1 Tui 12 - Vakavakadewa Vou kei na iVola tale eso

Tawase na Veimataqali mai na Vualiku

¹ A sa lako ki Sikemi o Reopoama, ni ra sa lako kece yani kina na Isireli me ra buli koya me tui.

² Ni sa rogoca oqo o Jeropoama na luve i Nipati, o koya ka a lako ki Ijipita ni a drotaki Solomoni na tui, a sa qai biuta mai na vanua o Ijipita.

³ Era a qai talatala mai o ira na lewe ni veimataqali mai na vualiku me ra sota mada, ka ra sa qai lako vata kece yani vei Reopoama ka kaya vua,

⁴ “Na tamamuni o Solomoni sa qaravi keimami vakaca ni sa vakabibitaka na neimami i colacola. Ia kevaka o ni na vakamamadataka na veicolacola bibi oqo ka vakarawarawataka vei keimami na bula, keimami na qai qaravi kemuni ena yalodina.”

⁵ A sauma vei ira o koya, “Ni qai lesu tale mai ni oti e tolu na siga, ka'u na qai tukuna vei kemuni na kena macala.” Era sa mani lako yani na tamata.

⁶ A sa taro vakasala o Reopoama na tui vei ira na qase ka ra a daunivakasala i Solomoni na tamana, ka sa taroga, “Na i sau ni taro cava dou sa nanuma me'u tukuna vei ira na tamata oqo?”

⁷ Era a sauma lesu ka vaka, “Kevaka o ni vinakata mo ni qaravi ira vakavinaka na tamata oqo, ia mo ni solia na i sau ni taro vinaka me baleta na nodra vakatataro, ka ra na qai qaravi iko tikoga ena yalodina.”

⁸ Ia sa sega ni via rogoca o koya na nodra i vakasala na qase, ka sa lako ga vei ira na cauravou era a bula vata mai ka ra sa yaco me nona daunivakasala.

⁹ A sa tarogi ira o koya, “A cava dou na vakasalataka me'u cakava? Na cava me'u tukuna vei ira na tamata era sa kerea tiko oqo vei au me'u vakamamadataka na nodra i colacola?”

¹⁰ Era sa sauma lesu ka kaya, “Oqo na ka mo ni tukuna vei ira: ‘A noqu i qaqalo lalai sa vavaku cake mai na tolo i tamaqu!’

¹¹ Ni kaya vei ira, ‘Sa vakacolati kemuni o tamaqu ena i colacola bibi; ia au na vakalevutaka cake na kena bibi vei kemuni. A sa vakanakuitataki kemuni o tamaqu ena qanui, ia ka'u na vakanakuitataki kemuni ena kuita ni ose!’ ”

¹² Ni sa oti e tolu na siga, sa qai lesu tale mai o Jeropoama kei ira na tamata kivei Reopoama na tui, me vaka na ka era sa vakasalataki kina.

¹³ A sa sega ni muria na tui na nodra i vakasala na qase ka sa vosa vakaukauwa vei ira na tamata,

¹⁴ me vaka na nodra i vakasala na cauravou. A sa kaya, “Sa vakabibitaka na nomuni i colacola o tamaqu, ia au na vakalevutaka cake tale na kena bibi. E a vakanakuitataki kemuni o tamaqu ena qanui, ia ka'u na vakanakuitataki kemuni ena kuita ni ose!”

¹⁵ A sa sega ni vakarorogo na tui vei ira na tamata, ni sa vu na veika kece oqo mai vei Jiova, ka me vakayacori kina na nona vosa sa tukuna vei Jeropoama na luve i Nipati mai na gusu ni parofita o Eaija mai Sailo.

¹⁶ Ia ni ra raica na tamata ni sa sega ni rogoci ira o koya na tui, era sa qai kailavaka yani, “Me da vakanadakui Tevita kei na nona vuvale! Na cava mada eratou sa bau vakayacora vei keda? Oi kemuni na Isireli, me da sa lako ga ki na noda veivale! Laivi Reopoama me qai qaravi koya ga vakai koya!” Ena ka oqo, era sa vuki tani kina na Isireli,

¹⁷ ka biuti Reopoama tu mai me nodra tui ga na tamata era sa vakaitikotiko ena vanua o Juta.

