1 Samuela 9 - Vakavakadewa Vou kei na iVola tale eso

Rau Sota o Saula kei Samuela

¹ E dua vei ira na Penijamini, na yacana o Kisi, na luve i Epieli, na luve i Sirori, na luve i Pikaroci, na luve i Efia, mai na mataqali i Penijamini, ka tamata vutuniyau o koya.

² E dua na luvena tagane, na yacana o Saula, a cauravou totoka ka bulicaki vinaka. A sega ni dua tale vei ira na Isireli me sivia na kena totoka: mai na tabana ki na buredelana, a balavu cake vei ira kecega na tamata.

³ A yali eso na asa i Kisi na tama i Saula. A qai kaya o koya vei Saula na luvena, “Mo drau lako vata kei na dua vei ira na cauravou, ka la'ki vakasaqarai ira na asa.

⁴ E rau a curuma na vanua veidelana o Ifereimi, ka lako voli ena vanua o Salisa ia e rau a sega ga ni kunei ira na asa. E rau a lakova na vanua o Salimi, ia e rau a sega ni tiko e kea na asa. E rau a qai lakova na nodra vanua na Penijamini ka sega ga ni kunei ira.

⁵ Ni rau yaco yani ki na vanua o Sufi, a qai kaya o Saula vua na nona cauravou, “Me daru lesu tale, de qai lakolako qai ka wale vei tamaqu na nodra yali na asa, ka qai nuiqawaqawataki kedaru tale.”

⁶ A qai kaya vua na cauravou, “Raica, sa tiko e dau na tamata ni Kalou ena koro oqo, ka sa dokai vakalevu o koya, ena vuku ni kena dau yaco vakaidina na veika kece e dau tukuna. Me daru lako vua de rawa ni vakatakila vei kedaru o koya na ka e daru lako tiko kina oqo.”

⁷ A sa kaya o Saula vua na nona cauravou, “Raica, kevaka e daru lako vua, a cava me daru kauta vua? Sa oti na madrai ena nodaru kato, ka sega ni dua na ka ni loloma me daru kauta vua na tamata ni Kalou. A cava beka sa tu vei kedaru?”

⁸ A sa kaya tale vei Saula na cauravou, “Raica sa tu vei au oqo na i lavo e dua na i kava ni sikeli siliva; ka'u na solia vua na tamata ni Kalou, me vakatakila vei kedaru na nodaru sala.”

⁹ Ena gauna e liu e Isireli, ni lako e dua na tamata me taroga na Kalou, dau kaya vakaoqo: Me datou mai lako vua na daurairai: ni sa dau yacadra e liu na daurairai o koya sa vakatokai me parofita ena gauna oqo.

¹⁰ A sa kaya vua o Saula, “Sa vinaka sara ga na nomu tukuna; me daru lako.” E rau a qai lako yani ki na koro ka tiko kina na tamata ni Kalou.

¹¹ Ni rau lako cake tiko ena i cabecabe ki na koro, e rau a sota kaya eso na goneyalewa ka ra lako tiko mai me ra mai taki wai. E rau a qai tarogi ira, ka kaya, “E tiko li e ke na daurairai?”

¹² Era a sauma na goneyalewa ka kaya, “Ia, e vakakina; drau raica, e tiko ga e liu oqori vei kemudrau; mo drau vakatotolo sara ni qai yaco wale ga mai oqo ki na koro o koya, ka ni ra sa vakacaboisoro tiko edaidai na tamata ena tikina cecere.

¹³ Ia ena gauna ga drau yaco yani kina, drau na raici koya sara ni bera ni lako cake ki na tikina cecere me kana kina. Era a sega mada ni kana na tamata me yacova na gauna sa tiko kina o koya, ia ena vakalougatataka o koya na i soro, era na qai kana e muri na tamata sureti.

¹⁴ E rau a qai lako cake ki na koro o Saula kei na nona dauveiqaravi. Ni rau a curuma tiko yani na koro, e rau a raici Samuela sara ni lako donui rau tiko mai, ena nona i lakolako ki na vanua ni vakacaboisoro.

