1 Timoci 3 - Vakavakadewa Vou kei na iVola tale eso

O Ira na Veiliutaki ena i Soqosoqo Lotu

¹ Oqo e dua na vosa dina: Kevaka e dua sa gadreva me veiqaravi vakaveiliutaki ena loma ni lotu, sa gadreva o koya na cakacaka uasivi ka vakaturaga.

² O koya sa veiliutaki ena loma ni lotu me tawa cala, me dua ga na watina, me tamata mamakutu, me yalomatua, me i tovo vinaka, me tamata vakasama vinaka, me dauvakacegui ira na tamata ena nona vale, me matau sara ena cakacaka ni veivakavulici;

³ o koya me kua ni daumateni se i tovo kaukauwa, ia me yalomalua ga ka yalomalumalumu; me kakua ni dau kocova na i lavo;

⁴ me rawa ni lewa vakavinaka na nona matavuvale ka tuberi ira na luvena me ra rogoca na nona vosa ena vakarokoroko.

⁵ Ni kevaka e dua na tamata sa sega ni lewa rawa vakavinaka na nona matavuvale, ena qai la'ki lewa rawa li vakaevei o koya na i soqosoqo lotu ni Kalou?

⁶ O koya me matua sara ena vakabauta, de qai viavialevu ka tini ena cudruvi me vakataki koya na tevoro.

⁷ E dodonu me tamata dokai mai vei ira na tamata ena taudaku ni lotu, me kakua kina ni vakamadualaki ka coriti ena dai ni tevoro.

O Ira na Dauveivuke Eso ena Soqosoqo Lotu

⁸ O ira talega na dauveivuke ena soqosoqo lotu sa dodonu me ra tamata i tovo vinaka ka yalodina. Me ra kua ni dau veivakaisini ena vosa; me ra kua ni gunuva vakasivia na waini se kocova na i lavo.

⁹ Ena lewa-e-loma e savasava, me ra taura matua na dina titobu ni vakabauta.

¹⁰ E dodonu me ra vakatovolei mada e liu, ka me qai vakadonui me ra veiqaravi kevaka sa rawati na veika e lavaki vei ira.

¹¹ Na watidra talega me ra i tovo vinaka ka me ra kakua ni daukakase; me ra yalomalumalumu ga ka yalodina ena ka kecega.

¹² O koya na dauveivuke ena soqosoqo lotu e dodonu me dua ga na watina, ka lewai ira vinaka na luvena kei na nona matavuvale.

¹³ O ira na dauveivuke era qarava vinaka na nodra i tavi era na vakairogorogo sara ka dokai vakalevu ena vuku ni nodra vakabauti Karisito Jisu.

Na i Tukutuku Vuni ni Noda Lotu

¹⁴ E noqu vola tiko na i vola oqo vei iko, au nuitaka me'u na lako totolo yani ka sotavi iko.

¹⁵ Ia kevaka au mani bera yani, o sa na kila rawa tiko o iko na ka e dodonu me ra vakaitovotaki ira kina na tamata ena vuvale ni Kalou, oqori na i soqosoqo lotu ni Kalou bula, na duru kei na yavu ni vakavuvuli dina.

¹⁶ Sa sega ni qai vakatitiqataka rawa e dua na kena cecere na i tukutuku vuni ni noda lotu: Sa rairai vakatamata na Kalou, Sa kena i vakadinadina na Yalo Tabu, Ka ra sa raici koya na agilosi. Sa vunautaki o koya vei ira na veimatanitu, Ka sa vakabauti e vuravura taucoko, Sa kau cake ena lagilagi ki lomalagi.