¹⁸ A sa qai tala yani o Reopoama na tui me lako vei ira na Isireli o Etorami, o koya na nodra i liuliu na matacakacaka vakabobula, ia era a qai vakaviriki koya ena vatu o ira na Isireli me yacova na nona mate. Ena ka oqo, a sa vodoka vakatotolo kina o Reopoama na tui na nona qiqi vakaturaga ka dro yani ki Jerusalemi.

¹⁹ Me tekivu mai na gauna o ya, era sa vuki tani mai na veiliutaki vakatui ni vuvale i Tevita o ira na tamata ena vualiku kei Isireli.

²⁰ Ia ni ra rogoca na Isireli na nona sa lesu mai o Jeropoama, era a sureti koya mai me ra veivosaki ka buli koya me tui Isireli. Ia na mataqali o Juta duaduaga sa yalodina vei ira na kawa i Tevita.

Na Vosa ni Yalayala vei Semaia

²¹ Ia ni yaco i Jerusalemi o Reopoama, a sa vakasoqoni ira vata e lewe 180,000 na sotia digitaki mai na yavusa i Juta kei na yavusa i Penijamini. A sa nakita me la'ki valuti ira na Isireli, ka me vakalesui tale mai kina na matanitu vei Reopoama na luve i Solomoni.

²² A qai yaco na vosa i Jiova vei Semaia na tamata ni Kalou, ka kaya,

²³ “Mo vosa vei Reopoama, na luve i Solomoni, na tui Juta, kei ira na tamata sa vo, ka kaya,

²⁴ ‘Sa kaya vakaoqo o Jiova. Mo ni kakua ni lako cake se veivala kei ira na wekamuni na Isireli. Me ra lesu yani na tamata yadua ki na nona vale; ni sa vu vei au na ka oqo.” Era a vakarorogo ki na vosa i Jiova ka dui lesu tale.

²⁵ A tara na koro o Sikemi o Jeropoama, ena vanua veidelana o Ifereimi ka tiko kina; a lako mai kea, ka tara na koro o Penueli.

Liutaki Isireli ena Caka Cala o Jeropoama

²⁶ A sa kaya vakai koya o Jeropoama, “Sa na qai vuki na matanitu ki na mataqali i Tevita;

²⁷ kevaka era a lako cake na tamata oqo, me vakacaboisoro ena vale i Jiova mai Jerusalemi, ena qai vuki tale na lomadra vua na nodra turaga, io, vei Reopoama na tui Juta, era na qai vakamatei au ka vuki tale vei Reopoama na tui Juta.”

²⁸ A rogo i vakasala na tui, ka bulia e rua na luve ni bulumakau koula, a kaya vei ira na tamata, “Sa rui dredre vei kemuni mo ni lako cake ki Jerusalemi ni sa yawa, Ni raica oqo o rau na nomuni kalou, oi kemuni na Isireli, e rau a kauti kemuni cake mai na vanua o Ijipita.”

²⁹ A biuta e dua mai Peceli ka biuta na kena i karua mai Tani.

³⁰ Ia na ka oqo, a vakavuna na i valavala ca; ni ra a lako ki Peceli o ira na tamata ka so era lako ki Tani, me ra qaravi kalou kina.

³¹ A tara na vale ena veitikina cecere o koya, ka lesi ira na bete vei ira na tamata wale, era sega ni luve i Livai.

Vakacacani na Sokalou mai Peceli

³² A sa vakatekivuna talega o Jeropoama e dua na solevu vakalotu ena i katinikalima ni siga ena i kawalu ni vula, ka oqo me tautauvata kei na solevu vakalotu e Juta. Ena dela ni cabocabonisoro mai Peceli, a sa cabora e kea na i madrali ki na luve ni bulumakau koula sa bulia o koya, ka vakatikori ira na bete mai Peceli me ra veiqaravi ena veicabocabonisoro sa tara o koya.

³³ Ena i katinikalima ni siga ena i kawalu ni vula, ka oqo na siga sa tauyavutaka ga o koya, a sa lako yani i Peceli ka cabora na nona i madrali ena i cabocabonisoro me vakananumi kina na solevu vakalotu sa bulia oqo me baleti ira na Isireli.