1 Tui 7 - Vakavakadewa Vou kei na iVola tale eso

Na Valenitui nei Solomoni

¹ A sa tara talega o Solomoni e dua na nona vale, ka rauta ni tini katolu na yabaki na dede ni kena tara tiko.

² A sa tara talega o koya na Olo ni Veikau mai Lepanoni ka kena balavu e 44 na mita, ka 22 na mita na kena raba, ka 13.5 na mita na kena cere; ka tara toka ena domo ni duru sitari sa yatu va, ka so na i coka sitari ena domo ni veiduru.

³ A ubi na dela ni veicoka (o ya na siligi ni vale) ena kau sitari e 45 taucoko, ka tau ya 15 na duru ena i yatu yadua.

⁴ A yatu tolu na katubaleka, ka veidonui na yasana ruarua.

⁵ Na feremi ni i sogo kece kei na katubaleka era bulicaki vaka na katuba ni sa va taucoko na tutuna, ka veiqaravi vata ki loma na katubaleka e yatu tolu.

⁶ A cakava o koya e dua na Olo ni Duru Lelevu e 22 na mita na kedra balavu ka 13.5 na mita na kedra raba. E koto kina e dua na varada ka vesuki matua na kena i ubi mai na i coka levu sa tu e matadra.

⁷ A qai cakava o koya e dua na i tikotiko se olo vakaturaga, ka sa vakatokai talega na Olo ni Vakatulewa, o ya na tikina e dau vakatauca kina o Solomoni na nona lewa; ka sa ubia ena sitari me vakatekivu mai na buturara ki na siligi ni vale.

⁸ A vale talega i Solomoni ka koto ena dua tale na tikina ena daku ni Olo ni Vakatulewa, a sa tautauvata ga na kena i cakacaka. A cakava talega o Solomoni na mataqali vale vata oqori me nei watina, ka luve tui Ijipita.

⁹ A vatu talei kecega oqori, me vaka na i vakarau ni vatu a dau ta, a lauvaro ena i varo, e loma e sau talega, mai na kena yavu ka yaco ki na dela ni lalaga, me vakatekivu mai tautuba ki na lomanibai levu.

¹⁰ Sa vakayavutaki na vale ena veivatu lelevu sa ta mai na kena vanua, eso e 3.5 na mita na kedra balavu, ka so tale e 4 na mita na kedra balavu.

¹¹ Ia ena delana, a tiko kina eso na vatu talei, me vaka na i vakarau ni vatu ta, ka so na sitari.

¹² Ia na lomanibai levu a vakavolivolita, a yatu tolu na vatu ta, ka dua na i yatu na i coka sitari, me bai ni rara ni loma ni Valenisoro kei na varada ni vale.

Na Cakacaka nei Urami

¹³ A talatala o Solomoni me la'ki kau mai o Urami mai Taia.

¹⁴ O Urami na luve ni dua na yada ena mataqali i Navitalai; a kai Taia o tamana, ka matai ni parasa. A tamata vuku sara o koya, ka dau loma kasa, ka sa kena dau dina na veika parasa kecega. A lako mai vei Solomoni na tui, ka cakava kina nona cakacaka.

Na Duru Parasa e Rua

¹⁵ A cakava e rua na duru parasa ena mata ni Valenisoro. Na duru yadua oqo me rauta ni 8 na mita na kena balavu ka 5.3 na mita na i vakarau ni dagona wavoki.

¹⁶ A vakawaicalataka na parasa ka cakava kina e rua na domodomo me viria ena dela ni veiduru, na cecere ni dua na domodomo e 2.2 na mita.

¹⁷ A talia e rua na lawa veivolavolai kei na sinucodo muloci ki na domodomo a tu ena dela ni dua na duru e dua, ka dua ena domodomo ka dua.

¹⁸ A cakava na veiduru ka rua na i yatu me volita na taudaku ni lawa, me ubia na i ukuuku a vaka na pomokareneti na domodomo o ya a tu e delana, a cakava vakakina ena domodomo ka dua.

¹⁹ Ia na domodomo ka tu ena dela ni veiduru ena varada, a caka me vaka na se ni viavia, ka 1.8 na mita na kena cere,

²⁰ ka vakataqari na domodomo ena dela ni duru ruarua mai cake, ena dela ni ucuna momoto vakarivirivi. Ia e 200 na pomekaraneti sa yatuni rua ka viviga na domodomo ruarua.

²¹ A vakaduria o koya na duru ena varada ni vale tabu; a vakaduria na duru i matau ka vakatoka me yacana o Jakini; ka qai vakaduria na duru i mawi ka vakatoka me yacana o Poasa.

²² A caka na domo ni duru me vaka na se ni viavia. Sa qai mai vakacavari na cakacaka ni duru ruarua.

Na Taqe Parasa

²³ A vakawaicalataka na parasa me cakava kina ena dua na taqe mokimokiti levu, ka 2.2 na mita na kena titobu, e 4.4 na mita na kena raba, ka 13.2 na mita na kena balavu vakarivirivi.

²⁴ Ena dago ni taqe ena ruku ni batibatina sa wavoliti ena i yaloyalo ni vuanikau na vago, e yatu rua, ka buli vata ga kei na taqe parasa.

²⁵ A sa taqa koto na taqe ena deladra e lewe tinikarua na bulumakau parasa ka vakanamata ki tautuba; e tolu e ratou vakanamata ki na vualiku, ka tolu ki na ra, e tolu ki na ceva, ka tolu e ratou namata ki na tokalau; ka qara vata kece ki loma na buidra yadua.

²⁶ Na veiyasa ni taqe e 75 na milimita na kena vavaku. Na batibatina sa vaka na bati ni bilo, ka sa muloci yani ki tuba me vaka na se ni viavia. E vakatawana rawa na taqe oqo e rauta ni 40,000 na lita.

