1 Tui 20 - Vakavakadewa Vou kei na iVola tale eso

Na i Valu kei Siria

¹ A vakasoqoni ira vata kecega na nona mataivalu o Penietati na tui Siria; era a lewe tolusagavulu karua na tui era tiko kaya, na ose, kei na qiqinivalu; a lako cake o koya me buku na druadrua kei Samaria, me vala kina.

² A tala o koya eso na tamata ki na loma ni koro vei Eapi na tui Isireli, a kaya vua, “Sa vosa vakaoqo o Penietati,

³ ‘Sa noqu na nomu siliva kei na koula; sa noqu o iratou na watimu kei na luvemu, io, o ira sa vinaka sara vei ira.’ ”

⁴ A vosa na tui Isireli, ka kaya, “Me vaka na nomu vosa noqu turaga na tui, o au kei na veika kecega sa noqu, sa nomu ga.”

⁵ Era a lako tale mai na tamata, ka kaya, “Sa vosa vakaoqo o Penietati, ka kaya, ‘Au a talai yani vei iko, ka kaya, “Mo solia mai vei au na nomu siliva kei na nomu koula, kei iratou na watimu kei na luvemu;

⁶ ia au na talai ira yani na noqu tamata ena gauna vata ga oqo ni mataka, me ra vaqaqara ena nomu loma ni vale, kei na nodra veivale na nomu tamata; ia era na taura na ka kecega e vinaka ka kauta mai.’ ”

⁷ A qai kacivi ira kecega na qase ni vanua, na tui Isireli, ka kaya vei ira, “Mo ni kila mada, ka raica ni sa nakita na ka ca na tamata oqo o Penietati; ni na tala vei au me nona o iratou na watiqu, o iratou na luvequ, na noqu siliva, kei na noqu koula, ia au na sega ni bureitaka vua.”

⁸ Era a kaya vua o ira kecega na qase kei ira na tamata kecega, “Mo kakua ni vakarorogo vua, se vakadonuya.”

⁹ A sa kaya o koya vei ra na tamata i Penietati, “Mo dou tukuna vua na noqu turaga na tui, ‘A ka kecega o talatala mai kina vei au na nomu tamata, au na cakava; ia na ka oqo, au na sega ni cakava.” A lako yani na tamata talai ka tukuna tale vua na nona vosa.

¹⁰ A talatala tale vua o Penietati, ka kaya, “Me cakava vaka kina vei au o ira na kalou, ka vakaikuritaka, kevaka sa levu na kuvu ni soso e Samaria, me rauti ira me ra yakuta na tamata kecega ka muri au.”

¹¹ A sa kaya na tui Isireli, “Dou tukuna vei Penietati na tui ni o koya na sotia dina sai koya e dau qai tukutukuni koya ga ni sa oti na i valu, ka sega ni se bera na i valu.”

¹² Ia ni rogoca na vosa oqo o Penietati, ni a gunu tiko kei ira na tui ena vale vakacevaceva, a kaya vei ira na nona tamata, “Ni vakarau.” Era a vakarau me ra kaba koro.

¹³ Raica, a toro mai vei Eapi na tui Isireli e dua na parofita, ka kaya, “Sa vosa vakaoqo o Jiova, O sa raici ira na lewe vuqa kecega oqo, se segai? Raica, au na soli ira ki na ligamu edaidai; ia o na qai kila kina ni sai au o Jiova.”

¹⁴ A taroga o Eapi, “Ena liga i cei?” A sa kaya o koya, “A vosa vakaoqo o Jiova, E ligadra na nodra tamata na kovana ni veitikina.” A sa kaya o Eapi, “O cei ena tekivuna na i valu?” A sauma o koya, ka kaya, “O iko.”

¹⁵ A soqoni ira vata na nodra tamata na kovana ni veitikina o koya, ka ra lewe dua na drau tolusagavulu karua; ka oti a qai wiliki ira kecega na tamata e Isireli, era a lewe vitu na udolu.

