1 Samuela 6 - Vakavakadewa Vou kei na iVola tale eso

Vakalesui na Kato ni Veiyalayalati

¹ A tiko na Kato ni Veiyalayalati ena nodra vanua na kai Filisitia me vula vitu na kena dede.

² Ia a qai kacivi ira na bete kei ira na daurairai o ira na kai Filisitia, ka kaya, “A cava mada me da cakava ena vuku ni Kato ni Veiyalayalati i Jiova?” Ni vakatakila mai vei keimami se me keimami vakauta vakaevei ki na kena i tikotiko.

³ Era a kaya, “Kevaka o ni sa vakauta lesu yani na Kato ni Veiyalayalati, ia mo ni kakua ni kauta wale ga yani. Mo ni vakauta vata kaya e dua na nomuni i loloma me i soro ni caka cala. Ena ka oqo, o ni na vakabulai kina, ka kila talega na vuna o ni totogitaki tikoga kina.”

⁴ Era sa taroga na tamata, “A loloma cava li me keimami vakauta vua?” Era sauma ka kaya, “E lima na i vakatakarakara koula ni mate vuce, kei na lima na kalavo koula me vaka na kedra i wiliwili na turaga ni Filisitia. Na mate veidewavi oqo sa vakatalai yani me tauvi kemuni kece vata kei iratou na tui e lima.

⁵ E dodonu mo ni cakava na i vakatakarakara ni mate vuce kei na kalavo sa vakacacana tiko na nomuni vanua, ka mo ni vakarokorokotaka na Kalou ni Isireli. Ena qai tarova beka o koya na nona veitotogitaki vei kemuni, kei ira na nomuni veikalou, kei na nomuni vanua.

⁶ A cava na vuna mo ni yalokaukauwa tiko kina me vakataka na tui Ijipita kei ira na kai Ijipita? Ni kua ni guilecava na nona a vakamatalialiataki ira na Kalou me yacova na gauna era a qai sereki ira kina na Isireli me ra biuti Ijipita.

⁷ Ia oqo, mo ni vakarautaka e dua na qiqi ni yaya vou kei na rua na bulumakau yalewa ka se sega ni taqa vei rau na i vua; ka me rau vauci vata kei na qiqi ni yaya ka vakatala lesu na luvedrau ki na valenimanumanu.

⁸ Me qai tauri na Kato ni Veiyalayalati i Jiova ka vakavodoki ki na qiqi ni yaya oqo, ka biuta koto e yasana e dua na kato lailai e tawa tiko e loma na i vakatakarakara koula o ni sa vakauta tiko me i soro ni caka cala vua. Dou qai vakatala mai na qiqi me lako mai vakataki koya ga.

⁹ Mo ni qai sarava na kena i lakolako: ni kevaka sa muria na sala ki na koro o Pecisemesi, eda na qai kila kina ni sa cakava vei keda na ka ca levu oqo na Kalou ni Isireli. Ia kevaka e segai, eda na kila kina ni a sega ni vakavuna na mate ca o koya; a ka ga sa dau yaco ena veigauna eso ki na tamata.”

¹⁰ Era a cakava vakakina na tamata; era a kauta e rua na bulumakau yalewa ka nokati rau ki na qiqi ni yaya, ka sogolatia na luvedrau ena valenimanumanu.

¹¹ Era a qai vakavodoka na Kato ni Veiyalayalati i Jiova ki na qiqi ni yaya, kei na kato lailai sa tu kina na i vakatakarakara koula ni mate vuce kei na kalavo.

¹² Ia erau a lako vakadodonu na bulumakau yalewa, ena sala ka gole ki Peci Semesi, e rau a muria na salatu, ka rau tagi voli, ka sega ni gole ki na i matau se ki na i mawi; era a muri rau o ira na nodra turaga na kai Filisitia ka yacova yani na i yalayala kei Peci Semesi.

¹³ Ia era a musu witi tiko e loma ni buca o ira na kai Peci Semesi, era sa tacake ka raica na Kato ni Veiyalayalati ka ra sa reki sara ni ra raica.

¹⁴ A sa lako yani na qiqi ni yaya ki na tikinivanua i Josua, na kai Peci Semesi, a sa la'ki tu vakadua kina. A duri tu e kea e dua na vatu levu; ka ra kolata na kau ni qiqi ni yaya me buka; ka vakacabori rau na bulumakau yalewa me i soro kama vei Jiova.

¹⁵ Era a tauca sobu na Kato ni Veiyalayalati i Jiova na Livai, kei na kato lailai a tu vata kaya, ka sa tu kina na veiyaya koula, ka tauca ena dela ni vatu levu, ka ra vakacabora na i soro kama kei na i madrali eso na kai Peci Semesi ena siga o ya vei Jiova.

¹⁶ Ia ni ratou raica oqo na turaga limalima ni Filisitia e ratou a lesu tale ki Ekironi ena siga o ya.

¹⁷ Ia na veisoso koula oqo era a solia mai na kai Filisitia me i soro ni caka cala vei Jiova: me dua ena vuku i Asitoti, e dua ena vuku i Qasa, ka dua ena vuku i Asikiloni, e dua ena vuku i Kaca kei na dua ena vuku i Ekironi;

¹⁸ kei na kalavo koula na i wiliwili ni veikoro kecega ni Filisitia, ka ratou taukena na turaga limalima, ka okati vata kina oqo na veikoro vakabai kei na veikoro lalai ki loma ni vanua. Ia sa kena i vakadinadina tu me yacova na siga oqo, na vatu levu o ya era a tauca kina na Kato ni Veiyalayalati i Jiova ena tikinivanua i Josua na kai Peci Semesi.

¹⁹ A sa vakamatei ira era lewe 70 na kai Peci Semesi o Jiova baleta ni ra la'ki rai ki na loma ni Kato ni Veiyalayalati. Era sa tagi ka vakaloloku na tamata ni ra sa lewe vuqa sa vakaleqai mai vei Jiova.

²⁰ Era a kaya na kai Peci Semesi, “O cei li e rawata me tu ena mata i Jiova na Kalou yalosavasava oqo?”

²¹ Era a tala eso na tamata vei ira na kai Kiriaci Jiarimi, ka ra kaya, “O ira na kai Filisitia era sa vakasuka tale mai na Kato ni Veiyalayalati i Jiova. Mo ni lako sobu mai ka kauta cake yani.”