1 Tui 8 - Vakavakadewa Vou kei na iVola tale eso

Na Kena Vakatabui na Valenisoro

¹ A qai vakasoqoni ira vata na nodra qase na Isireli o Solomoni na tui, o ira kece na turaga ni veimataqali, kei ira na i liuliu me ra lako mai vua ki Jerusalemi, ka me ra kauta cake na Kato ni Veiyalayalati i Jiova mai na koro i Tevita, o ya o Saioni.

² Era a soqoni vata vei Solomoni na tui o ira kece na Isireli ena gauna ni Solevu ni Valetabanikau ena i kavitu ni vula, ena vula o Icanimi.

³ Era a lako kece mai na nodra qase na Isireli, ka ra laveta cake na Kato ni Veiyalayalati na bete.

⁴ Era a kauta kece na Kato ni Veiyalayalati, na Vale ni Veitavaki, kei na i yaya tabu kece a tu ena vale tabu: ka ra kauta cake na bete kei na Livai.

⁵ Ia o Solomoni na tui, kei na nodra i soqosoqo taucoko na Isireli, era a soqoni vata vua, ka tiko kaya ena mata ni kato, ka ra vakacabora na sipi kei na bulumakau, a sega ni tukuni rawa se wili rawa, ena vuku ni kedra levu.

⁶ Era a kauta na Kato ni Veiyalayalati na bete ki na kena i tikotiko, ena rumu tabu, o ya ena Tikina Tabu Sara, ena ruku ni tabadrau na jerupi.

⁷ Na nodrau vakatateba toka na jerupi ena tikina sa tu kina na Kato sa vakaruguta na Kato ni Veiyalayalati kei na kena i vua.

⁸ Na balavu ni muana ruarua ni i vua ni Kato e rawa ni raica e dua na tamata ka tucake tu ena mata ni Tikina Tabu Sara, ia sa sega ga ni raici rawa mai taudaku. (Na i vua ruarua e se toka mai kea me yacova na siga oqo.)

⁹ A sega na ka e tiko ena loma ni Kato ni Veiyalayalati, na vatu raraba ruarua ga ka a vakotora kina o Mosese mai na Ulunivanua o Saineai, ena vanua ka a veiyalayalati kina o Jiova kei ira na Isireli ena nodra a lako tani mai na vanua o Ijipita.

¹⁰ Ia ni ra a curu tani mai na bete mai na Tikina Tabu, a sa qai vakasinaiti na Valenisoro ena o,

¹¹ era a sega ni tucake rawa kina na bete me ra cakava na nodra i tavi ena vuku ni o; ni sa vakasinaita na Vale i Jiova na nona lagilagi.

¹² A sa qai kaya o Solomoni, “Oi kemuni, Jiova, o ni sa vakatikora na matanisiga ena maliwa lala, ia o ni sa digitaka ga mo ni tiko ena veio kei na vanua butobuto.

¹³ Au sa tara vei kemuni e dua na vale vakaiukuuku, na i tikotiko mo ni tiko kina ka sega ni mudu.”

Na Vosa i Solomoni

¹⁴ Ena gauna era tucake kece tu kina na tamata, a sa vuki yani vei ira o Solomoni na tui ka vosa vakalougatataki ira.

¹⁵ A sa kaya o koya, “Me vakavinavinakataki o Jiova, na Kalou ni Isireli! Sa maroroya o koya na nona vosa ni yalayala vua na tamaqu o Tevita, ena nona a kaya,

¹⁶ ‘Mai na siga ka'u a kauti ira tani mai kina noqu tamata na Isireli mai Ijipita, au a sega ni digitaka e dua na koro vei ira na nodra mataqali kecega na Isireli, me'u tara kina e dua na vale, me tiko kina na yacaqu. Ia au a digitaki iko Tevita, mo liutaki ira na noqu tamata.’ ”

¹⁷ A sa kaya tale o Solomoni, E a vinakata dina o Tevita na tamaqu me tara e dua na valenisoro ena yaca i Jiova na Kalou ni Isireli.

¹⁸ Ia a qai kaya o Jiova vei Tevita na tamaqu, ka vaka, ‘Sa donu vinaka na nomu vinakata mo tara e dua na valenisoro ena yacaqu,

¹⁹ ia o iko o na sega ni tara na valenisoro oqo. Ia o koya ga na luvemu ka sa tiki ni lewemu kei na nomu dra ena qai tara na valenisoro oqo ena yacaqu.’