Na i Tutu ni Beseni Parasa

²⁷ A cakava talega o Urami e tini na i tutu ni beseni parasa; a kedra balavu e 1.8 na mita, e 1.8 na mita na kedra raba, ka 1.3 na mita na kedra cere.

²⁸ Na kena caka na i tutu ni beseni sa vakaoqo: era sa biu vata na veitikina rabaraba lalai ka vakatikori ki na loma ni kena feremi.

²⁹ Era qai toka ena veitutuna ena tikina mai cake na i yaloyalo ni laione, na bulumakau, kei na jerupi. Ia ena kena feremi, a sa toka ruarua ena delana mai cake ka vakakina ena ruku e ra ni laione kei na bulumakau eso na i ukuuku vakamatai.

³⁰ Na i tutu ni beseni yadudua oqo koto kina e va na yavana parasa se qiqi, kei na kedra i vakacocowiriwiri parasa. Ena tutuna vava sa toka kina na i vakadei ni beseni ka caka ena parasa; ka ukutaki na i vakadei oqo ena i yaloyalo me vaka na senikau tali vakamokimokiti.

³¹ A sa koto e dua na sui vakarautaki ka bulicaki mokimokiti e delana. Oqo e duri cake tu me 45 na senitimita mai na dela ni i tutu ni beseni, ka 18 na senitimita ki ra. Sa ceuti vakamatau ena i ukuuku na dagona wavoki.

³² Na yava ni qiqi vava sa 66 na senitimita na kena cere, ka ra sa vakamautaki ki na tutuna e cowiri kina na yavana.

³³ Sa yava ni qiqi oqo e sa vaka na yava ni kareti; a sa caka kece sara ena parasa, oqori na ka sa cowiri kina, na batibatina mokimokiti, na kena i sa, kei na lomadonu ni qiqi.

³⁴ A sa tau yava na kena i vakadei ena ruku ni i tutu ni beseni yadua, ka sa caka vata ga me dua na tikina kei na i tutu ni beseni.

³⁵ Ia ena dela ni i tutu ni beseni yadua sa koto kina e dua na domodomo sa 22 na senitimita na kena cecere; ka sa buli vata ga me duabau na kena i tutu, na kena i vakababa, kei na belena.

³⁶ A ceuta o koya na i ukuuku ena veitikina raraba me vaka na jerupi, na laione, kei na niusawa ena veivanua e ganita, ka tini ena i ukuuku e ceuti wavolita.

³⁷ Sai koya oqo na i tuvatuva ni kena caka na i tutu ni beseni e tini, ni sa tautauvata na kedra i tulituli, na kedratou i vakarau, kei na kedratou lelevu.

³⁸ A cakava talega o Urami e tini na beseni parasa, me ra toka yadua ena i tutu ni beseni parasa; ka raba ni dua na beseni e 1.8 na mita, ka vakatawana rawa e 800 na lita.

³⁹ A vakatikora e lima na i tutu ni beseni ena yasa ni vale ki na ceva, ka lima ena yasana ki na vualiku; a vakatikora na taqe ena tokalau-cevaceva ni kubu ni vale.

Na i Ukuuku e Loma ni Valenisoro

⁴⁰ A sa cakava talega o Urami eso na kuro kei na i sivi me dau sivi tani kina na dravusa, kei na beseni eso ni kurekureitaki. A vakaotia o Urami na veicakacaka kece sara a cakava vei Solomoni na tui, me baleta na vale i Jiova,

⁴¹ e rua na duru, kei na i ukuuku mokimokiti ni domodomo, a toka ena dela ni duru ruarua;

⁴² kei na i ukuuku e 400 sa vaka na pomokareneti, me baleta e rua na i yatu i ukuuku, me ubia na i ukuuku mokimokiti e rua ena domodomo ka toka ena dela ni duru ruarua;

⁴³ na i tutu e tini, kei na beseni e tini ena kedratou i tutu;

⁴⁴ ka toka e dua na taqe levu e deladratou e tinikarua na bulumakau ni siviyara.

⁴⁵ Na kuro, na i sivi me sivi tani kina na dravusa, kei na beseni ni kurekureitaki sa cakava o Urami ena parasa solo vakavinaka, ka vakarautaki vei Solomoni na tui me yaga ena vale i Jiova.

⁴⁶ A cakava oqori na tui ena Buca o Joritani, ena vanua tete ena veimama i Sukoci kei Saricani.

⁴⁷ A sega ni vakarautaka na bibi ni yaya kece o Solomoni, ni rui levu, ka mani sega ni kila kina na bibi ni parasa a vakayagataki.

⁴⁸ A cakava o Solomoni na i yaya kece a tu ena vale i Jiova; na i cabocabonisoro koula, kei na teveli koula a dau tu kina na madrai me cabori vua na Kalou,

⁴⁹ kei na tini na i tutu ni cina koula dina ka ra duri ena mata ni Tikina Tabu Sara, e lima ena yasana ki na ceva ka lima ena yasana ki na vualiku; na senikau, na cina, kei na i saga ni buka;

⁵⁰ na bilo, na i boko ni cina, na beseni, na sedre ni ka boi vinaka, na miqa ni buka koula dina, na i ruberube koula ni sogo ni vale e loma, na Tikina Tabu Sara kei na katuba levu ni Valenisoro.

⁵¹ Ni cakava oti na veicakacaka kece o Solomoni na tui ena vale i Jiova, a kauta ki loma na veiyaya sa vakatabuya o Tevita na tamana me nei Jiova; na siliva, na koula kei na veiyaya maroroi ena valeniyau i Jiova.