1 Tui 14 - Vakavakadewa Vou kei na iVola tale eso

Na Mate nei Luve i Jeropoama Tagane

¹ Ena gauna o ya, a tauvi mate o Apaijia na luve i Jeropoama.

² A sa kaya o Jeropoama vua na watina, “Mo tucake, ka vakalecaleca me vaka e dua na yalewa tani, mo kakua ni kilai kina ni o sa wati Jeropoama, ka lako ki Sailo: raica, sa tiko mai kea o Eaija na parofita, o koya a tukuna vei au ni'u na nodra tui na tamata oqo.

³ Ia mo kauta tiko e tini na i buli madrai, eso na keke, kei na dua na tavaya oni, ka lako vua; ena tukuna vei iko o koya na ka ena yaco vua na gone.”

⁴ A cakava vakakina na wati Jeropoama, a cavutu ka lako yani ki Sailo, ki na vale i Eaija. Ia a sega tu ni rai rawa o Eaija, ni a buwawa na matana ni sa qase sara o koya.

⁵ A vosa o Jiova vei Eaija ka kaya vua, “Raica, sa lako tiko mai na wati Jeropoama, me taroga vei iko se na vaka e vei na luvena; ni sa tauvi mate tiko o koya. A sa qai kaya vua na Kalou na veika me tukuna. Ia ni yaco yani, a sa vakalecaleca yani me vaka e duatani tale na yalewa.

⁶ Ia ni rogoca na vadugu ni yavana o Eaija, ni curu yani e katuba, a kaya, “Curu mai na wati Jeropoama; a cava o sa lako vakalecaleca mai? Sa tiko oqo vei au na i tukutuku bibi ka'u sa talai kina vei iko.

⁷ Mo lako, mo kaya vei Jeropoama, ‘Sa vosa vakaoqo o Jiova, na nodra Kalou na Isireli, “Au a digitaki iko ena kedra maliwa na tamata, ka lesi iko mo tui vei ira na noqu tamata na Isireli.

⁸ Au a kaliraka tani na matanitu mai na mataqali i Tevita na noqu i talatala, o koya ka muria na noqu i vakaro, ka muri au ena yalona taucoko, me cakava ga na ka e dodonu e mataqu.

⁹ Ia o a cakava na ka ca ka uasivia na nodra i valavala ca kecega era bula e liu vei iko; ni o sa cakava eso na kalou tani kei na veimatakau eso sa vakawaicalataki, ka me vakacudrui au, ka sa biuti au tani kina ki dakumu.

¹⁰ Ena vuku ni ka oqo, au na vakayacora kina na ka ca ki na mataqali i Jeropoama, ka muduki ira laivi na tagane kecega mai na mataqali i Jeropoama, o koya sa vesuki kei koya sa lako voli e Isireli, ia ka'u na taviraka tani na vo ni kawa i Jeropoama me vaka sa vakama yavu na de ni manumanu na tamata, ka me oti kece sara vakadua.

¹¹ O koya sa mate ena kawa i Jeropoama ena koro ena kania na koli; kei koya sa mate ena lomanivanua ena kania na manumanu vuka; ni sai au o Jiova ka'u sa kaya vakaoqo.’ ”

¹² O koya oqo, mo tucake, ka lako ki na nomu vale. Ia ni sa butuka na koro na yavamu, sa na ciba na luvemu.

¹³ Era na tagicaki koya o ira kecega na Isireli ka ra na qai buluti koya; ni sai koya duadua ga oqo vei ira na mataqali i Jeropoama ena yaco ki na i bulubulu, ni sa lomani koya o Jiova, na nodra Kalou na Isireli.

¹⁴ Ia ena vakatubura se na vakavuna o Jiova, e dua tale vei ira na Isireli, me na muduka laivi na mataqali i Jeropoama ena siga oqo.