²⁰ “Ia oqo, sa dinata o Jiova na nona vosa ni yalayala. Au sa veisosomitaki vei tamaqu ena veiliutaki vakatui e Isireli, ka'u sa tara oti na Valenisoro me qaravi kina o Jiova na Kalou ni Isireli.

²¹ Au sa cakava rawa talega e kea na tikina me biu kina na Kato ni veiyalayalati i Jiova, o ya na veiyalayalati sa vakayacora o Jiova kei ira na noda qase ena gauna sa kauti ira tani kina mai na vanua o Ijipita.”

Na Masu i Solomoni

²² A sa qai tucake o Solomoni ena mata ni cabocabonisoro i Jiova kei na matadra na lewenivanua o Isireli, a sa dodoka yani na ligana ruarua vaka ki lomalagi.

²³ A sa kaya, “Oi kemuni Jiova na nodra Kalou na Isireli, sa sega tale ni dua na kalou me tautauvata kei kemuni mai lomalagi e cake, se ena vuravura e ra! O ni sa dau maroroya na nomuni veiyalayalati kei ira na nomuni tamata ka vakatakila na nomuni loloma tudei vei ira na nomuni tamata era a lako voli e matamuni ena yalodina mai na vu ni yalodra taucoko.

²⁴ O ni sa dinata na nomuni vosa ni yalayala vei Tevita na tamaqu; ka sa vakavotukana edaidai na veivosa kece oqo.

²⁵ Ia oqo, kemuni Jiova na Kalou ni Isireli, mo ni qai vakayacora vua na nomuni tamata o Tevita na tamaqu na ka o ni sa yalataka vua, ni o ni a kaya vua ni na tiko ga e dua na nona kawa me veiliutaki vakatui e Isireli kevaka me ra dau talairawarawa vei kemuni me vakataki tamaqu.

²⁶ O koya oqo, kemuni Jiova na Kalou ni Isireli, mo ni qai vakadeitaka na nomuni vosa o ni a tukuna vua na nomuni tamata o Tevita na tamaqu.

²⁷ “Ena rawa beka li, oi kemuni na Kalou, mo ni mai vakaitikotiko e vuravura? Me vaka ni sega mada ga ni se veirauti kei kemuni na lomalagi kei na lomalagi e cake sara, ia me na qai veirauti vakacava kei kemuni na Valenisoro ka'u sa tara oqo?

²⁸ Kemuni Jiova na noqu Kalou, sai au oqo na nomuni tamata. Ni rogoca mada na noqu masu, ka vakayacora na noqu kerekere vei kemuni ena siga edaidai.

²⁹ Ni wanonova tikoga na Valenisoro oqo ena siga kei na bogi, ena tikina oqo o ni sa digitaka mo ni qaravi kina. Ni rogoci au mai ni'u sa vakanamata ki na Valenisoro oqo ka masu.

³⁰ Ni rogoca na noqu kerekere kei na nodra kerekere na nomuni tamata ni ra sa vakanamata ki na tikina oqo ka vakacabo masu. Mai na nomuni i tikotiko tabu mai lomalagi, mo ni qai rogoci keimami ka vosoti keimami.

³¹ “Kevaka sa beitaki e dua na tamata ena vuku ni nona caka cala vua na kai nona, ka sa kau mai ki na i cabocabonisoro ni Valenisoro oqo me bubului ni sa sega na nona cala,

³² mo ni qai rogoca mai lomalagi, oi kemuni Jiova, ka vakatulewataka vakadodonu na nomuni tamata. Ni totogitaki koya sa caka cala me vaka na nona i valavala, ka talaca na nona kisi o koya sa tawa cala.

³³ “Kevaka era sa mani vakadrukai na nomuni tamata na Isireli e matadra na kedra meca, baleta ni ra sa caka cala vei kemuni, ia era qai veivutuni ka lesu mai vei kemuni, ka lako mai ki na Valenisoro oqo me ra kerea vakabibi na nomuni veivosoti,

³⁴ ia mo ni qai rogoca mai lomalagi. Ni vosoti ira ena vuku ni nodra i valavala ca na nomuni tamata, ka vakalesui ira tale ki na vanua o ni a solia vei ira na nodra qase.