¹⁶ Era a curu yani ni sa siga levu tutu. A gunu tiko o Penietati, ka sa mateni ena vale vakacevaceva kei ira na lewe tolusagavulu karua na tui ka ra to vata kaya.

¹⁷ Era a curu yani e liu na nodra tamata na kovana ni veitikina. A tala eso na tamata o Penietati, ka ra la'ki tukutuku vua, ka kaya, “Era sa lako tiko mai Samaria o ira na tamata.” A kaya o koya,

¹⁸ “Kevaka era lako mai ena veisaututaki, me ra vesu bula; ia kevaka era lako mai me ra mai vala, ia me ra vesu bulabula talega.”

¹⁹ A curu tani mai na koro o ira na tamata ni kovana ni veitikina, ka muri ira na mataivalu.

²⁰ Era a dui mokuta na tamata na kedra i sa na tamata yadua; e ra a dro na kai Siria, era a cici muri ira na Isireli; ia a dro bula o Penietati na tui Siria ni a vodo ose, kei ira na dauvodo ose.

²¹ A curu yani o Eapi na tui Isireli ka tauri ira vakavesu na ose kei na qiqinivalu, ka ravuti ira vakaloloma na kai Siria.

²² A sa lako na parofita vei Eapi na tui Isireli ka kaya vua, “Mo lesu tale ka vakarautaka vinaka tale na nomu mataivalu, ka lewa vinaka na veika mo cakava baleta ni na valuti kemuni tale o tui Siria ena vula i tubutubu.”

Ai Karua ni Kaba Vakaivalu nei Siria

²³ Era a vosa vua na tui Siria na nona tamata, ka kaya, “Sa kalou ni veiulunivanua na nodra kalou, ka vakavuna oqo me ra vakadrukai keda kina o ira na Isireli. Ia eda rawa ni vakadrukai ira kevaka eda veivala ena vanua bucabuca.

²⁴ A veika oqo mo ni vakayacora: Mo ni kauti ira tani na tui, mai na nodra i tutu, ka lesi ira na kavetani ni valu me kedra i sosomi.

²⁵ Ia mo ni soqona vata e dua na mataivalu me vaka na kena ka sa yali, na ose me tautauvata na kena levu, ka vakakina na qiqi ni valu me tautauvata kei na kena levu e liu; ia me da qai vala vata kei ira ena buca, ka da na qai gumatua cake mai vei ira.” A vakarorogo o tui Siria ki na nodra vosa, ka kitaka vakakina.

²⁶ Ia ena vula i tubutubu, ena yabaki ka tarava, a qai soqoni ira vata na kai Siria o Penietati, ka lako cake ki Efeki me valuti ira na Isireli.

²⁷ Era a soqoni na Isireli, ka ra kauta na kedra i vaqa, ka lako yani me vala kei ira; era a la'ki tiko vakaivalu e matadra na Isireli me vaka e rua na qele ni me lalai; ia era a robota na vanua na kai Siria.

²⁸ A lako voleka yani vua na tui Isireli, e dua na tamata ni Kalou, ka kaya, “Sa kaya vakaoqo o Jiova, ‘Ena vuku ni nodra kaya na kai Siria, Ni sa Kalou ni veiulunivanua o Jiova, ka sega ni Kalou ni veibuca, au na qai soli ira kecega na lewe vuqa ki na ligamu, mo ni kila kina ni sai au o Jiova.’ ”

²⁹ Era a tiko vakaivalu, ka veiqaravi tiko me siga vitu. Ia ena i kavitu ni siga, a qai tekivu na i valu; era a mokuti ira na kai Siria na Isireli, era lewe dua na drau na udolu na tamata i valu cavu yava ena duabau ga na siga.

³⁰ Era sa qai dro o ira na kena vo ki na koro o Efeki, ka sa baleti ira yani na bainikoro, a kedra i wiliwili e 27,000. A sa dro talega o Penietati ka curu ki na koro, ka la'ki vuni toka ena rumu sara e muri ni dua na vale.

