1 Tui 22 - Vakavakadewa Vou kei na iVola tale eso

Parofisaitaki na Druka i Eapi kei Josefati

¹ A yabaki tolu na nodrau sega ni veivaluvaluti tiko o Siria kei Isireli.

² Ia ena i katolu ni yabaki, a lako sobu o Josefati na tui Juta vei koya na tui Isireli.

³ A sa kaya vei ira na nona tamata na tui Isireli, “O ni sa kila li ni sa noda o Remoci mai Kiliati? Ia eda sa galu ga ka sega ni la'ki taura mai ligana na tui Siria?”

⁴ A sa kaya o koya vei Josefati, “O na lako li vata kei au ki Remoci mai Kiliati me ia na i valu se segai?” A sa kaya vua na tui Isireli o Josefati, “Au sa vakarau tu oi au, ka vakakina o ira na noqu sotia kei na noqu mataivalu vodo ose.

⁵ Ia, me daru vakatarotaro taumada vei Jiova e liu.”

⁶ A sa vakasoqoni ira vata na parofita o Eapi, era sa volekata na 400 na kedra i wiliwili, ka tarogi ira, “Me'u lako sobu li ki Rimoci mai Kiliati ka la'ki vala kina, se me kua?” Era a kaya, “Mo ni valuta ga. Ena solia o Jiova vei kemuni na qaqa.”

⁷ Ia sa qai vakataroga o Josefati vakaoqo, “Sa sega tale ni tiko eke e dua na parofita i Jiova me daru taroga vua?”

⁸ A sa kaya vei Josefati na tui Isireli, “Sa vo tiko oqo e dua na tamata, o Maikaia na luve i Imila. Ia au sa cati koya oi au, baleta ni sa sega ni dau parofisaitaka na ka vinaka ena vukuqu, na ka ca ga.” A sa kaya o Josefati, “E sega ni dodonu mo ni tukuna vakaoqori!”

⁹ A qai kaciva e dua na turaga o koya na tui Isireli, ka kaya, “Mo kauti Maikaia mai vakatotolo na luve i Imila.”

¹⁰ E rau a dui tiko ena nodrau i tikotiko vakaturaga, na tui Isireli kei Josefati na tui Juta, ena rara ni matamata ni koro mai Samaria, e rau a vakaisulu tu ena i sulu vakatui; era a parofisai tiko e matadrau o ira kecega na parofita.

¹¹ A cakava o Setekaia na luve i Kinana eso na i leu ni manumanu caka ena kaukamea, ka kaya, “Sa vosa vakaoqo o Jiova, ‘O ni sa na cumuti ira tani na kai Siria ena ka oqo me yacova ni ra sa vakarusai kece.’ ”

¹² Era a parofisai vakakina na parofita kecega, ka kaya, “Mo ni lako cake ki Remoci, mai Kiliati, ka mo ni gumatua; ena solia o Jiova ki ligamuni na tui.”

¹³ A vosa vei Maikaia, na i talai ka la'ki kaciva, ka kaya, “Raica, sa duavata na nodra vosa na parofita, ni ra sa vosataka na ka vinaka vua na tui; me tautauvata mada na nomu vosa e dua vei ira, ka mo cavuta ga na ka vinaka.

¹⁴ A sa kaya o Maikaia, “Me vaka sa bula o Jiova, na ka ga sa kaya vei au, sai koya ga au na vosataka.”

¹⁵ Ia ni lako mai o Maikaia vua vei Eapi na tui, a kaya vua na tui, “I Maikaia, e dodonu li me keirau lako vata kei Josefati na tui ka la'ki valuti Remoci mai Kiliati, se me kakua?” A sa kaya vua o koya, “Mo ni lako cake, ka mo ni qaqa; ia ena solia o Jiova ki ligamuni na tui.”

¹⁶ Ia a kaya vua na tui, “Me'u vakabubuluitaki iko vakavica mada, mo tukuna kina vei au na ka dina taucoko ena yaca i Jiova?”

