1 Tui 2 - Vakavakadewa Vou kei na iVola tale eso

Tatau vei Solomoni o Tevita

¹ Ni roro voleka mai na siga me mate kina o Tevita, a sa qai tatau vei Solomoni na luvena, ka kaya,

² “Au sa na lako ena sala era na lakova kece na kai vuravura. Mo kaukauwa ka qaqa,

³ ka talairawarawa ki na veika sa vakarota o Jiova na nomu Kalou. Mo muria na nona lawa kei na i vakaro kece sara, me vaka sa volai ena Lawa i Mosese, me rawa ni o rawata vinaka na veika kece sara o qarava ena veivanua kece o gole kina.

⁴ Ena qai vakataudeitaka o Jiova na nona vosa sa tukuna oti vei au, ni a kaya, ‘Kevaka era na raica vinaka na nodra i valavala o ira na luvemu, me ra lako e mataqu ena yalodina kei na lomadra taucoko kei na vu ni yalodra taucoko, ena sega ni muduki na nomu kawa me dabe ena i tikotiko vakatui e Isireli.’

⁵ “Ia o sa kila talega na ka sa kitaka vei au o Joape na luve i Seruwaia ena nona a vakamatea e rua na turaganivalu ni Isireli, o ya o Epineri na luve i Neri kei Amasa na luve i Jica. O na nanuma vinaka ni a vakayacori na veivakamatei oqo ena gauna ni veisaututaki ena vuku ni kena saumi lesu na nodrau a veivakamatei na turaganivalu ena gauna ni veivaluvaluti. Ena ka oqo, sa vakamatea kina o koya e rua na tamata tawa cala, ka'u sa ciqoma na kena veibeitaki oi au, ka sotava kina na kena leqa.

⁶ Sa matata vei iko na ka mo vakayacora; mo kakua ni vakatara me mate ga vakadodonu o koya.

⁷ “Ia mo caka vinaka ena yalodina vei iratou na luve i Basiliai na kai Kiliati, ka me ratou tiko kei ira era kana mai na nomu teveli, baleta ni ratou a caka vinaka vei au ena gauna ka'u a dro voli kina mai vei Apisalome na tuakamu.

⁸ “Raica, e tiko talega vata kei iko o Semeai na luve i Kira mai na koro o Peurimi ena vanua o Penijamini. A sa rukaki au vakaca sara o koya ena siga ka'u a lako kina ki Meneimi; ia, ena nona a sotavi au mai na Uciwai na Joritani, au a qai bubului vua ena yaca i Jiova, ka kaya, ‘Au na sega ni vakamatei iko ena i seleiwau.’

⁹ Ia kakua ni vakatara o iko me lako yani ena galala ka sega ni totogitaki. O sa na kila ga na ka mo vakayacora, ni sa nomu i tavi mo raica na nona vakamatei.”

Na Mate i Tevita

¹⁰ A sa mate o Tevita, ka sa la'ki bulu ena Koro i Tevita.

¹¹ A sa 40 taucoko na yabaki na dede ni nona veiqaravi vakatui e Isireli, ni sa veiliutaki e Epironi me yabaki vitu ka 33 na yabaki mai Jerusalemi.

¹² Sa qai sosomitaki Tevita na tamana o Solomoni ena i tikotiko vakaturaga, ka sa vakataudeitaki na nona veiliutaki vakatui.

Na Mate i Atonaija

¹³ A sa qai lako yani o Atonaija na luve i Akici vei Vaciseva na tina i Solomoni. A sa taroga sara o Vaciseva, “O sa lako mai vakasavasava, se segai?” A sa sauma o koya, “Io, au sa lako mai vakasavasava.”

¹⁴ A sa qai kaya tale o koya, “E dua na ka au via taroga tiko vei iko.” A taroga lesu o Vaciseva, “Na cava o ya?”

¹⁵ A qai kaya o koya, “O sa kila vinaka ni a dodonu me'u a buli me tui, ka ra sa nanamaki tu kina na vanua taucoko o Isireli. Ia, sa qai sega ni vakakina, ka sa yaco me tui na taciqu, baleta ni sa lewa vakaoqo o Jiova.