³⁵ “Kevaka o ni sa sogoti lomalagi ka sa sega na uca, baleta ni ra sai valavala ca vei kemuni na nomuni tamata, ia era qai veivutuni ka vakanamata ki na Valenisoro oqo ena nodra masuti kemuni,

³⁶ ia mo ni qai rogoca mai lomalagi. Ni vosota na nodra i valavala ca na nomuni tamata. Ni vakavulici ira ena sala vinaka me ra lako kina, kemuni Jiova, ka vakatauca na uca ki na nomuni vanua oqo o ni a solia vei ira na nomuni tamata me nodra i votavota.

³⁷ “Kevaka sa dausiga na vanua se yaco e dua na mate levu, se vakacacani na i teitei mai na cagi kaukauwa se qele ni vodre, se ravuti o ira na tamata mai na kedra meca, se yaco mai na mate veitauvi,

³⁸ ia mo ni qai rogoca na nodra masu. Kevaka sa vagolei yani na masu ni vakatakekere mai vei ira na nomuni tamata na Isireli ena yalo e veivutuni, ka dodoka yani na ligadra vaka ki na Valenisoro oqo,

³⁹ mo ni qai rogoca na nodra masu. Ni rogoci ira mai lomalagi, ka vosoti ira, ka vukei ira. Sai kemuni duadua ga sa kila na loma ni tamata. Ia mo ni qai vakayacora ga na lomamuni vua na tamata yadua me vaka na nodra i valavala,

⁴⁰ me rawa kina vei ira me ra rerevaki kemuni ena gauna kecega era bula tiko kina ena vanua o ni a solia vei ira na neimami qase e liu.

⁴¹ “Ia ena vukuna na vulagi sa sega ni okati me nomuni tamata na Isireli, ia sa lako vakayawa mai ena vuku ni kemuni i rogorogo

⁴² ni sa rogoca na yacamuni dokai kei na veika lelevu o ni sa vakayacora vei ira na nomuni tamata, ka sa ia mai me cuva vei kemuni ka cabo masu ena valenisoro oqo,

⁴³ mo ni qai rogoca na nona masu. Mai lomalagi ena nomuni tikina vakaturaga, mo ni rogoci koya ka vakayacora na ka e kerea, me rawa kina ni ra kila na yacamuni o ira kecega na kai vuravura, ka me ra rerevaki kemuni, me vakataki ira na nomuni tamata na Isireli. Era na qai kila kina ni sai koya na Valenisoro oqo sa ia kina na sokalou vei kemuni.

⁴⁴ “Kevaka era sa lako yani o ira na nomuni tamata me ra vala kei ira na kedra meca, ena sala kecega o ni talai ira kina, ka ra masu vei Jiova ni ra vakanamata ki na koro oqo o ni sa digitaka kei na Valenisoro ka'u sa tara ki na yacamuni,

⁴⁵ mo ni qai rogoca mai lomalagi na nodra masu kei na nodra kerekere, ka totaka na ka e dodonu vei ira.

⁴⁶ “Kevaka era sa caka cala vei kemuni ni sa sega na tamata sa sega ni caka cala ka o ni sa cudruvi ira, ka soli ira ki na dua na meca, ka kauti ira vakavesu ki na nona vanua na meca, se yawa se voleka;

⁴⁷ ia kevaka era vakanananu ki na vanua era kau vakavesu mai kina, ka veivutuni, ka masuti kemuni ni ra sa tiko ena nodra vanua na kauti ira vakavesu kina, ka kaya, ‘Keimami sai valalava ca, ka cakava na i tovo vakatani ka sa caka cala;’

⁴⁸ ia kevaka era sa veivutuni ena lomadra taucoko, kei na vu ni yalodra taucoko ena vanua ni nodra meca, o ira na sa tauri vakavesu, ka masu yani vei kemuni vaka ki na nodra vanua o ni a solia vei ira na nodra qase, ki na koro o ni sa digitaka, kei na vale ka'u sa tara oti ki na yacamuni;

⁴⁹ mo ni qai rogoca na nodra masumasu mai lomalagi, ena yasana o ni sa tiko kina, kei na nodra kerekere, ka totaka na ka e dodonu vei ira,

⁵⁰ ia mo ni kakua ni cudruvi ira na nomuni tamata era sai valavala ca vei kemuni, ka sa talaidredre vei kemuni, ia mo ni vakayalovinakataki ira era sa vakabobulataki ka me ra lomani ira.