¹⁷ A sa kaya o Maikaia, “Au sa raici ira kecega na Isireli, ni ra sa veiseyaki ena veiulunivanua, me vaka na sipi sa sega na kedra i vakatawa; a kaya o Jiova, ‘Sa sega na nodra turaga o ira oqo; laiva me ra dui lesu ga ena vakacegu.’ ”

¹⁸ A sa kaya vei Josefati na tui Isireli, “Au sega li ni kaya vei iko ni na sega ni parofisaitaka o Maikaia na ka vinaka ena vukuqu, na ka ca ga?”

¹⁹ A sa kaya o Maikaia, “O koya oqo, mo rogoca kina na vosa i Jiova: Au sa raici Jiova ni sa tiko ena i tikotiko vakaturaga, era sa tiko voleka vua ena i matau kei na i mawi, o ira kecega na lewe i lomalagi.

²⁰ A sa taroga o Jiova, ‘O cei li ena temaki Eapi me rawa ni lako yani kina o koya me la'ki vakamatei i Remoci mai Kiliati?’ Era sa kaya eso na agilosi e dua na ka, ka ra kaya e dua tale na ka na kena vo,

²¹ me yacova na gauna sa cavuikalawa mai kina e dua na yalo ka mai tu ena mata i Jiova, ka kaya, ‘Au na temaki koya.’

²² A sa taroga o Jiova, ‘O na vakayacora vakaevei?’ A sauma lesu na yalo ka vaka, ‘Au na lako yani ka vakavuna me ra vosa lasu kece na parofita i Eapi.’ A sa kaya o Jiova, ‘Ia mo lako ga, ka temaki koya. O na rawati koya.’ ”

²³ Ia sa tinia vakaoqo o Mikaia: “Sai koya oqo na veika sa yaco. Sa vakavuna o Jiova me ra vosa lasu vei iko o ira na nomu parofita. Io sa vakataulewataka talega o koya ni o na sotava na veika rarawa o iko!”

²⁴ A sa qai toro voleka yani na parofita o Setekaia vei Maikaia ka sabica na matana, ka taroga, “Ena gauna cava sara mada sa lako tani mai kina vei au na yalo i Jiova, me vosa kina vei iko?”

²⁵ A sa sauma o Maikaia ka kaya, “Raica, o na qai vakadinata ga ni o sa curuma eso na rumu mo vunitaki iko kina.”

²⁶ A sa vakarota na nona tamata o Eapi na tui ka kaya, “Vesuki Maikaia, ka kauti koya yani vei Emoni na kovana ni koro levu, ka vakakina vei Joasa na luvena na tui.

²⁷ Tukuna vei rau me rau biuta na tamata oqo ki valeniveivesu, ka kanamusutaki koya ena madrai kei na wai me yacova na noqu lesu yani ena vakacegu.”

²⁸ A sa kaya o Maikaia, “Kevaka o ni na lesu dina mai ena vakacegu, ia sa qai sega dina ga ni vosa vei au o Jiova!” A sa kaya tale o koya, “Mo ni rogoca na noqu vosa oqo na tamata kecega!”

Na Mate i Eapi

²⁹ E rau a lako cake me la'ki valuta na koro levu o Remoci mai Kiliati o Eapi na tui Isireli kei Josefati na tui Juta.

³⁰ A sa kaya o Eapi vei Josefati, “Au na vakaisulu vakalecaleca, ia o iko mo tokara ga na nomu i sulu vakatui.” Ena ka oqo, a sa lako vakavuni kina na tui Isireli ki na i valu.

³¹ A sa vakaroti ira na lewe 32 na nona turaganivalu ni qiqi vakaivalu o tui Siria me ra kakua ni vala kei na dua tale, ia me valuti duadua ga o tui Isireli.

³² Ia ni ra sa raici Josefati o ira na turaga ni qiqi vakaivalu, era sa nanuma ni sai koya ga oqo na tui Isireli, ka ra sa golevi koya me ra vala kaya. Ia sa qoqolou o Josefati,

³³ ka ra qai liaca o ira na turaga ni qiqi vakaivalu ni sega ni o koya na tui Isireli, ka muduka kina na nodra sasaga.

³⁴ Ia, a sa dua na tamata sa vanataka vakailoa ga na nona dakaititi ka mani lauta na tui Isireli ena vanua a sema kina na nona i sulu ni valu. A sa kaya kina vua sa vakauta tiko na nona qiqinivalu, “Au sa mavoa vakaca! Me daru vuki lesu ka dro tani yani mai na i valu!”

