1 Tui 16 - Vakavakadewa Vou kei na iVola tale eso

¹ A sa yaco na vosa i Jiova vei Jeu na luve i Anani ena vuku ni tovo nei Pasa, ka vaka,

² “Me vakatekivu mai na noqu a laveti iko cake mai na kuvu ni qele, ka lesi iko mo i liuliu vei ira na noqu tamata na Isireli, o sa qai muria voli ga na i tovo i Jeropoama, ka vakaivalavalacataki ira na noqu tamata na Isireli. Sa vakacudrui au sara na nodra i valavala ca,

³ o koya oqo ka'u na kauti iko laivi kina kei na nomu matavuvale, me vaka ga na ka au sa vakayacora oti vei Jeropoama.

⁴ Na lewe ni nomu vuvale era sa mate ena loma ni koro era na kania na koli, kei ira era sa mate ena taudaku ni koro era na kania na vulituri.”

⁵ Ia na vo ni cakacaka i Pasa, kei na ka a cakava o koya, kei na nona kaukauwa, a sega li ni volai ena i Vola ni Veika a Caka ena nodra Veigauna na tui Isireli?

⁶ A mate ka moce kei ira na nona qase o Pasa, a bulu mai Tirisa; a tui o Ela me kena i sosomi.

⁷ A yaco talega na vosa i Jiova ena gusu i Jeu na parofita na luve i Anani, ena vuku i Pasa kei na nona mataqali, me baleta na veika ca kecega ka cakava o koya ena mata i Jiova. E a vakacudrui Jiova o koya, sega wale ga ena vuku ni ka sa cakava, ena vuku talega ni nona a vakamatei ira na mataqali i Jeropoama.

O Ela na Tui Isireli

⁸ Ena i ka ruasagavulu kaono ni yabaki i Asa na tui Juta, a tekivu me veiliutaki vei ira na Isireli mai Tirisa o Ela na luve i Pasa, ka veiliutaki tiko me yabaki rua.

⁹ O Simirai, e dua vei ira na nona i vakalesilesi ka sa liutaka e dua na i wase veimama ni nona matasotia vodo qiqinivalu na tui, a sa qai bukiveretaka na tui. A la'ki gunu ka mateni voli o Ela ena vale i Erisa, o koya sa lewa na valenitui mai Tirisa.

¹⁰ A curu yani o Simirai, a qai mokuti koya, ka vakamatea, a sa tui me kena i sosomi. Sa yaco na ka oqo ena i ka 27 ni yabaki ni nona veiliutaki vakatui o Asa na tui Juta.

¹¹ Ia ni gauna ga a veiliutaki kina o koya a tekivu me vakamatei ira kece na mataqali i Pasa, a sega ni vakabula e dua na tagane vei ira na wekana kei ira na nona i tokani.

¹² A vakarusai ira kece na mataqali i Pasa o Simirai, me vaka na vosa i Jiova, a vosataki Pasa kina ena gusu i Jeu na parofita,

¹³ ena vuku ni valavala ca kecega i Pasa kei na i valavala ca i Ela na luvena, e rau a i valavala ca kina, ka vakaivalavalacataki ira talega na Isireli, me vakacudrui Jiova na nodra Kalou na Isireli, ena nodra veikalou lasu.

¹⁴ Ia na vo ni cakacaka i Ela, kei na ka kecega a cakava o koya, a sega li ni volai ena i Vola ni Veika a Caka ena nodra Veigauna na Tui Isireli?

¹⁵ Ena i karuasagavulu kavitu ni yabaki i Asa na tui Juta, a tui kina mai Tirisa o Simirai, ka bogi vitu. A tiko vakaivalu o ira na tamata e Kipiconi, ka nodra na kai Filisitia.

¹⁶ Era a rogoca o ira na tamata ka tiko vakaivalu, ka vaka, “Sa buki vere o Simirai, ka vakamatea na tui;” era a buli Omirai na turaganivalu o ira kecega na Isireli me tui Isireli ena siga o ya ena i tikotiko ni valu.

¹⁷ A lako cake mai Kipiconi o Omirai vata, kei ira na Isireli kecega, ka buku druadrua ki Tirisa.

