1 Tui 5 - Vakavakadewa Vou kei na iVola tale eso

Vakarau Tara na Valenisoro o Solomoni

¹ A vakarau o Solomoni na tui me tara na vale tabu. A talai ira na nona tamata o Irami na tui Taia vei Solomoni, ni a rogoca oti o koya ni a lumuti o Solomoni me tui, me i sosomi kei tamana; ni a dau lomani Tevita o Irami.

² A talatala vei Irami o Solomoni, ka kaya,

³ “O sa kila tiko ni a sega ni tara rawa e dua na vale ki na yaca i Jiova na Kalou, o Tevita na tamaqu, ena vuku ni nona oga ena veivaluvaluti kei ira na nona meca ka ra tu volivoliti koya, me yacova ni a soli ira yani o Jiova me ra vakarorogo vua.

⁴ Ia oqo, a vakacegui au o Jiova mai na veiyasana kecega; a sega ni dua na meca, ka sega ni yaco e dua na leqa.

⁵ Sa lomaqu me'u tara e dua na vale ena vuku ni yaca i Jiova na Kalou, me vaka na ka sa kaya o Jiova vei Tevita na tamaqu, ka vaka, ‘Na luvemu, o koya ka'u na vakatikora ena nomu i tikotiko vakaturaga me kemu i sosomi, ena tara o koya na vale ena vuku ni yacaqu.’

⁶ Ia oqo mo vakarota me ra taya eso na sitari mai Lepanoni me noqu. Era na la'ki cakacaka vata yani kei ira na nomu tamata o ira na noqu tamata, ka'u na solia vei iko na kedra i sau o sa vakatulewataka. Me vaka o sa kila vinaka ni ra sa sega ni kila na ta kau na noqu tamata me vakataki ira na nomu tamata.”

⁷ Ia ni a rogoca o Irami na vosa i Solomoni, a marau sara kina vakalevu, ka kaya, “Me vakavinavinakataki o Jiova ena siga edaidai, ni a solia vei Tevita e dua na luvena vuku me lewai ira na lewe vuqa.”

⁸ A talatala talega vei Solomoni o Irami, ka kaya, “Au sa rogoca na ka o talatala mai kina vei au; au na cakava na ka kecega o vinakata ena vuku ni sitari kei na damanu.

⁹ Era na kauta sobu mai Lepanoni ki waitui na noqu tamata; ia ka'u na viria na kena bilibili mai waitui ki na tikina o tukuna vei au, era na qai mai tasereki e kea, ka mo qai mai taura; ia o na cakava na ka au vinakata, ka ni o ni na soli kakana vei ira na noqu tamata.”

¹⁰ A solia vei Solomoni o Irami na vu ni sitari kece sa vinakata, ka vakakina na vu ni damanu.

¹¹ A solia vei Irami o Solomoni e 2,000 na tani na witi kei na 400,000 na lita na waiwai olive ena veiyabaki me kedra na nona tamata.

¹² A sa solia vei Solomoni o Jiova na vuku me vaka sa yalataka vua. E rau a veimaliwai vinaka o Irami kei Solomoni, ka rau a vakayacora e dua na nodrau veiyalayalati.

¹³ A lavaka o Solomoni e dua na matacakacaka bobula mai vei ira kece na Isireli, ka ra lewe 30,000 na kedra i wiliwili.

¹⁴ A lesi o Etonirami me liutaki ira, ka sa wasei ira vakatolu me tau ya 10,000 na tamata, ka veiwasewase yadua sa la'ki cakacaka ki Lepanoni me vula yadua ka lesu ki nodra veikoro me vula yarua.

¹⁵ Ia era tu talega vei Solomoni e lewe 80,000 na tamata era dautavatu mai na ulunivanua, ka lewe 70,000 na tamata cakacaka me ra colata mai,

¹⁶ ka lesia e lewe 3,300 me ra liutaki ira ena vuku ni kena cicivaki vakamaqosa na cakacaka.

¹⁷ Ena nona i vakaro na tui, era kauta mai kina na vatu lelevu, kei na vatu dredre, kei na vatu sa ta oti, me caka kina na yavu ni Valenisoro.

¹⁸ Era a taya na vatu na tamata i Irami, kei ira na kai Kipali ka vakarautaka na kau kei na vatu me tara kina na Valenisoro.