³⁵ Ni sa toso tiko na katakata ni valu ena siga o ya, a sa vakaduri cake tikoga o Eapi na tui ena nona qiqi vakaivalu ka vakanamata vei ira na kai Siria. A sa dave na dra mai na nona mavoa ki na buturara ni qiqi vakaivalu, ka sa mate ena kena yakavi.

³⁶ Ni vakarau dromu na matanisiga, a sa kacivaki yani vei ira na lewe ni mataivalu ni Isireli: “Ni suka na tamata yadua ki na nomuni koro kei na tamata yadua ki na nona vanua!”

³⁷ A sa mate na tui Isireli, ka kau ki Samaria na yagona me la'ki bulu kina.

³⁸ A sa savui na nona qiqi vakaivalu ena mata ni wai mai Samaria, ena tikina ka ra dramica kina na koli na dra ni tui, ka ra silima o ira na dauvolitaka na yagodra, me vaka na dina ni vosa i Jiova.

³⁹ Ia na vo ni cakacaka i Eapi kei na ka kecega a cakava o koya, ka okati kina na nona a tara na valenitui sa ukucavutaki ena ivori kei na veikoro kece sara sa volai ena i Vola ni Veika sa Caka ena nodra Veigauna na Tui Isireli.

⁴⁰ Ni sa mate o Eapi, a sa sosomitaki koya me tui o Esaia na luvena.

O Josefati na Tui Juta

⁴¹ A sa tekivu liutaki ira na Juta o Josefati na luve i Asa ena i kava ni yabaki i Eapi na tui Isireli.

⁴² Ni sa yabaki 35 o Josefati, a sa veiliutaki e Jerusalemi me 25 na yabaki. Na yaca i tinana o Asupa, na luve i Sili yalewa.

⁴³ A sa muria o koya na i valavala kecega i Asa na tamana ena nona cakava na ka e dodonu ena mata i Jiova; ia sa sega ga ni vakacacani na veitikina cecere ni qaravi kalou tani, ka ra sa tomana tikoga na tamata na nodra vakacaboisoro kei na nodra vakama na veika boi vinaka ena veivanua oqori.

⁴⁴ E rau a tiko veisaututaki o Josefati kei na tui Isireli.

⁴⁵ Ia na vo ni cakacaka i Josefati, na nona qaqa, kei na nona i valu sa volai ena Kedra i Vola Tukutuku na Tui Juta.

⁴⁶ A sa vakawabokotaki ira na tagane kei na yalewa era dauvolitaka na yagodra ena vuku ni i tovo vakasisila, o ira na vo-ni-bula ena veiqaravi vakabete ni burekalou ka ra se tiko ga mai ni sa oti na veiliutaki i Asa na tamana.

⁴⁷ A sega ni dua na tui mai Itomi; ia a lesi ga e dua me i vukevuke ni tui.

⁴⁸ A cakava eso na waqa ni Tasisi o Josefati, me soko ki Oferi me usa koula mai kina; ia era a sega ni soko kina, ni ra a la'ki voca na veiwaqa mai Esionikeperi.

⁴⁹ A qai kaya vei Josefati o Esaia, na luve i Eapi, “Me ra soko vata ga o ira na noqu tamata kei ira na nomu tamata ena waqa,” ia a bese o Josefati.

⁵⁰ A mate, moce ka bulu kei ira na nona qase o Josefati ena koro i Tevita na nona i tubutubu; a tui o Jiorami na luvena, me kena i sosomi.

O Esaia na Tui Isireli

⁵¹ Ena i katini kavitu ni yabaki i Josefati na tui Juta, a tekivu me veiliutaki vei ira na Isireli mai Samaria, o Esaia na luve i Eapi, a veiliutaki tiko me tui vei ira na Isireli, me yabaki rua.

⁵² A dau i valavala ca ena mata i Jiova o Esaia, ka muria na i valavala ca i tamana, kei tinana, kei na i valavala ca i Jeropoama na luve i Nipati, o koya a vakaivalavalacataki ira na Isireli.

⁵³ Me vakataki tamana ga, a sa vakacudrui Jiova na Kalou ni Isireli ni sa dau ia ga na sokalou kei na veiqaravi vei Peali.