1 Tui 10 - Vakavakadewa Vou kei na iVola tale eso

Na Veisiko i Ranadi ni Sipa

¹ Ia ni sa rogoca na ranadi ni Sipa na i rogorogo me baleti Solomoni kei na nona veiwekani kei na yaca i Jiova, a sa lako mai me vakatarogi koya ena veitaro dredre eso.

² A lako yani i Jerusalemi kei na dua na i lawalawa levu, ka vakakina eso na kameli era vakavodoka tiko mai na ka boi vinaka, na veivatu talei, kei na i binibini koula. Ia ni yaco yani vei Solomoni, sa mani tarogi koya ena veimataqali taro kecega sa nanuma rawa.

³ Sa sauma o Solomoni na veitaro kecega; a sa sega ni dua na ka e dredre vua na tui me vakamacalataka.

⁴ Ia ni sa raica oti na ranadi ni Sipa na vuku i Solomoni, kei na vale a tara oti,

⁵ kei na kakana mai na nona teveli, na nodra i dabedabe na nona daunivakasala, na nodra tu vakarorogo tu o ira era qaravi koya, na nodra i sulusulu, o ira era dau tauri bilo vua, na nona i soro kama ka a cabora ena Vale i Jiova, a yali sara na nona loma dei na ranadi ni Sipa.

⁶ A sa kaya o koya vua na tui, “Sai tukutuku dina sara na i rogorogo ka'u a rogoca mai na noqu vanua ena veika me baleti kemuni, kei na nomuni vuku.

⁷ Ia au a sega ni vakadinata na i tukutuku eso au a rogoca, au a mani lako mai kina, ka mai raica e mataqu, au sa qai vakadinata; ka raica, sa ka lailai wale na ka sa tukuni vei au, ia sa uasivi cake sara na nomu vuku kei na nomu tiko vinaka mai na ka au a rogoca.

⁸ Era sa kalougata dina o ira na watimuni! Era sa kalougata vakakina o ira na nomuni dauveiqaravi, o ira era sa tu tikivi kemuni ka ra rogoca tiko na nomuni vuku.

⁹ Me vakavinavinakataki o Jiova na nomuni Kalou! Sa vakatakila o koya na levu ni nona vinakati kemuni, ka sa vakatikori kemuni ena nodra i tikotiko vakaturaga na Isireli! Ni sa lomani Isireli tikoga ka tawa mudu o Jiova, sa lesi kemuni kina o koya mo ni tui, mo ni vakatauca na lewa kei na ka dodonu.”

¹⁰ A sa qai solia na ranadi ni Sipa vua na tui na i loloma eso sa kauta voli mai: e sivia na 4,000 na kilokaramu na koula, e levu sara na i saluwaki boi vinaka, kei na vatu talei eso. Na levu ni saluwaki sa soli oqo ki vua na tui sai solisoli levu duadua me bau ciqoma na tui ena nona dela ni gauna.

¹¹ Ia na waqa kece nei Irami ka dau usa koula mai Oferi, a dau kauta talega mai e levu na kau, kei na vatu talei.

¹² A cakava na tui na kau talei me i tautauri ena i cabecabe ki na vale i Jiova kei na nona vale na tui, na api talega kei na soliteri vei ira na daunisere; a sega tale ni qai kunei se raici na mataqali kau vakaoqo, me yacova na siga oqo.

¹³ A solia vua na ranadi ni Sipa o Solomoni na tui na ka kecega sa gadreva o koya, se na ka kecega sa kerea, kei na ka talega sa solia vua ena yalo vakaturaga o Solomoni. A sa lesu na ranadi ni Sipa, ka lako ki na nona vanua kei ira na nona dauveiqaravi.

Na i Yau i Solomoni

¹⁴ Ena veiyabaki, a sa dau kumuna o Solomoni e rauta ni 23,000 na kilokaramu na koula

¹⁵ ka vakuri oqo mai na i sau ni vakacavacava era sa solia mai na tamata dauveivoli, na tubu e rawati mai na veivoli, kei na nodra i solisoli na tui Arapea eso kei ira na kovana ni veiyasana e Isireli.

¹⁶ A sa cakava o Solomoni e 200 na i sasabai buli ena koula lautuki; na levu ni koula e vakayagataki ena dua na i sasabai e rauta ni 7 na kilokaramu.

¹⁷ A sa cakava talega e 300 na i sasabai lalai sobu, a caka ena koula tuki, ka tau ya rua na kilokaramu na koula ena dua na i sasabai. A sa la'ki vakatikora na tui na i sasabai kece oqo ena Olo ni Veikau mai Lepanoni.

¹⁸ A sa cakava na tui e dua na i dabedabe vakatui sa caka mai na ivori, ka boroya ena koula dina.

¹⁹ A ono na i tagede ena i cabecabe ki na i dabedabe vakatui, a loveci na ulu ni dabedabe vakatui ki dakuna ka toka kina na i vakatakarakara ni dua na ulu ni luve ni bulumakau, ka yadua na laione ena yasa ni taqataqa ni liga ruarua ni dabedabe.

²⁰ E tinikarua na laione a tu ena yasa ni tagede: a ono ena yasa ni tagede e dua, ka ono ki na yasa ni tagede kadua. A sega ni dua na i dabedabe vakatui vakaoqo me a bau caka ena dua na matanitu tani.

²¹ Sa koula na bilo ni gunu kece nei Solomoni na tui, ka koula talei na bilo ni sedre kece mai na vale e veikau mai Lepanoni; a sega ni dua me siliva ni a sega ni okati me ka taleitaki na siliva ena gauna i Solomoni.

²² Era a kele tu ena toba mai Tasisi na i binibini waqa ni tui kei na i binibini waqa i Irami na tui Taia. Era dau soko lesu mai na i binibini waqa oqo ni oti e yatolu na yabaki, ka ra usana mai na koula, na siliva, na ivori, na maqe, kei na pikoki.

²³ A sa vutuniyau ka vuku vakalevu cake o Solomoni na tui mai vei ira kecega na vo ni tui,

²⁴ ka ra vinakata o ira kecega na kai vuravura me ra lako mai ka rogoca na vuku sa solia oqo vua na Kalou.

²⁵ O ira vakayadua era mai sikova na tui era sa kauta vata mai na nodra i loloma, ka okati kina na i yaya siliva kei na i yaya koula, na i sulu vakatui, na i yaragi ni valu, na ka boi vinaka, na ose digitaki eso kei na meule. E a levu cake tikoga na veika oqo ena veiyabaki.

²⁶ A sa tara cake o Solomoni na nona mataivalu ka okati kina e 1,400 na qiqinivalu kei na 12,000 na ose ni valu. E a lesia me tiko ga e Jerusalemi e dua na kena i wase, ka ra veibiuyaki ena veikoro lelevu tale eso na kena vo.

²⁷ Ena nona veiliutaki vakatui, sa cakava me raici na siliva me vaka ga na vatu, ka sa levu na veiloga ni sitari me vaka ga na veilolo ena ruku ni veidelana e Juta.

²⁸ Era a voli mai na ose i Solomoni mai Ijipita kei Kue, ka ra vakaitavi kina na nona dauniveivoli na tui.

²⁹ Me vaka ni rawa ni voli mai Ijipita na qiqinivalu ena 600 na tiki ni siliva ka i sau ni dua na ose e 150 na tiki ni siliva, era a volivolitaki kina na dauveivoli ni tui vei ira na nodra tui na kai Itaiti kei na nodra tui na kai Siria.