¹⁶ Ia oqo, sa dua bulu ga na ka au sa kerea vei iko, mo kakua ni bureitaka vei au.” A taroga lesu o Vaciseva, “Na cava o ya?”

¹⁷ A sa kaya o Atonaija, “Au kerea mo la'ki vosa mada vei Solomoni na tui, ka'u kila ni na sega ni bureitaka vei iko; o ya me soli Avisaki vei au, o koya na yalewa ni Sunemi, me watiqu.”

¹⁸ A sa kaya o Vaciseva, “Sa vinaka, au na vosa vua na tui ena vukumu.”

¹⁹ A lako o Vaciseva vei Solomoni na tui me la'ki vosa vua ena vuku i Atonaija. A tucake na tui me la'ki tavaki koya, ka cuva vua, ka tiko sobu ena nona i tikotiko vakaturaga, ka solia e dua na i dabedabe me dabe kina na marama tinana; a qai dabe o koya ena yasana i matau.

²⁰ A sa kaya o Vaciseva, “E dua na kerekere lailai au kauta tiko mai vei iko; au kerea mo kakua ni bureitaka vei au.” A taroga lesu na tui, “I Tinaqu, na cava o ya? Au na sega ni bureitaka vei iko.”

²¹ A sa kaya o Vaciseva, “Me soli o Avisaki na yalewa ni Sunemi vei Atonaija na tuakamu me watina.”

²² A sa tarogi tinana lesu o Solomoni na tui ka kaya, “A cava na vuna o sa kerea kina na yalewa ni Sunemi o Avisaki me nei Atonaija? E vakacava mo sa kerea talega na i tutu vakatui me sa nona! O koya na tuakaqu; de vinaka mo sa kerea talega na veika me baleti Epaiaca na bete kei Joape na luve i Seruwaia e ratou to vata mai na yasana kadua!”

²³ A sa vosa bubului o Solomoni ena yaca i Jiova, ka kaya, “Me qai vakamatei au na Kalou kevaka au sega ni sauma lesu na cala levu oqo vei Atonaija me mate o koya ena vuku ni ka sa kerea oqo!

²⁴ Ia oqo, me vaka sa bula o Jiova, o koya sa vakataudeitaki au ka vakatikori au ena i tikotiko vakaturaga i Tevita na tamaqu, ka solia vei au e dua na kawa me vaka sa yalataka o koya, ena vakamatei edaidai o Atonaija!”

²⁵ A sa qai talai Penaia na luve i Jioiata yani o Solomoni na tui; ka sa mokuti koya mate.

Na Vakatalai i Epaiaca kei na Mate i Joape

²⁶ A vosa vei Epaiaca na bete o koya na tui, ka kaya, “Mo lako tani ki Anacoci, ki na nomu vanua; ni sa dodonu mo mate. Ia au na sega ni vakamatei iko edaidai, ni o sa colata voli na Kato ni Veiyalayalati i Jiova ena mata i Tevita na tamaqu, ka o vakaivotavota vata kaya ena veika kecega ka vakararawataki kina.”

²⁷ A sa vakasavi Epaiaca o Solomoni me kakua tale ni veiqaravi vakabete vei Jiova; oqo me vakayacori kina na vosa i Jiova me baleta na vuvale vakabete nei Ilai mai Sailo.

²⁸ A sa rogoca o Joape na veika sa yaco oqo. (A solia na nona veitokoni vei Atonaija o koya, ka segai vei Apisalome.) Sa qai dro yani o Joape ki na vale tabu i Jiova, ka la'ki kubeta na muana momoto ena i tutu cecere e cake ni cabocabonisoro.

²⁹ Ni sa yacovi Solomoni na tui na i tukutuku me baleta na dro nei Joape ki na vale tabu i Jiova ka toka volekata na i cabocabonisoro, a sa talai Penaia na luve i Jioiata o Solomoni, ka kaya vua, “Lako, ka la'ki mokuti koya mate.”

³⁰ A sa lako ki na vale tabu i Jiova o Penaia, ka kaya vei Joape, “Sa vakarota na tui mo lako tani mai tuba.” A sa kaya o Joape, “E segai; au na mate ga eke.” A sa lesu tale o Penaia vua na tui ka vakadewataka na vua na vosa i Joape.