³¹ Era a kaya vua na nona tamata, “Keitou sa rogoca oti ni ra sa dauyalololoma na tui ni veimataqali ni Isireli. Ni solia mada na veivakadonui me keitou la'ki raica na tui Isireli ka me vauci na tolo i keitou ena i sulu taga ka me vesu na domo i keitou ena dali, de qai rawa beka ni vakabulai kemuni o koya.”

³² Era a sulumaka na i sulu taga e tolodra, ka vesuka na dali ki domodra, ka lako yani vua na tui Isireli ka kaya, “Na nomuni tamata o Penietati sa vakamamasu yani vei kemuni me kune loloma ka bula.” A sa kaya na tui Isireli, “Oi, e se bula tikoga o koya? Sa vinaka! Sa vaka ga e taciqu o koya.”

³³ Era a namaka tiko na vakailesilesi i Penietati me dua na i vakatakilakila vinaka me basika mai; ni gauna ga e tukuna kina o Eapi na vosa “taciqu”, eratou sa cakacaka sara e kea ka kaya, Me vaka o ni sa kaya, “Io, na tacimuni o Penietati.” A sa kaya o Eapi na tui, “Dou la'ki kauti koya mai.” A sa lako yani vua o Penietati; a kaya vua me vodo ena nona qiqinivalu.

³⁴ A sa kaya vua o Penietati. “Na veikoro ka kauta tani o tamaqu mai vei tamamu, au na vakasuka; me vaka sa cakava o tamaqu mai Samaria.” A mai cakava yani e dua na nodrau veiyalayalati, ka sereki koya me lako yani.

³⁵ A sa dua na tamata mai vei ira na luve ni parofita, a kaya vua e dua na kai nona ena i vakaro i Jiova, ka vaka, “Au masuti iko mo vakamavoataki au mada.” A bese ni vakamavoataki koya na tamata o ya.

³⁶ A sa kaya vua o koya, “Ni o sega ni muria na vosa i Jiova, raica, ni o sa lako tani mai vei au, ena vakamatei iko e dua na laione.” Ia ena gauna ga sa lako yani kina, a sa lako mai e dua na laione ka vakamatei koya.

³⁷ A sa qai lako yani na parofita vata ga oqo ki vua e dua tale na tamata, ka kaya, “Mokuti au mada!” A sa vakayacora vakakina na tamata o ya, ni sa mokuti koya vakaukauwa ka vakamavoataki koya.

³⁸ A sa vadretitaka na matana o koya na parofita me vakalecaleca tu kina, ka la'ki tavaka na tui Isireli ena tutu ni sala.

³⁹ Ia ni lako siviti koya na tui, a sa kacivaka yani vua na parofita, “Kemuni na tui, au a valu tiko ena loma ni veivaluvaluti ka qai kauta mai na sotia e dua na meca sa vesu tu, ka kaya vei au, ‘Mo raici koya tiko na tamata oqo; ia kevaka ena mani dro, o na mate o iko me kena i sau, se mo sauma e 3,000 na tiki ni siliva.’

⁴⁰ Ia ka'u a osooso vakalevu na nomuni tamata, ka mani dro yani kina o koya.” A sa kaya vua na tui Isireli, “O sa vakavuna ga vakataki iko na nomu leqa oqo, ka mo na sotava vakaidina kina na kemu i totogi.”

⁴¹ A sa ia na parofita ka luvata tani na i vadreti mai matana. Sa qai kilai koya na tui Isireli, ni sa dua vei ira na parofita.

⁴² A sa kaya na parofita vua na tui, “Sa vosa vakaoqo o Jiova, ‘Ena vuku ni nomu sa laiva me dro na tamata au a lesia me vakamatei, o na cola na kena i sau ni na tauri na nomu bula ena vukuna, ka na vakarusai na nomu mataivalu ena vuku ni nomu laiva me ra dro na nona mataivalu.”

⁴³ A sa lako yani ki na nona vale na tui Isireli ena lomabibi kei na yalo ca, ka lesu ki Samaria.