1 Tui 3 - Vakavakadewa Vou kei na iVola tale eso

Sa Masu o Solomoni me Kerea na Vuku

¹ A sa cakava o Solomoni e dua na sala me veiwekani kina kei na tui Ijipita ena nona vakawatitaka na luvena yalewa. A kauti watina mai ki na koro i Tevita me yacova ni sa tara oti na nona valenitui, kei na Valenisoro, kei na bai kei Jerusalemi.

² Me vaka ni se bera ni bau tara e dua na vale ni sokalou vei Jiova, era sa dau vakacaboisoro tikoga na tamata ena veivanua ni vakacaboisoro duidui eso.

³ A sa lomani Jiova o Solomoni ka muria tiko na vunau i Tevita na tamana; ia a vakacaboisoro tiko o koya ka vakama na veika boi vinaka ena veivanua ni vakacaboisoro duidui eso.

⁴ A sa lako na tui ki Kipioni me vakacaboisoro kina, ni sa rogo levu na vanua o ya; ka vakacabora kina o Solomoni e dua na udolu na i soro kama ena i cabocabonisoro e kea.

⁵ Sa qai rairai vei Solomoni o Jiova mai Kipioni ena tadra ena bogi; a sa kaya kina vua na Kalou, “Na cava o na vinakata me'u solia vei iko?”

⁶ A sa kaya o Solomoni, “O ni sa cakava vakalevu na loloma tudei vua na nomuni tamata o Tevita na tamaqu, me vaka sa lako o koya e matamuni ena yalodina kei na i valavala dodonu, kei na yalo dodonu vei kemuni; ia o ni sa cakava vua na loloma lelevu ka tudei oqo, ni o ni sa solia vua e dua na luvena me tiko ena i tikotiko vakaturaga, me vaka sa tiko kina oqo.

⁷ Ia oqo, oi kemuni Jiova na noqu Kalou, o ni sa lesi au na nomuni tamata me'u tui, me'u i sosomi kei Tevita na tamaqu, ia sa dina ni ka'u sa gone lailai ga, ka'u sa sega ni kila na sala.

⁸ A sa tiko na nomuni tamata oqo, kei ira na nomuni tamata, o ni a digitaka, era sa lewe vuqa, ka sega ni wili rawa se tukuni rawa.

⁹ Ia mo ni solia vei au na nomuni tamata na yalo sa vuku, me'u lewai ira rawa kina na nomuni tamata, me'u kila na ka vinaka kei na ka ca; ia o cei li sa rawata me lewai ira na nomuni tamata lewe levu oqo?”

¹⁰ A vinaka vei Jiova na vosa o ya, ni a kerea na ka oqo o Solomoni.

¹¹ A sa kaya vei Solomoni o Jiova na Kalou, “Ena vuku ni nomu kerea na ka oqo, ka sega ni kerea me nomu na bula balavu, na i yau, se me ra mate na nomu meca, ia o sa kerea ga me nomu na vuku, mo kila kina na lewa dodonu;

¹² raica, au sa cakava oqo me vaka na nomu vosa. Au na solia vei iko na yalo sa vuku ka dau kila rawa na ka; sa sega kina ni dua e liu me tautauvata kei iko, ka na sega tale ni dua me na qai tubu e muri me vakataki iko.

¹³ Ia au na solia talega vei iko na ka o a sega ni kerea, na i yau, mo dokai, ka me kakua kina ni dua tale na tui me na tautauvata kei iko ena nomu gauna taucoko.

¹⁴ Ia kevaka o muria na noqu sala, mo vakabauta na noqu i vunau kei na noqu i vakaro, me vaka na ka sa cakava o Tevita na tamamu, au na qai vakabalavutaka na nomu bula.”

¹⁵ A yadra o Solomoni, ka raica ni a tadra ga. A lako ki Jerusalemi, ka la'ki tu ena mata ni Kato ni Veiyalayalati i Jiova, ka vakacabora eso na i soro kama, kei na i soro ni veivinakati, ka caka magiti me kedra na nona tamata dauveiqaravi.

Vakatulewataka e Dua na Kisi Dredre o Solomoni

¹⁶ E rau a qai lako mai vua na tui e rua na yalewa dautagane ka tu e matana.

¹⁷ A sa kaya e dua vei rau, “Kemuni na tui, keirau sa tiko vata na yalewa oqo ena dua na vale, ka'u a vakasucuma e dua na gonetagane mai vale, ka tiko talega kina o koya.

¹⁸ Ena i katolu ni siga ni oti na noqu vakasucu, sa vakasucuma talega o koya e dua na gonetagane. Keirau a tiko ruarua ga, ka sa sega tale ni dua e tiko e vale.

¹⁹ “A sa mate ena bogi na luvena na yalewa oqo, ni sa vakacalakataka ena nona bikai koya.

²⁰ A sa qai duri cake o koya ena lomaloma ni bogi ni'u sa moce koto, a sa kauta tani mai vei au na luvequ tagane, ka kauti koya yani ki na nona i mocemoce; a sa qai vakotora na luvena mate ena noqu i mocemoce.

²¹ Ia ni'u yadra cake ena mataka ka tarava me'u vakasucuma na luvequ, au sa raica ni sa mate tu. Ia ni'u raica vakavinaka, au qai kila ni sega ni luvequ.”

²² Ia sa qai kaya na yalewa kadua, “E sega! Na luvequ dina ga na gone ka se bula tiko, ka luvemu o koya sa mate!” A sauma lesu na i matai ni yalewa, ka kaya, “E sega! Sa luvemu ga o koya sa mate, ka luvequ o koya e se bula tiko!” E rau sa veiba vakaoqo e matana na tui.

²³ Sa qai kaya o Solomoni na tui, “Sa kaya o koya oqo, ‘Na luvequ oqo o koya sa bula, ka sa mate na luvemu’; ka sa kaya o koya o ya, ‘E sega! sa mate o luvemu ka se bula na luvequ.’ ”

²⁴ A sa qai kaya na tui, “Dou kauta mai vei au na i seleiwau.” Era a qai kauta mai vua na tui na i seleiwau.

²⁵ A sa qai vakarota na tui, “Dou musuka na gone ka se bula tiko me rua na kena i wasewase, ka solia e dua na kena veimama vua e dua, kei na i karua ni veimama vua tale e dua.”

²⁶ Ia na yalewa ka tinana dina na gone ka se bula tiko, ni sa tuburi koya na loloma levu me baleti luvena, a sa qai vosa vua na tui ka kaya, “Au sa kerekere vakabibi, oi kemuni na tui, mo ni kakua ni vakamatea na gone! Ni solia ga vua!” Ia sa kaya na yalewa kadua, “Ni kakua ni solia vua e dua vei keirau; ia ni musuka rua ga.”

²⁷ A qai sauma na tui ka kaya, “Dou kakua ni vakamatea na gone! Dou solia vua na i matai ni yalewa, ni sa tinana dina ga o koya.”

²⁸ Ni ra sa rogoca na Isireli na nona lewa vakaoqo na tui, era sa dokai koya vakalevu, baleta ni ra sa kila ni sa tu vua na vuku ni Kalou me vakatauca na lewa dodonu ka savasava.