1 Samuela 4 - Vakavakadewa Vou kei na iVola tale eso

Tauri na Kato ni Veiyalayalati

¹ Ena gauna o ya, era a lako yani na Isireli me ra vala vata kei ira na kai Filisitia; era a la'ki tiko mai Epenisa na Isireli, ka ra tiko mai Efeki na kai Filisitia.

² Era a tuvai ira vakaivalu na kai Filisitia me ra vala kei ira na Isireli: ia ni sa oti na veivaluvaluti levu oqo, era a qaqa na kai Filisitia vei ira na Isireli, ka ra vakamatea kina e rauta ni 4,000 na tamata.

³ Ni ra sa suka tale yani ki na i tikotiko vakaivalu o ira era bula mai na i valu, era a kaya na nodra qase na Isireli, “A cava na vuna sa ravuti keda kina edaidai o Jiova e matadra na kai Filisitia? Me da la'ki kauta mai na Kato ni Veiyalayalati i Jiova mai Sailo me rawa kina ni lako vata tiko kei keda o koya, ka vakabulai keda mai na ligadra na keda meca.”

⁴ Era sa talai ki Sailo na tamata me ra la'ki kauta mai na Kato ni Veiyalayalati i Jiova ni lewevuqa, o koya sa tiko ena tadrua ni Jerupimi. Erau tiko talega kei na Kato ni Veiyalayalati i Jiova o rau na luve i Ilai, o Ofinai kei Finiasi.

⁵ Ni sa yaco yani ki na i tikotiko na Kato ni Veiyalayalati i Jiova, era a tabalaka na kaila ni marau ena domoilevu o ira na Isireli kecega, a sa yavavala kina na vanua.

⁶ Ia ni ra rogoca na kai Filisitia na rorogo ni kaila, era a kaya, “A cava beka na i balebale ni kaila levu oqo, ena nodra i tikotiko na Iperiu? Era a qai kila ni sa kau mai na Kato ni Veiyalayalati ki na nodra i tikotiko”

⁷ Era a rere na kai Filisitia, ni ra kaya, “Sa lako mai e dua na kalou ki na nodra i tikotiko.” Era a kaya tale,

⁸ “Isa o keda! O cei beka ena vakabulai keda mai na ligadra na veikalou qaqa oqo? Sa o ira oqo na veikalou ka vakarusai ira na kai Ijipita ni tauvi ira na veimate lelevu mai na vanua lala.

⁹ Ni yaloqaqa na kai Filisitia! Dou vala me vaka na tagane, de qai yaco me da nodra bobula na Iperiu, me vaka na nodra a noda bobula tu e liu. Ni vala me vaka na tagane!”

¹⁰ A carubi na i valu o ira na kai Filisitia, ka ra vakadrukai o ira na Isireli, ka ra dui se na tamata yadua ki nodra vale; a yaco e dua na ravuravu levu; a mate e 30,000 na mata i valu yava ni Isireli.

¹¹ E a kovei na kato ni veiyalayalati; e rau a vakamatei na luve i Ilai o Ofinai kei Finiasi.

¹² A cici e dua na tamata mai vei ira na Penijamini mai na vanua ni veiraravui, a lako mai ki Sailo ena siga o ya ka kakadresudresu tu na nona i sulu, ka ubia talega na uluna ena qele.

¹³ Ia ni yaco yani, a dabe tiko o Ilai ena dua na i dabedabe e tutu ni sala, ka lava na utona ena nona ririkotaka na Kato ni Veiyalayalati. Ia ni lako mai na tamata o ya ka tukuna ena koro na ka a yaco, era a tagi na lewe ni koro taucoko.

¹⁴ Ni rogoca o Ilai na domo ni qoqolou, a kaya, “A cava era qolouvaka o ira oqo?

¹⁵ A 98 na yabaki i Ilai, a sa buwawa na matana, ka vovoleka sara me sega ni rai rawa.

¹⁶ A qai vosa vei Ilai na tamata o ya ka kaya, “Oi au sara ga oqo na tamata ka lako mai na i valu, ka'u a dro mai kina edaidai.” A kaya vua o Ilai, “I na luvequ, a cava sa yaco?”

¹⁷ A sauma vua o koya e mai tukutuku, “Era sa dro o ira na Isireli e matadra na kai Filisitia, a sa dua talega na ravuravu levu vei ira na tamata, e rau sa mate talega o rau na luvemu, o Ofinai kei Finiasi; a sa kovei na Kato ni Veiyalayalati.”

¹⁸ Ia ena gauna a cavuta tiko kina o koya na Kato ni Veiyalayalati, sa bale sobu vakatadraicake o Ilai mai na nona i dabedabe e tutu ni matamata ni koro. Sa qase sara o koya ka bibi, ia na nona bale oqo sa ramusu kina na domona ka mate sara talega kina. A lewai Isireli tu me yabaki vasagavulu.

¹⁹ Sa bukete tiko na vugoi Ilai, na wati Finiasi, ka sa voleka talega na gauna me vakasucu kina. Ia ni rogoca o koya na i rogorogo ni sa kovei na Kato ni Veiyalayalati, ka sa mate na vugona kei na watina, a vakasauri na nona taratara ka vakasucu sara.

²⁰ Ia ni sa voleka ni mate, era a kaya vua na yalewa ka ra qaravi koya tiko, “Mo yaloqaqa tiko! Sa sucu na luvemu gonetagane!” Ia sa sega ga ni vosa mai o koya se kauwai kina.

²¹ A sa vakayacana na gonetagane o ya me o Ikapote, ni sa vakamacalataka vakaoqo, “Sa biuti Isireli na lagilagi ni Kalou:” ni sa dusia na kena sa kovei na Kato ni Kalou kei na nodrau mate o watina kei na vugona.

²² A sa kaya, “Sa takali vei Isireli na i serau ni Kalou baleta ni sa kovei tani na Kato ni Kalou.”