¹⁵ Ia, a sa vosa oti vei Saula o Jiova ena siga kadua ni bera ni lako mai o Saula, ka kaya,

¹⁶ “Ni mataka, ena gauna vata ga, au na tala vei iko e dua na tamata mai na vanua o Penijamini; ia mo lumuti koya me na liutaki ira na noqu tamata na Isireli, ka na vakabulai ira na noqu tamata mai na ligadra na kai Filisitia o koya. Au sa raica na nodra vakalolomataki na noqu tamata, ka ni sa yaco mai vei au na nodra tagi.”

¹⁷ Ia ni raici Saula o Samuela, a qai vosa vua o Jiova, ka kaya “Raica, sai koya oqo na tamata au a tukuna oti vei iko. Ena lewai ira na noqu tamata o koya.”

¹⁸ A toro voleka yani vei Samuela o Saula e matamata ni koro, ka kaya vua, “Mo tukuna mada vei au, se tiko e vei na vale i koya ka dautukuna na veika e se bera ni yaco?”

¹⁹ A qai sauma o Samuela, ka kaya, “Sai au ga oqo au dautukuna na veika e se bera ni yaco, ia mo drau liu yani ki na vanua ni vakacaboisoro. O kemudrau ruarua e datou na kana vata edaidai. Ena mataka lailai ni mataka, au na sauma kece sara na nomudrau taro ni bera ni drau lako yani.

²⁰ Me baleta na nomu asa ka ra yali tu me bogi tolu, mo kakua ni lomaleqa kina, ni ra sa kune tale. Ia o cei beka era sa vakanamata kina o ira kece na Isireli? E sega li ni o iko kei ira kece na lewe ni vale i tamamu?”

²¹ A sauma o Saula, ka kaya, “Au lewe ni mataqali i Penijamini oi au, ka oqori na mataqali lailai taudua e Isireli, ka'u sa lako mai na matavuvale e okati me lailai sobu mai vei ira kecega na vuvale e loma ni mataqali. Ia na cava na vuna o sa vosa kina vakaoqo vei au?”

²² Sa qai kauti Saula kei na nona cauravou o Samuela ki na vale ni kana, ka vakatikori rau ena tikina vakaturaga vei ira na sureti, ka rauta ni ra lewe tolusagavulu na tamata.

²³ A sa kaya o Samuela vua na daunivakasaqa, “Mo kauta mai na kakana ka'u a solia vei iko, o ya na kakana ka'u a tukuna mo maroroya toka vakatikitiki.”

²⁴ A sa kauta mai na daunivakasaqa na saga ni manumanu digitaki, ka vakarautaka ena mata i Saula. A sa kaya o Samuela, “Raica mada na kakana sa tu oqori e matamu. Mo kana; me vaka ni sa maroroi tu me baleti iko, mo donuya na siga digitaki oqo, me rawa ni o ni kana vata kei ira na sureti.” E rau a kana vata o Saula kei Samuela ena siga o ya.

²⁵ Ia ni ratou siro mai na vanua ni vakacaboisoro ki na koro, era sa vakarautaka na i davodavo i Saula ena dela ni vale:

²⁶ ka sa moce e kea. Ni ratou yadra ena mataka cake, a kacivi Saula yani o Samuela, “Mo duri mada, ka me'u la'ki talaci iko ena nomu i lakolako.” A sa tucake o Saula, ka rau mani lako vata sara yani kei Samuela ki gaunisala.

Lumuti Saula me Tui o Samuela

²⁷ Ia ni ratou lako sobu tiko yani ki na i bili ni koro, a qai vosa vei Saula o Samuela ka kaya, “Mo tukuna vua na nomu cauravou me liu mada yani.” A sa liu yani na cauravou dauveiqaravi ka sa kaya tale o Samuela, “O iko mo tei wawa mada vakalailai eke, me'u tukuna mada vei iko na vosa ni Kalou.”