1 Tui 9 - Vakavakadewa Vou kei na iVola tale eso

Sa Rairai Tale vei Solomoni na Kalou

¹ Ia ni tara oti o Solomoni na Vale i Jiova, kei na valenitui, kei na ka kecega a via cakava,

² a qai rairai tale vei Solomoni o Jiova me vaka na nona a rairai vua mai Kipioni.

³ A sa kaya vua o Jiova, “Au sa rogoca oti na nomu masu kei na nomu kerekere. Au sa vakatabuya na vale oqo o sa tara oti, me tiko kina na yacaqu ka tawa mudu. Au na dau wanonova ka taqomaka ena veigauna kece.

⁴ Kevaka o na qaravi au ena yalodina kei na i valavala dodonu me vakataki Tevita na tamamu, ka kevaka o na muria na noqu lawa kei na veika kece au sa vakarota vei iko,

⁵ au na maroroya na noqu vosa ni yalayala vei Tevita na tamamu ena noqu a tukuna vua ni na veiliutaki tikoga vakatui na nona kawa.

⁶ Ia vei iko, kevaka o na vuki tani mo kakua ni muri au, o iko se o ira na luvemu, ka sega ni vakabauta na noqu i vakaro kei na noqu i lesilesi ka'u a tauca e matamu; ia o na qai lako ka qarava na kalou tani ka cuva vei ira,

⁷ au na qai muduki ira tani na Isireli mai na vanua ka'u a solia vei ira; ia ena vuku ni vale oqo ka'u sa vakatabuya ki na yacaqu au na biuta tani e mataqu, ka na vukici o Isireli me vosataki ena vosa vakaibalebale, ka vosabecitaki vei ira na veimatanitu kecega.

⁸ Ia ena vuku ni vale oqo, ena yaco me i binibini rusa, era na kurabui ka vakaisaisa kina o ira sa lako voli kina; era na kaya, ‘Ena vuku ni cava beka sa cakacaka kina o Jiova ki na vanua oqo kei na Valenisoro oqo?’

⁹ Ia era na kaya, ‘Ni ra sa biuti Jiova na nodra Kalou, o koya a kauti ira mai na nodra qase mai na vanua o Ijipita, ka la'ki taura na kalou tani, cuva vei ira, ka qaravi ira; o koya oqo a vakayacora kina vei ira o Jiova na ka ca kecega oqo.’ ”

Veiyalayalati nei Irami kei Solomoni

¹⁰ Ia ni oti e ruasagavulu na yabaki mai, na gauna a tara kina o Solomoni na vale ruarua, na Vale i Jiova kei na valenitui,

¹¹ a solia kina vei Solomoni o Irami na sitari na damanu, kei na koula, me vaka na ka kecega a vinakata o koya, a qai solia kina vei Irami o Solomoni na tui e ruasagavulu na koro ena vanua o Kalili.

¹² A lako yani o Irami mai Taia me la'ki raica na veikoro sa solia vua o Solomoni, ka sa sega ni vinakati ira o koya.

¹³ Sa qai o koya vei Solomoni, “Na wekaqu, era mataqali koro mada vakacava oqo, na kena o sa solia mai vei au?” Era a mani vakatoka kina veikoro o ya me vanua o Kepuli, ka yacova na siga oqo.

¹⁴ A sa vakauta o Irami vei koya na tui e sivia na 4,000 na kilokaramu na koula.

Veicakacaka Tale Eso e Qarava o Solomoni

¹⁵ E a vakayagataki ira na tamata cakacaka vakabobula o Solomoni na tui me tara na Valenisoro kei na valenitui; o ya me ra buluta ena qele na yasana ki na tokalau, ka tara na bainikoro levu. E a vakayagataki ira talega ena kena tara cake tale na koro o Asori, o Mekito, kei Keseri.

¹⁶ (Taumada sa valuti Keseri o tui Ijipita ka vesuka na koro, ka vakamatei ira na tiko kina, ka vakama na koro. E a qai solia me nona ka ni loloma vua na luvena yalewa, na wati Solomoni.

¹⁷ A tara vou tale na koro o Keseri o Solomoni.) E a tara cake talega o Solomoni na koro o Peci Oroni mai ra,

¹⁸ o Pealaci, o Tema ena vanua lala kei Juta,

¹⁹ kei na veikoro kecega ni yau i Solomoni, na veikoro ni nona qiqinivalu, na nodra veikoro na tamata dauvodo ose, kei na ka kecega sa via tara mai Jerusalemi, Lepanoni, kei na vanua kece ni nona matanitu.

²⁰ Vei ira na tamata kece ka ra vo vei ira na Amoraiti, na Itaiti, na Perisaiti, na Aivaiti kei na Jepusaiti (era sega ni kai Isireli o ira oqo),

²¹ o ya na nodra kawa era se vo ka ra sega ni vakamatei vei ira na Isireli, sa vakayagataki ira o Solomoni me ra nona tamata cakacaka vakabobula me yacova na siga oqo.

²² Ia a sega sara ni dua vei ira na Isireli a vakacakacakataka me vaka na bobula o Solomoni; era a veiqaravi ga ena cakacaka vakasotia, era nona vakailesilesi, era veiliutaki ena nona mataivalu, era liutaka na nona qiqinivalu, ka ra lewe ni nona mataivalu vodo ose.

²³ Era sa lewe 550 taucoko na i vakalesilesi era veiliutaki voli vei ira na tamata sa lewai na nodra cakacaka ni ra sa qarava na tara ni veivale eso nei Solomoni.

²⁴ A sa buluta o Solomoni na yasana vaka ki na tokalau ni koro levu ena qele, ka yaco oqo ni sa toki oti mai na marama na luve i tui Ijipita ka watina mai na Koro i Tevita ki na valenitui sa tara o Solomoni me nona na marama oqo.

²⁵ A dau vakacabora vakatolu ena veiyabaki o Solomoni na i soro kama, kei na i soro ni veivinakati, ena i cabocabonisoro ka a tara o koya vei Jiova, a vakama kina na ka boi vinaka ena mata i Jiova. A sa vakacavara na tara ni Valenisoro o Solomoni.

²⁶ E a taya talega o Solomoni na tui eso na waqa mai Esionikeperi, ka voleka ki Eloci, mai na matasawa ni Wasa Damudamu ena vanua o Itomi.

²⁷ A talai ira yani na nona tamata dausoko ena veiwaqa o Irami, ka ni o ira oqo era kai wai ka kila vinaka na wasawasa, ka me ra soko vata kei ira na tamata i Solomoni.

²⁸ Era a soko yani ki na vanua o Oferi, ka kauta lesu mai vei Solomoni e sivia na 14,000 na kilokaramu na koula.