³¹ A sa kaya vua na tui, “Mo cakava ga na ka sa tukuna o Joape. Vakamatei koya ka la'ki buluti koya. Oqo ena vakavuna me'u vagalalataki kina kei ira na kawa i Tevita na tamaqu mai na i vesu ni ca ka vakayacora o Joape ena nona vakadavea na dra ni tamata tawa cala.

³² Ena totogitaki Joape o Jiova ena vuku ni veivakamatei oqo sa vakayacora ka sega ni a kila taumada o Tevita na tamaqu. A vakamatea o Joape e lewe rua na tamata tawa cala ka rau vinaka cake sara mai vua: o ya o Epineri na luve i Neri ka komada ni mataivalu ni Isireli, kei Amasa na luve i Jica ka komada ni mataivalu ni Juta.

³³ Na veisausaumi ni dra me baleta na nodrau vakamatei ena tau vei Joape kei ira na nona kawa me tawamudu. Ia ena tiko ga na vakacegu kei na sautu i Jiova ki na kawa i Tevita sa dabe tiko ena nona i tikotiko vakatui.”

³⁴ Sa qai lako cake o Penaia na luve i Jioiata ki na Vale i Jiova ka vakamatei Joape; a sa buluti koya ena nona vale ga sa volekata na vanua lala.

³⁵ A sa lesi Penaia o Solomoni na tui me komada ni mataivalu, me i sosomi kei Joape, ka sa lesi o Setoki na bete me i sosomi kei Epaiaca.

Na Mate i Semeai

³⁶ A sa talatala na tui me kacivi o Semeai, ka sa kaya vua, “Mo tara e Jerusalemi e dua na nomu vale mo tiko kina, ka mo kakua ni lako tani mai kea ki na dua tale na vanua.

³⁷ Kevaka o na lako yani ena dua na siga ka qalo kosova na uciwai o Kitironi, ia mo kila deivaki sara kina ni o na mate vakaidina; ia na nomu mate oqo sa na baleti iko ga.”

³⁸ A sa kaya o Semeai vua na tui, “Kemuni na tui, e sa donu vakavinaka oqori. Au na vakayacora na veika o ni sa vosa kina.” A sa tiko kina vakadede mai Jerusalemi o Semeai.

³⁹ Ia ni oti e tolu na yabaki, e rau a qai dro e lewe rua na tamata bobula i Semeai vua na tui Kaca o Akisa, na luve i Meka. Ni sa rogoca o Semeai na nodrau sa tiko mai Kaca na nona bobula,

⁴⁰ a sa ia o Semeai ka vakarautaka na nona asa, ka lako yani ki Kaca vei Akisa na tui, me qarai rau na nona bobula. A sa kunei rau ka kauti rau mai lesu tale mai ki na nona vale.

⁴¹ Ia ni sa tukuni vei Solomoni ni sa lako o Semeai mai Jerusalemi ki Kaca ka lesu tale mai,

⁴² a sa talatala me kacivi mai o Semeai, ka kaya vua, “Au a sega li ni vakabubuluitaki iko ena yaca i Jiova, ka vakarota vei iko ka kaya, ‘Mo kila deivaki sara ni o na mate vakaidina ena siga ga o lako tani kina, ka lako ki na dua ga na vanua? Ia o a kaya vei au, “Sa donu vakavinaka oqori; au na vakayacora na nomuni vosa.”

⁴³ A cava oqo o sa sega kina ni muria na nomu bubului vei Jiova, kei na i vakaro ka'u a vakarota vei iko?”

⁴⁴ A sa kaya tale vei Semeai na tui, “O sa kila na ka ca kecega sa tu e lomamu, na ka ca o a kitaka vei Tevita na tamaqu. Ena ka oqo, ena totogitaki iko kina o Jiova.

⁴⁵ Ia ena vakalougatataki au o koya ka vakataudeitaka e matana na i tikotiko vakatui i Tevita ka tawamudu.”

⁴⁶ A vakarota na tui vei Penaia, na luve i Jioiata, me lako yani, ka mokuti koya mate. Ena ka oqo, a sa qai taucoko na kena vakataudeitaki na matanitu ena liga i Solomoni.