1 Tui 15 - Vakavakadewa Vou kei na iVola tale eso

Na Veiliutaki i Epaijami na Tui Juta

¹ Ena i katini kalima ni yabaki i Jeropoama na tui, na luve i Nipati, a tekivu me veiliutaki vei ira na Juta o Epaijami.

² A tui mai Jerusalemi o koya me yabaki tolu. Ia na yaca i tinana o Meka na luve i Apisalome.

³ A muria o koya na i valavala ca kecega i tamana ena gauna sa bula kina; a sega ni dodonu taucoko sara na lomana vei Jiova na nona Kalou, me vaka na loma i Tevita na nona qase.

⁴ Ia ena vuku i Tevita, a solia kina vei Epaijami o Jiova na nona Kalou e dua na luvena tagane me na qai veisosomitaki vua e Jerusalemi, ka me vakataudeitaka talega na taqomaki i Jerusalemi.

⁵ A sa vakayacora oqo o Jiova baleta ni sa cakava o Tevita na ka e dodonu e matana, ka sega ni gole vakatikitiki mai na nona i vakaro, ka vakavo ga na ka e baleti Uraia na Itaiti.

⁶ E rau a veivaluvaluti o Reopoama kei Jeropoama ena gauna kece ni nodrau bula.

⁷ Ia na vo ni cakacaka i Epaijami, kei na ka kecega a cakava o koya, a sega li ni volai ena i Vola ni Veika Sa Caka ena nodra Veigauna na tui Juta?

⁸ A mate ka moce kei ira na nona qase o Epaijami; a sa bulu o koya ena koro i Tevita; na tui o Asa na luvena me kena i sosomi.

O Asa na Tui Juta

⁹ Ia ena i karuasagavulu ni yabaki i Jeropoama na tui Isireli, a tekivu me veiliutaki vei ira na Juta o Asa.

¹⁰ A tui tiko o koya mai Jerusalemi ka yabaki vasagavulu kadua. Ia na yaca i buna o Meka, na luve i Apisalome.

¹¹ A sai valavala dodonu o Asa ena mata i Jiova, me vaka sa cakava o Tevita na nona qase.

¹² A vakasavi ira tani mai na vanua o ira era sai valavala vakasisila vaka-Sotoma, ka biuta tani na veimatakau kecega era a cakava na nona qase.

¹³ Ia a vakasivoi Meka talega me kakua ni Ranadi tiko, ni a cakava e dua na matakau vakasisila kei na kalou yalewa o Asera; a taya sobu na nona matakau o Asa, ka vakama mai na uciwai o Kitoroni.

¹⁴ E dina ga ni a sega ni talaraka sobu o Asa na veitikina cecere, ia sa dina tikoga vei Jiova o koya ena nona bula taucoko.

¹⁵ A kauta o koya ki na vale i Jiova na veika sa vakatabuya o tamana me nei Jiova, na siliva, na koula kei na i yaya tale eso.

¹⁶ E rau a veivaluvaluti tiko o Asa kei Pasa na tui Isireli, ena nodrau gauna taucoko ni veiliutaki.

¹⁷ A lako cake o Pasa na tui Isireli me veivala kei ira na Juta ka tara na koro o Rama, me dredre kina vua ni dua me lako tani mai se lako yani vei Esa na tui Juta.

¹⁸ A qai kauta o Asa na koula kei na siliva kecega sa vo tu ena yau ni vale i Jiova, kei na i yau sa vo tu ena valenitui, ka solia ki ligadra na nona tamata; a vakauta o Esa na tui vei Penitati na luve i Tapirimoni, na luve i Esioni na tui Siria, o koya ka tiko mai Tamasiko, ka kaya,

¹⁹ “Me dua mada na nodaru veiyalayalati me vaka e rau a cakava o tamamu kei tamaqu; ka raica, au sa vakauta yani vei iko e dua na ka ni loloma, na siliva kei na koula; mo lako mai mo tinia na nomudrau veiyalayalati kei Pasa na tui Isireli ka me vakasuka tani vei au o koya.”

²⁰ A vakarorogo vei Asa na tui, o Penitati, ka talai ira na kavetani ni nona mataivalu me veivala kei na nodra veikoro na Isireli, ka vakadrukai kina o Aijoni kei Tani, o Epeli Peci Maka, kei Kinereci taucoko, kei na vanua taucoko o Navitalai.

²¹ Ia ni a rogoca o Pasa, a tarova na kena tara tiko o Rama, ka la'ki tiko mai Tirisa.

²² A kacivi ira raraba kecega na Juta o Asa na tui, sega ni vo e dua, ka ra la'ki kauta tani na veivatu tuva mai Rama, kei na kena kauvaro a tara tiko kina o Rama; a la'ki tarai Kipa kina ka nei Penijamini, kei Misipa o Asa na tui.

²³ Ia na vo ni cakacaka kecega i Asa kei na nona kaukauwa kece, kei na veika kecega a cakava o koya, kei na veikoro ka a tara sa sega li ni volai ena veika sa caka ena nodra Veigauna na tui Juta? Ia ena gauna sa qase kina, a lokiloki na yavana.

²⁴ A mate, ka moce kei ira na nona qase o Asa, a bulu vata kei ira na nona qase ena koro i Tevita na nona qase; a tui o Josefati na luvena me kena i sosomi.

O Netapi na Tui Isireli

²⁵ A tekivu veiliutaki vei ira na Isireli o Netapi, na luve i Jeropoama, ena kena i karua ni yabaki i Asa na tui Juta; a tui tiko vei ira na Isireli o koya me rua na yabaki.

²⁶ A dau caka ca o koya ena mata i Jiova ka muria na i tovo i tamana, kei na nona i valavala ca ka vakaivalavalacataki ira kina na Isireli.

²⁷ A bukiveretaki Netapi o Pasa na luve i Eaija, ena mataqali i Isakari; a mokuti koya o Pasa mai Kipiconi, e dua na nodra koro na kai Filisitia; ni ra tiko vakaivalu mai Kipiconi o Netapi kei ira kecega na Isireli.

²⁸ Ia a vakamatei koya o Pasa, ena i katolu ni yabaki i Asa na tui Juta; a sa tui o koya me kena i sosomi.

²⁹ Ia ni sa tui o koya, a qai vakamatei ira kecega na kawa i Jeropoama; ka sega tale ni vo e dua ena mataqali i Jeropoama, ka vakarusa vakadua sara me vaka na vosa i Jiova ena gusu ni nona tamata o Eaija na kai Sailo.

³⁰ E a yaco na ka oqo ena vuku ni i valavala nei Jeropoama, ka a vakaivalavalacataki ira kina na Isireli, kei na nona vakacudrui Jiova na nodra Kalou na Isireli.

³¹ Ia oqo na vo ni veicakacaka i Netapi, kei na ka kecega ka a cakava o koya, sa sega li ni volai ena i Vola ni Veika sa caka ena nodra Veigauna na tui Isireli?

³² E rau sa veivaluti o Asa kei Pasa na tui Isireli ena nodrau gauna ni veiliutaki.

³³ Ena i katolu ni yabaki i Asa na tui Juta, a tekivu me veiliutaki o Pasa na luve i Eaija vei ira kecega na Isireli mai Tirisa, ka veiliutaki me yabaki ruasagavulu ka va.

³⁴ A sa dau caka ca o koya ena mata i Jiova ka muria na i tovo i Jeropoama kei na nona i valavala ca, ka a vakaivalavalacataki ira kina na Isireli.