1 Tui 13 - Vakavakadewa Vou kei na iVola tale eso

Na Tamata ni Kalou mai Juta

¹ A sa lako mai Juta e dua na tamata ni Kalou ki Peceli, ni a vosa vua o Jiova, ka yaco yani i kea ni sa tucake tu o Jeropoama ena i tutu ni cabocabonisoro me ia na vakacaboisoro.

² Ena nona talairawarawa ki na lewa i Jiova, a sa qai vosataka na tamata ni Kalou na i cabocabonisoro, ka kaya, “I cabocabonisoro, i cabocabonisoro, sa kaya vakaoqo o Jiova: Raica, e dua na gonetagane, o Josaia na yacana, ena sucu mai na vuvale i Tevita. O koya ena vakamatei ira na bete era sa dau qaravi ira na kalou tani ka ra dau vakacaboisoro e delamu, ka na vakama talega na sui ni tamata e delamu.”

³ A sa solia talega na tamata ni Kalou na i vakatakilakila ena siga vata o ya, ka kaya, “Raica, ena talaraki sobu na i cabocabonisoro oqo, ka na sovaraki tani na dravusa sa koto e delana. Oqo ena i vakadinadina ni sa vosa vei au o Jiova ena vuku ni veika oqo.”

⁴ Ni sa rogoca oqo na tui na nona sa vosataka vakaoqo na i cabocabonisoro mai Peceli o koya na tamata ni Kalou, a sa dodoka yani na ligana me dusi koya ka kaya, “Dou vesuka na tamata o ya!” Ia, a sa qai paralasi vakasauri na ligana sa dodoka yani, ka sega kina ni lokia lesu tale.

⁵ E vakasauri ni sa kavida na i cabocabonisoro ka tasova na kena dravusa ki na qele, me vaka na i vakatakilakila a tukuna taumada na tamata ni Kalou.

⁶ A sa kaya na tui o Jeropoama vua na tamata ni Kalou, “Mo ni yalololoma ka masulaki au mada vei Jiova na nomu Kalou me vakabula na ligaqu!” A sa masuti Jiova na tamata ni Kalou, ka ia na veivakabulai ni sa vinaka tale na ligana na tui.

⁷ Ni oti o ya, sa qai kaya na tui vua na tamata ni Kalou, “Me daru lako mada i vale ka la'ki vakayagataka e dua na kakana, ka'u na solia vei iko e dua na ka ni loloma.”

⁸ A sa tukutuku lesu vua na tui na tamata ni Kalou, ka kaya, “Kevaka mada ga o mani solia vei au e veimama na i wase ni nomu i yau me noqu, au na sega ga ni lako vata kei iko; ka'u na sega talega ni kana madrai se gunu wai ena tikina oqo.

⁹ Sa vakaroti au o Jiova me'u kakua ni kania se gunuva e dua na ka, ka me'u kakua talega ni lesuva tale na sala au a muria mai.”

¹⁰ A sa lako yani o koya, ka sa muria e dua tani tale na sala mai na kena sa lakova mai i Peceli.

¹¹ A tiko mai Peceli e dua na parofita qase ena gauna vata o ya. A lako mai o ratou na luvena ka tukuna vua na cakacaka kecega a cakava mai Peceli na tamata ni Kalou ena siga o ya kei na vosa e kaya vua na tui.

¹² A sa kaya vei iratou na tamadratou, “A sala cava sa muria o koya ena nona lesu?” E ratou sa qai dusimaka vua na gaunisala.

¹³ A sa kaya talega vei iratou na luvena, “Dou vakarautaka na asa me'u vodo kina.” E ratou sa qai vakaidabedabetaka na asa, ka sa vodo kina o tamadratou.

¹⁴ A sa lako muria na tamata ni Kalou, ka kunei koya ni dabe tiko ena ruku ni dua na vuni oki; a kaya vua, “O iko beka na tamata ni Kalou ka lako mai Juta?” A sa kaya, “Io, sai au oqo.”

¹⁵ A sa kaya vua, “Me daru lako ki na noqu vale, ka kana.”

