1 Tui 4 - Vakavakadewa Vou kei na iVola tale eso

Nona i Vakailesilesi o Solomoni

¹ A tui vei ira kecega na Isireli o Solomoni.

² Ia o ira oqo na nona vakailesilesi lelevu: O Asaria na luve i Setoki na bete;

³ e rau vunivola o Ilioreti kei Eaia, o rau na luve i Sisa; o Josefati na luve i Eiluti, sa dau vola na veika sa baleta na matanitu.

⁴ A sa komada ni mataivalu o Penaia na luve i Jioiata; e rau a bete o Setoki kei Epaiaca;

⁵ a sa lewai ira na turaga lalai o Asaraia na luve i Necani; ia o Saputi na luve i Necani na bete, a nona i tokani na tui;

⁶ a liutaki ira na veiqaravi e valenitui o Eisari a lewa na cakacaka lavaki vakabobula o Etonirami na luve i Apita.

⁷ A digitaka o Solomoni e lewe tinikarua na nona tamata me ra i liuliu ena veitikina kece e Isireli. O ira oqo me ra dau solia tiko na kena kakana na tui kei ira na nona lewe ni vale, me tau yadua na vula dua na i liuliu ena veiyabaki kece na nodra vakania na tui.

⁸ Ia oqo na yacadra: o Peniuri na luve i Uri mai na vanua veidelana o Ifereimi;

⁹ o Penideka mai Makasi, Sepilimi, Pecisemesi, kei Elonipecianani;

¹⁰ o Peni-eseti mai Erupoci (a nona talega o Soko, kei na vanua taucoko o Eferi);

¹¹ o Peniapinatapi ena vanua kecega o Nepacadoa, ka rau a vakawati kei Tafaci na luve i Solomoni;

¹² o Peana na luve i Eilute, a nona o Tenaki, Mekito, kei Pecisiani taucoko e tiki Saricani ena ruku i Jesireli, mai Pecisiani, yaco ki Epeli-meola, ka sivi Jokimiami;

¹³ o Penikiperi mai Remocikiliati a nona na veikoro i Jairi na luve i Manasa, a tiko mai Kiliati; a nona na i wasewase o Arikopi ka tiko mai Pasani, a onosagavulu na veikoro lelevu sa vakabai, ka vakabai lawalawa ena parasa;

¹⁴ o Elinatapi na luve i Ito, e Meneimi;

¹⁵ o Eimasi, mai Navitalai a vakawati kei Pasemaca na luve i Solomoni;

¹⁶ o Pena, na luve i Usaia, mai Aseri kei Piloca;

¹⁷ o Josefati na luve i Parua, mai Isakari;

¹⁸ o Semeai, na luve i Ela, mai Penijamini;

¹⁹ o Kiperi na luve i Uri, mai na vanua o Kiliati, ena vanua i Sioni na nodra tui na Amoraiti, kei Oki talega na tui Pasani. A sa dua na nona tamata turaga na tui mai na vanua o Juta.

²⁰ Era a lewe vuqa na Juta, kei ira na Isireli, me vaka na nuku ni matasawa na kedra i wiliwili, era a kana, gunu, ka marau tiko.

²¹ A lewai ira na veimatanitu kecega o Solomoni me vakatekivu mai na uciwai na Uferetisi ka yaco ki na nodra vanua na kai Filisitia, yaco ki na i yalayala kei Ijipita; era a kauta mai na veika lavaki, i colacola, ka qaravi Solomoni ena gauna kece a bula kina o koya.

²² Na i vakarau ni kakana sa gadreva o Solomoni ena dua na siga e 5,000 na lita na valawa digitaki kei na 10,000 na lita na kakana qaqi;

²³ e tini na bulumakau uro vinaka, e ruasagavulu na bulumakau mai na vanua veico, e duanadrau na sipi, ka vakakina eso na dia, na kaseli, na ropuki, kei na toa uro.

²⁴ Ni sa nei Solomoni na veivanua kece ena ra ni uciwai levu na Uferetisi me vakatekivu mai Tifisi ka yaco ki Qasa, vei ira talega na tui kece ni veivanua ena ra ni Uferetisi; a tiko veisaututaki kei ira kecega era a tiko vakavolivoliti koya.

²⁵ Era a tiko vinaka ka sautu ena gauna kece i Solomoni na Juta kei na Isireli, na tamata ena ruku ni nona vunivaini, kei na ruku ni nona vunilolo, me vakatekivu mai Tani, ka yaco ki Perisepa.

²⁶ A sa 40,000 na i tutu ni ose ni qiqinivalu nei Solomoni, ka lewe 12,000 na nona tamata dauvodo ose.

²⁷ Ia era a vakarautaka na turaga ni veiyasana oqori na kakana kei Solomoni na tui, kei ira kecega era kana ena nona teveli, ka me ra tau yadua na vula na veivakani; ka sega ni laiva me dua na kakana e lutu kina.

²⁸ A kau talega mai vakakina na barile kei na co, me vaka sa gadrevi, me kedra na ose ni kareti kei na veimataqali manumanu tale eso.

²⁹ A solia vei Solomoni o Jiova, na Kalou, na vuku, kei na kila ka, ka sega ni kilai rawa na kena levu, kei na daulomasoli me vaka na levu ni nuku ni matasawa,

³⁰ ka la'ki uasivia na nodra vuku kecega mai na Tokalau na vuku i Solomoni, a sivita vakakina na nodra vuku kecega na kai Ijipita.

³¹ Ni sa vuku cake vei ira na tamata kecega o koya; ka vuku cake mai vei iratou na luve i Maoli; a rogo o Solomoni ki na veimatanitu kecega a vakavolivolita.

³² A cavuta o koya e tolu na udolu na vosa vakaibalebale, ka dua na udolu ka lima na nona sere.

³³ A vakamacalataka na veikau o koya, me tekivu mai na sitari mai Lepanoni ka yacova yani na isopi ka dau tubu e dela ni bai; a tukuni ira talega na manumanu yava i va, na manumanu vuka, na manumanu sa qasi voli, kei na ika.

³⁴ Era a lako mai na tamata ni veimatanitu kecega me ra rogoca na vuku i Solomoni, ka vaka talega kina o ira na tui kece e vuravura ka rogo kina na nona vuku.