1 Timoci 5 - Vakavakadewa Vou kei na iVola tale eso

Na i Tavi vei Ira na Veiwekani Vakabauta

¹ Kakua ni vunauca vakaukauwa e dua na qase, ia mo vosa vakamalua ga vua me vaka ga e sa tamamu o koya. Okati ira na cauravou me vaka era sa tacimu,

² kei ira na yalewa sa qase cake me vaka era sa tinamu, kei ira na goneyalewa me vaka era sa ganemu, ena yalosavasava sa taucoko.

O Ira na Yada

³ Rokovi ira na yada era sa yada dina, o ira sa tiko taudua voli ga.

⁴ Ia kevaka e dua na yada sa vakaluveni se vakamakubuni, e dodonu me ra vulica taumada e liu na luvena kei na makubuna me ra cakava na nodra i tavi vakalotu ki na nodra vuvale ka sauma lesu kina na nodra veisusugi na i tubutubu kei ira na tubudra; ni sa ka vinaka oqo vua na Kalou.

⁵ Na yada ka sa tiko taudua voli ga, ka sa sega e qaravi koya, sa vagolea ga na nona vakanuinui vua na Kalou, ka sa dau masu vakawasoma me kerea vua na veivuke ena siga kei na bogi.

⁶ Ia na yada sa dauguta na marau sa mate ga ni se bula voli.

⁷ Dau vakarota na veika oqo me ra kua ni vakalewai kina na yada.

⁸ Ia kevaka e dua sa sega ni qaravi ira na wekana ka vakauasivi vei ira na nona lewe ni vuvale, sa cakitaka ga na vakabauta o koya ka sa ca vakalevu cake mai vua e dua sa sega ni vakabauta.

⁹ Me kakua ni volai ena kedra i vola na yada o koya ka se bera ni yacova na yabaki onosagavulu, ka sa vakawati ga vakadua;

¹⁰ ni sa dodonu me vakairogorogo o koya ena vuku ni nona cakacaka vinaka, me vaka e dua sa daususugi ira vinaka na luvena, ka sa dau dolava na nona vale vei ira na vulagi, ka dau savata na yavadra na tamata ni Kalou, ka dauvukei ira na leqa, ka dausoli koya ki na veicakacaka vinaka kecega.

¹¹ Ia mo kakua ni vakacuruma ki na i vola ni yada na yacadra na yada era gone sobu; baleta ni gauna ena vagolei tani kina na lomadra mai vei Karisito ena vuku ni nodra gagano, era na via vakawati tale,

¹² ka ra na qai ora vakalevu e lomadra ena vuku ni nodra sa voroka tale na nodra vosa ni yalayala taumada vei Karisito.

¹³ Era sa dau vakaoti gauna talega ka curuma wavoki na veivalevale; ia sa qai ca vakalevu oqo, ni ra sa dau kakase ka ra dauvakaucaca, ka ra dau veitalanoataka na veika e sega ni dodonu me ra tukuna.

¹⁴ O koya oqo ka'u sa vinakata kina me ra vakawati o ira na yada era se gone ga se tamata bula, ka me ra vakaluveni ka qarava na nodra vuvale, me kakua kina ni solia vua na meca e dua na gauna me vosa vakacacataki keda kina.

¹⁵ Ni ra sa vuki tani oti eso na yada ka muri Setani.

¹⁶ Ia kevaka e dua na yalewa vakabauta Vakarisito sa tiko eso na wekana yada ena nona vuvale, e dodonu me qaravi ira ga o koya ka me kakua ni vakacolata ki na lotu, me rawa kina vua na lotu me qaravi ira ga na yada ka ra sa tiko taudua ga.

¹⁷ O ira na qase ka ra sa qarava vinaka na nodra i tavi ni veiliutaki e dodonu me ra nanumi ke rawa ni vakaruataki na nodra i votavota, ka vakauasivi oqo vei ira era cakacaka vakaukauwa ena qaravi ni vunau kei na veivakatavulici.

¹⁸ Ni sa kaya na i Vola Tabu, “Kakua ni vesuka na gusu ni bulumakau ni butu sila tiko,” kei na, “Solia ga vua na tamata cakacaka na kena i sau.”

¹⁹ Kakua ni rogoca se vakadinata na ka e beitaki kina e dua na qase ka vakavo ga kevaka sa lewe rua se tolu na kena i vakadinadina e ratou sa tiko.

²⁰ Vunauci ira era cala ena matadra na tamata me ra rere kina na kena vo.

²¹ Au sa vakaroti iko oqo ena mata ni Kalou kei Jisu Karisito kei ira na agilosi digitaki mo muria na veivakaro oqo, me dodonu na nomu lewa ka kakua ni veitotaki.

²² Kakua ni vakusakusataka na nona tabaki e dua me la'ki veiqaravi kina ena cakacaka ni Turaga, se vakaitavi ena nona ca e dua na tamata; mo maroroi iko vinaka mo savasava tiko.

²³ Kakua ni gunuva wale tikoga na wai; ia mo dau gunuva vakalailai na waini me vukea na kena qaqi vinaka na kakana e ketemu, me vaka ni o sa dau tauvimate voli vakawasoma.

²⁴ Sa kune votu na nodra i valavala ca eso na tamata ka sa kauti ira ki na veilewai, ia na nodra i valavala ca eso ena qai kune vakamalua e muri.

²⁵ Sa vaka talega kina na kena kune votu na cakacaka vinaka; ia kevaka sara mada ga e sega, ena sega ga ni rawa ni vunitaki me tawamudu.