¹⁵ Ia ena totogitaki ira na Isireli o Jiova me vaka a yavalata na co kuta na wai; ka na cavuivuvutaki ira na Isireli mai na vanua vinaka oqo, ka a solia vei ira na nodra qase e liu, ka na vakabuwacarataki ira na Isireli, ka na la'ki sivia yani na uciwai levu na Uferetisi, ena vuku ni nodra a vakacudrui Jiova ena nodra cakava na kalou yalewa ni veikau o Asera.

¹⁶ Ia ena biuti ira tani na Isireli o koya ena vuku ni valavala ca a kitaka o Jeropoama, ka ni a vakaivalavalacataki ira kina na Isireli.”

¹⁷ A cavutu na wati Jeropoama, ka lesu yani, ia ni yaco ki Tirisa ena i lago ni katuba, a ciba na gone.

¹⁸ Era a buluta, ka ra tagicaka kecega na Isireli, me vaka na vosa i Jiova a vosataka o koya ena gusu ni nona i talatala o Eaija na parofita.

¹⁹ Ia na vo ni veicakacaka tale eso a cakava o Jeropoama, na nona i valu, kei na nona lewa, sa volai ena i Vola ni Veika sa Caka ena Veigauna na tui Isireli.

²⁰ Ia na dede ni gauna a veiliutaki kina o Jeropoama a ruasagavulu na yabaki; a sa mate ka la'ki moce kei ira na nona qase, a sa tui o Netapi na luvena, me kena i sosomi.

O Reopoama na Tui Juta

²¹ A tui mai Juta o Reopoama na luve i Solomoni. A vasagavulu kadua na yabaki i Reopoama ena gauna a buli kina me tui, ka tini kavitu na yabaki na nona veiliutaki tiko mai Jerusalemi, na koro ka a digitaka o Jiova mai na nodra veimataqali kecega na Isireli, me vakatikora kina na yacana. Ia na yaca i tinana o Nema, na yalewa ni Amoni.

²² Era sa caka ca na Juta ena mata i Jiova; era a vakavuna me cudru vakalevu ka vuvutaki ira ena vuku ni nodra i valavala ca ni sa uasivi mai na kena era a cakava na nodra qase.

²³ Era sa tara talega na i cabocabonisoro ni qaravi kalou tani, ka vakaduria na i vakatakarakara i Asera me ra sokalou kina mai na veidelana cecere kei na ruku ni veikau drokadroka.

²⁴ Era tiko maliwai ira talega eso na tagane kei na yalewa era dau volitaka na yagodra ena veivalenisoro ni qaravi kalou tani. Era a vakayacora na Isireli na veika veivakamadualaki kecega era a dau cakava na veimatanitu ka vakasavi ira tani o Jiova mai matadra ena gauna era curuma yani kina na Isireli.

²⁵ Ena i kalima ni yabaki i Reopoama na tui, a la'ki vala ki Jerusalemi o Sisaki na tui Ijipita.

²⁶ A sa kauta tani o koya na i yau mai na Valenisoro kei na i yau mai na valenitui, ka okati kina eso na i sasabai koula a cakava o Solomoni.

²⁷ A sa cakava o Reopoama na tui eso na i sasabai parasa me kedra i sosomi, ka tataunaka na kedra maroroi vei ira na turaganivalu ni matayadra ni valenitui.

²⁸ Ena veigauna kece sara e gole kina na tui ki na Valenisoro, era sa dau kauta yani na matayadra na i sasabai, ka ra dau qai vakasuka tale ki na vale ni yadra.

²⁹ Ia na vo ni cakacaka i Reopoama kei na ka kecega a cakava o koya sa volai ena I Vola ni Veika sa Caka ena Nodra Veigauna na Tui Juta.

³⁰ E rau a veivaluvaluti tiko kei Jeropoama ena nodrau gauna kecega.

³¹ A mate o Reopoama ka moce kei ira na nona qase, a bulu vata kei ira na nona qase ena koro i Tevita. Ia na yaca i tinana o Nema, na yalewa ni Amoni. A tui o Epaijami na luvena me kena i sosomi.