¹⁸ Ia ni raica o Simirai ni a kabai na koro, a curu ki na tikina cecere ena valenitui, ka vakama na valenitui ni a tiko e loma o koya ka mate kina.

¹⁹ A yaco na ka oqo ena vuku ni nona i valavala ca, sa vakayacora ena mata i Jiova ena nona muria na i tovo i Jeropoama, kei na nona i valavala ca sa kitaka o koya, ni a vakaivalavalacataki ira kina na Isireli.

²⁰ Ia na vo ni cakacaka i Simirai kei na vere sa kitaka o koya, a sega li ni volai ena i Vola ni Veika sa Caka ena nodra Veigauna na tui Isireli?

O Omirai na Tui Isireli

²¹ Era sa tawase rua o ira na Isireli: e dua na kena veimama era sa muri Tipini na luve i Kinaci, ka buli koya me tui; ka dua na kena i wase era sa muri Omirai.

²² E muri, era a qai rawata na qaqa o ira na veitokoni vei Omirai; a sa mate o Tipini ka sa yaco me tui o Omirai.

²³ Ena i ka 31 ni yabaki i Asa na tui Juta, a sa qai tekivu me liutaki ira na Isireli o Omirai, ka veiliutaki tiko me yabaki tinikarua; a sa veiliutaki voli mai Tirisa ena i matai ni yabaki ono.

²⁴ Sa qai volia o koya na delana o Samaria ena 6,000 na tiki ni siliva mai vei Semeri. A sa tara kina e dua na koro ena ulunivanua, a sa vakatoka o Samaria, me veiyacani ga vei Semeri, o koya na i taukei ni delana o ya.

²⁵ A sai valavala ca o Omirai ena mata i Jiova, ia sa levu cake sara na nona ca, ka lailai sobu na nodra ca o ira kecega era bula e liu vua.

²⁶ A sa muria o koya na i tovo ca kecega i Jeropoama na luve i Nipati, kei na nona i valavala ca a vakaivalavalacataki ira kina na Isireli, ka vakavuna me vakacudrui Jiova kina na nodra Kalou na Isireli ena vuku ni nodra matakau ceuceu.

²⁷ Ia na vo ni veika a cakava o Omirai, kei na qaqa sa vakaraitaka, a sega li ni volai ena i vola ni Veika a Caka ena nodra Veigauna na tui Isireli?

²⁸ A sa mate o Omirai, ka la'ki bulu vata kei ira na nona qase mai Samaria, a tui o Eapi me kena i sosomi.

O Eapi na Tui Isireli

²⁹ Ia ena i katolusagavulu kawalu ni yabaki i Asa na tui Juta, a tekivu me veiliutaki o Eapi na luve i Omirai, vei ira na Isireli; a tui vei ira na Isireli mai Samaria o Eapi na luve i Omirai, ka yabaki ruasagavulu karua.

³⁰ A valavala ca ena mata i Jiova o Eapi na luve i Omirai, ka sega ni dua a tautauvata kaya vei ira era a bula e liu vua ena vuku ni nona i valavala ca.

³¹ Ia me vaka sa ka lailai vua na nona muria na i valavala ca i Jeropoama na luve i Nipati, a kuria tale ena nona kauti Jesipeli me watina, o koya na luve i Ecipeali, na nodra tui na kai Saitoni, ka la'ki qaravi Peali, ka cuva vua.

³² A cakava o koya e dua na i cabocabonisoro vei Peali, ena burekalou i Peali, a tara o koya mai Samaria.

³³ A sa cakava o Eapi na i vakatakarakara ni kalou yalewa o Asera. A sa levu cake na ka sa vakacudrui Jiova kina na nodra Kalou na Isireli o Eapi, ka lailai na ka era a cakava na tui Isireli era a bula e liu vua.

³⁴ Ena nona gauna ni veiliutaki, a sa ia o Aieli na kai Peceli me tarai Jeriko cake tale. Ia me vaka na vosa a yalayala oti kina o Jiova vei Josua na luve i Nuni, a sa vakayalia o Aieli na luvena ulumatua tagane o Epairami ena gauna tara kina na yavu ni koro o Jeriko, ka mate vakakina na luvena tagane gone duadua o Sikupi ena gauna e tara kina na matamata ni koro.