¹⁶ A sa kaya o koya, “Au na sega ni lesu vata kei iko, se lako vata kei iko; au na sega talega ni kana se gunu kei iko ena tikina oqo;

¹⁷ ni sa vakaroti vei au ena vosa i Jiova, ka vaka, ‘Mo kakua ni kana, se gunu mai kea se muria tale na sala o a lakova mai.’ ”

¹⁸ A sa kaya vua, “O au talega au parofita me vakataki iko: ka sa vosa mai vei au e dua na agilosi ena vosa i Jiova me'u kauti iko ki na noqu vale, mo la'ki kana ka gunu.” Ia a sa vosa lasu tiko na parofita qase.

¹⁹ A sa qai lesu vata i koya na parofita qase na tamata ni Kalou mai Juta, ka la'ki vakayagataka vata kei koya e dua na kakana.

²⁰ Ia ni rau kana tiko ena teveli, a sa lako mai na vosa i Jiova vua na parofita ka a kauti koya lesu mai;

²¹ a sa kaya o koya vua na tamata ni Kalou mai Juta, “Sa kaya vakaoqo o Jiova ni o sa talaidredre ki vua baleta na nomu sega ni vakayacora na nona i vakaro.

²² Ia, ena vuku ni nomu a lesu tale mai mo mai kana ka gunu ena vanua sa vakarota vei iko o koya mo kakua ni kana se gunu kina, o sa na mate vakaidina kina ka na sega ni buluti na yagomu ena nodra i bulubulu na nomu qase.”

²³ Ni sa oti na nodrau kana kei na gunu, a sa qai vakarautaka na parofita qase na nona asa na tamata ni Kalou mai Juta.

²⁴ Ia ni sa lako voli, a sa sotavi koya e dua na laione ka vakamatei koya. A sa davo koto ena salatu na yagona, ka rau tucake tu e yasana na asa kei na laione.

²⁵ Raica, era a veilakoyaki yani na tamata, ka raica ni a davo koto e sala na yago ka tu volekata e dua na laione. Era a lako yani i Peceli ka vakadewataka na i tukutuku ni veika era sa raica oqo.

²⁶ Ia ni sa rogoca na parofita qase, o koya ka a vakalesui koya mai na sala, a sa kaya, “O ya na tamata ni Kalou ka a talaidredre ki na vosa i Jiova; sa soli koya kina o Jiova ki na laione me basuraki koya ka vakamatea, me vaka a kaya o Jiova ni na vakayacora.”

²⁷ A qai vosa vei iratou na luvena ka kaya, “Dou vakarautaka na noqu asa me'u vodoka.” A ratou sa vakayacora vakakina.

²⁸ A sa lako o koya ka kunea na yago sa biu no ena sala, ka rau se tucake volekata tikoga na asa kei na laione. Na laione sa sega ni kania na yagona se basuraka na asa.

²⁹ A sa laveta na yago na parofita qase, a sa vakavodoka ki na asa, ka sa qai kauta lesu i Peceli me tagicaka ka buluta.

³⁰ A sa vakotora na yagona ki na nona i bulubulu ka ra tagicaki koya, ka kaya, “Isa na taciqu, na taciqu!”

³¹ Ia ni ra vakotora oti na yagona, a sa qai vosa vei iratou na luvena o koya na parofita qase, ka kaya, “Ni'u sa mate, dou qai buluti au talega ena i bulubulu sa bulu kina na tamata ni Kalou oqo; dou vakotora vata na suiqu kei na suina;

³² ni na yaco vakaidina na vosa ka a kacivaka o koya ena vosa i Jiova ena vuku ni cabocabonisoro mai Peceli, kei na veivale kecega ena veitikina cecere mai na veikoro vaka-Samaria.”

³³ Ni sa oti na veika oqo, sa sega ni biuta tani o Jeropoama na nona i valavala ca, ka lesia tale me ra bete ena veitikina cecere o ira na tamata wale: o koya ga a vinakata, a bulia o koya me bete ena veitikina cecere.

³⁴ Ia na ka oqo sa vu ni valavala ca ki na mataqali i Jeropoama, ka me muduki tani kina, ka vakarusai tani mai na dela i vuravura.