⁵¹ Ni ra sa nomuni tamata, kei na nomuni i votavota, o ni a kauta tani mai Ijipita ena loma ni lovo ni vakawaicalataki kaukamea.

⁵² Me rai tu na matamuni ki na nodra kerekere na nomuni tamata, kei na nodra vakamamasu na nomuni tamata na Isireli, ia mo ni rogoci ira ena ka kecega era masuti kemuni kina.

⁵³ Ni o ni sa tawasei ira me ra nomuni, me ra nomuni i votavota mai vei ira kecega na lewe ni veimatanitu e vuravura, me vaka o ni a kaya ena gusu i Mosese na nomuni tamata ena gauna o ni kauti ira tani mai kina na neimami qase mai Ijipita.”

Na Masu ni Veivakalougatataki i Solomoni

⁵⁴ Ia ni vakaotia na nona cabora o Solomoni na nona masu kei na kerekere vei Jiova, a sa qai tucake mai na mata ni cabocabonisoro i Jiova ena vanua ka a tekiduru ka dodoka tu kina na ligana ki lomalagi.

⁵⁵ E a duri tu ka vosa vakalougatataki ira na i soqosoqo taucoko ni Isireli ena domo levu, ka kaya,

⁵⁶ “Me vakavinavinakataki o Jiova o koya sa solia na vakacegu vei ira na nona tamata na Isireli, me vaka na ka kecega ka a yalataka o koya. A sa dinata na nona vosa ni yalayala kecega sa vakadewataki mai na gusu i Mosese na nona tamata.

⁵⁷ Me tiko ga kei keda o Jiova na noda Kalou, me vaka a tiko kei ira na noda qase; me kakua mada ga ni biuti keda, se lako tani mai vei keda;

⁵⁸ ka me vagolea na lomada vua, muria na nona i vakarau, ka talairawarawa ki na nona i vakaro, na nona i lesilesi, kei na nona lewa, a vakarota o koya vei ira na noda qase.

⁵⁹ Ia na noqu vosa oqo, ka'u sa masu kina ena mata i Jiova, me voleka vei Jiova na noda Kalou ena siga kei na bogi, ka me cakava kina o koya na veika e dodonu vei au na nona tamata, kei na veika e dodonu vei ira na nona tamata na Isireli, me vaka sa yaga ena veisiga yadua;

⁶⁰ o koya oqo me ra kila kina na veimatanitu e vuravura taucoko ni sa Kalou o Jiova, ka sa sega tale e dua.

⁶¹ Ia me dodonu na lomamuni ka dina taucoko vei Jiova na noda Kalou, ka vakabauta na nona i vakaro, me vaka ena siga oqo.”

Na Vakacabori ni Valenisoro

⁶² Era a vakacabora na nodra i soro ena mata i Jiova, na tui, kei ira kecega na Isireli.

⁶³ A vakacabora o Solomoni e 22,000 na bulumakau kei na 120,000 na sipi me i soro ni veivinakati vei Jiova. Era a vakatabuya na Valenisoro na tui kei ira kecega na Isireli.

⁶⁴ Ena siga vata ga o ya, sa vakatabuya kina na tui na lomanibai ena mata ni Valenisoro ena vuku ni nona a vakacabora mai kea na i soro kama ni veivinakati, na i madrali laukana, kei na uro ni manumanu ena i soro ni veivinakati. A sa vakayacora o ya baleta ni sa rui lailai na i cabocabonisoro parasa ka sega ni veirauti kei na i soro kece me cabori.

⁶⁵ A cakava e dua na kana magiti o Solomoni kei ira kece na Isireli ena Solevu ni Valetabanikau me vitu na siga. Era a tiko kina e dua na wiliwili levu ni tamata era lako mai vakayawa me yaco sara ki na i curucuru ki Emaci ena vualiku kei na i yalayala ni vanua o Ijipita mai na ceva.

⁶⁶ Ia ena i kawalu ni siga, a talai ira yani na tamata na tui, ka lako yani ki na nodra veivale ena reki, ka marau na yalodra ena vuku ni veika vinaka kecega a cakava o Jiova vei Tevita na nona tamata kei ira talega na Isireli.