1 Samuela 8 - Vakavakadewa Vou kei na iVola tale eso

Vinakata o Isireli me Dua na Nodra Tui

¹ Ni sa qase mai o Samuela, sa lesi rau na luvena tagane me rau turaganilewa vei ira na Isireli.

² Ia na yaca i koya na ulumatua o Joeli, kei na yaca i koya na kena i karua o Epaia, e rau turaganilewa ruarua tiko mai Pieri-sepa.

³ E rau a sega ni muria vakadodonu na i valavala e dau kitaka o tamadratou ia e rau a vuki me guta na i yau ka taura na i solisoli me rau vakatanitaka kina na lewa.

⁴ Era a soqoni vata o ira kecega na Isireli, ka ra lako vei Samuela ki Rama,

⁵ ka ra kaya vua, “Raica, o sa qase mai, ia o rau na luvemu e rau sa sega ni muria na nomu i valavala; ia oqo mo lesia mada vei keda e dua na tui me lewai keda me vakataki ira na veimatanitu kecega.”

⁶ Ia sa sega ni marautaka o Samuela na nodra kerekere, ni ra sa kaya, “Solia vei keimami e dua na tui me lewai keda.” Sa qai masu o Samuela vei Jiova,

⁷ ka sa vosa vei Samuela o Jiova, ka kaya, “Mo vakarorogo vei ira na tamata ena ka kecega era tukuna vei iko; ni ra sa sega ni beci iko, ia era sa beci au ga me'u kakua ni nodra tui.

⁸ Me tekivu mai na gauna au a kauti ira tani kina mai Ijipita, era a vakanadakui au ka qaravi ira na veikalou tani eso, ia era sa cakava tiko vei iko na ka ga era dau cakava vei au.

⁹ Ena ka oqo, mo qai rogoci ira mada ena veika era tukuna; ia mo vunauci ira vakadodonu, ka vakatakila vei ira na nona i valavala na tui ena lewai ira.”

¹⁰ A sa tukuna o Samuela na vosa kecega i Jiova vei ira na tamata era masuta vua me dua na nodra tui.

¹¹ A sa kaya vei ira o koya, “Oqo na veika ena cakava na tui ena lewai kemuni: Ena kauti ira na luvemuni o koya, ka lesi ira me ra yaga ena qiqi ni valu, ka me ra nona tamata ena mataivalu ose, ka so me ra liutaka na nona qiqi ni valu.

¹² Ia ena lesia o koya eso na turaganilewa me liutaki ira e lewe dua na udolu na tamata ka so me limasagavulu; eso me ra cukita na nona veiwere ena i siviyara, tamusuka talega na nona sila, ka cakava na nona i yaya ni valu kei na i yaya ni nona qiqi ni valu.

¹³ Ia ena kauti ira o koya na nomuni goneyalewa me ra caka kakana kamikamica, dauvakasasaqa, ka dauvavavi.

¹⁴ Ena kauta talega o koya na veika e uasivi mai na nomuni veiwere, na nomuni veiloganivaini, kei na nomuni veiolive, ka na solia vei ira na nona dauveiqaravi.

¹⁵ Ia ena kauta e yadua na kena i katini ni nomuni vua ni qele, kei na nomuni veiloganivaini, ka na solia vei ira na nona vakailesilesi kei na nona dauveiqaravi.

¹⁶ Ia ena kauti ira talega na nomuni tamata dauveiqaravi, kei na nomuni bulumakau digitaki, kei na asa me ra vakacakacakataki vua.

¹⁷ Ena kauta tani e yadua na i katini ni nomuni sipi. Ia ena yaco mo ni nona bobula oi kemuni.

¹⁸ Ena siga o ya, o ni na tagi ena vuku ni nomuni tui o ni a digitaka ga vakataki kemuni, ia ena qai sega sara ni rogoci kemuni o Jiova ena siga o ya.

¹⁹ Era sa bese ga ni vakarorogo na tamata vei Samuela, ka ra kaya, “E segai! Keimami sa vakadeitaka me na dua ga na neimami tui me lewai keimami,

²⁰ ka keimami na vakataki ira kina na veimatanitu kecega, o ya me vakatulewa ka liutaki keimami ki na i valu ka vala ena vukui keimami.”

²¹ A rogoca na nodra vosa kecega na tamata o Samuela, ka sa qai la'ki tukuna vei Jiova.

²² A sa kaya vei Samuela o Jiova, “Mo vakarorogo ki na nodra vosa, ka bulia vei ira e dua na tui.” A sa qai kaya vei ira na Isireli o Samuela me ra dui lesu tale na tamata yadua ki na nona koro.