1 Tui 21 - Vakavakadewa Vou kei na iVola tale eso

Na Loganivaini i Nepoci

¹ A sa dua na loganivaini i Nepoci na kai Jesireli, ka toka voleka ki na i tikotiko vakatui i Eapi na tui Samaria.

² Ena dua na siga, sa qai vosa vei Nepoci o Eapi, ka kaya, “Mo solia vei au na nomu i teitei loganivaini; ni sa tiko volekata na noqu vale oqo ka'u vinakata me'u vakayagataka na qele me teivaki kina na kequ kakana draudrau. Au na qai solia vei iko e dua na i teitei loga vaini vinaka cake sara me kena i sosomi, se volia vakailavo vei iko kevaka o vakadonuya me vakakina.”

³ A sa kaya vei Eapi o Nepoci, “Sa vakatabuya o Jiova me'u solia vei iko na nodra i votavota na noqu qase.”

⁴ A sa lesu ki na nona vale o Eapi ena yalobibi kei na cudru baleta na veika sa kaya vua o Nepoci na kai Jesireli. A sa davo sobu o Eapi ena nona i davodavo, a sa vuki tu vaka ki na lalaga, ka bese ni kana.

⁵ A sa lako yani vua o Jesipeli na watina, ka kaya vua, “A cava sa rui rarawa kina na lomamu? A cava na vuna na nomu sega tiko kina ni kana?”

⁶ A sa kaya vua o Eapi, “Baleta na veika e tukuna vei au o Nepoci na kai Jesireli. Au a vakaraitaka vua na noqu via volia na nona loganivaini, se me'u vakaisosomitaka ena dua tale; ia, sa qai tukuna lesu mai vei au ni'u sega ni rawa ni taukena.”

⁷ A sa kaya vua o Jesipeli na watina, “O sega li ni lewai Isireli tiko edaidai? Mo tucake, kana, me marau na yalomu, au na solia vei iko na loganivaini i Nepoci na kai Jesireli.”

⁸ A vola o Jesipeli e vica vata na i vola ena yaca i Eapi, a sa dregata ka tabaka ena nona sitaba ni matanitu, ka vakauta na i vola vei ira na qase kei na turaga ka ra tiko kei Nepoci ena nona koro.

⁹ Sa vakaoqo na veika sa toqai ena i vola o ya, “Ni kacivaka raraba me dua na siga ni lolo, ka me ra soqoni vata mai na tamata, ka me vakatikori o Nepoci ena tikina cecere vei ira na tamata.

¹⁰ Me qai vakacurumi mai e rua na daunivakacaca me rau dabe veibasai kei koya ka beitaki koya ni a vosa vakacacataka na Kalou kei na tui. Ni oti o ya, mo ni qai kauti koya yani ki na i bili, ka vakavirika ena vatu me mate sara kina.”

¹¹ Ia o ira na lewe ni koro i Nepoci, na qase kei na tamata turaga era tiko ena nona koro, era a cakava me vaka a talatala kina vei ira o Jesipeli, ka me vaka a volai ena i vola a vakauta vei ira o koya.

¹² Era a qai kacivaka raraba e dua na lolo, ka vakatikori Nepoci ena tikina cecere vei ira na tamata.

¹³ E rau a curu yani kina e lewe rua na tamata, e rau a veidonui kaya, ka rau beitaki Nepoci e matadra na tamata, ka rau kaya, “Sa vosa vakacacataka na Kalou, kei na tui o Nepoci.” Era a qai kauti koya ki na i bili ni koro, ka vakaviriki koya ena vatu, a mate kina o koya.

¹⁴ Era a qai talatala vei Jesipeli ka kaya, “Sa laulauviri ena vatu o Nepoci, ka mate kina o koya.”

¹⁵ Ia ni rogoca o Jesipeli ni a laulauviri ena vatu o Nepoci, ka mate kina, a qai kaya vei Eapi o koya, “Mo la'ki taukena na loganivaini i Nepoci, na kai Jesireli, ka a bese ni solia vei iko me kena i sau na i lavo; ni sa sega ni bula tiko o Nepoci, ka sa mate.”

¹⁶ Ia ni rogoca o Eapi ni sa mate o Nepoci, a qai lako sobu o koya ki na loganivaini i Nepoci na kai Jesireli, me taukena.

Sa Vakatauca na Lewa ni Kalou o Ilaijia

¹⁷ A yaco mai vei Ilaijia na kai Tisipa, na vosa i Jiova, ka vaka,

¹⁸ “Mo cavutu, lako sobu ka tavaki Eapi na tui Isireli, sa tiko mai Samaria; raica, sa tiko o koya ena loganivaini i Nepoci, na vanua me la'ki taukena.

¹⁹ Ia mo vosa vua ka kaya, ‘Sa vosa vakaoqo o Jiova: “Ena vanua era dramica kina na dra i Nepoci na koli, era na dramica vaka talega kina na nomu dra na koli, io, na nomu dra.’ ”

²⁰ A sa kaya vei Ilaijia o Eapi, “O sa kunei au beka, o iko, na kequ meca?” A sa kaya o koya, “Io, au sa kunei iko, ni o sa volitaki iko mo i valavala ca ena mata i Jiova.

²¹ Raica, au na vakayacora na ca vei iko, au na taviraki iko tani vakadua, ka'u na muduka tani mai vei Eapi na tagane kecega, se o koya sa vesuki tu, se galala, vei ira na Isireli.

²² Ia au na cakava na nomu mataqali me tautauvata kei na mataqali i Jeropoama, na luve i Nipati, ka tautauvata kei na mataqali i Pasa na luve i Eaija, ena vuku ni nomu i valavala ca ka sa vakacudrui au kina, ka vakaivalavalacataki ira kina na Isireli.

²³ Ia ena vuku i Jesipeli, sa vosa kina o Jiova, ka kaya, ‘Ena kani Jesipeli o ira na koli mai na bai kei Jesireli.’

²⁴ O koya a mate ena koro, era na kania na koli; kei koya sa mate ena lomanivanua, era na kania na manumanu vuka.

²⁵ Ia sa sega ni dua me tautauvata kei Eapi, me volitaki koya me valavala ca ena mata i Jiova, o koya a vakauqeta o Jesipeli na watina.

²⁶ A cakava na veika vakasisila sara o koya, ni muria na veimatakau, me vaka era a cakava kecega na Amoraiti, o ira a vakasevi ira o Jiova e matadra na Isireli.

²⁷ Ia ni rogoca o Eapi, a dresulaka na nona i sulu, vakaisulutaki koya ena i sulu taga, lolo voli, ka lako voli me vaka na tamata yalo rarawa.

²⁸ A yaco na vosa i Jiova vei Ilaijia na kai Tisipa, ka kaya,

²⁹ “O sega li ni raica na nona vakamalumalumutaki koya voli o Eapi vei au.” Au na sega ni vakayacora na ka ca ena nona gauna; ia ena gauna ga nei luvena, au na vakayacora kina na ka ca vei ira na nona mataqali.”