o Anani na luve i Meka tagane, o Josafati mai Micini,

⁴⁴ o Usaia na kai Asitera, o rau o Sama kei Jieli, na luvedrau tagane o Ocami na kai Eroeri,

⁴⁵ o Jitieli na luve i Simiri tagane, na tacina o Joa na kai Tisi,

⁴⁶ o Ilieli na kai Meava, o rau o Jiripei kei Josavala na luve i Elineami tagane, o Icama na kai Moapi,

⁴⁷ vata kei iratou o Ilieli, Opeti, kei Jesieli na kai Misopaia.