1 Samuela 31 - Vakavakadewa Vou kei na iVola tale eso

Na Mate i Saula kei Iratou na Luvena

¹ Era a vala kei ira na Isireli na kai Filisitia; era a dro tani na Isireli mai vei ira na kai Filisitia, ka ra bale mate mai Ului Qiliboa.

² Era a cici muri Saula ka tauri koya kei iratou na luvena tagane na kai Filisitia; ka ra vakamatei Jonacani, Amenatave, kei Malikisua o iratou na luve i Saula.

³ Sa kaukauwa na i valu ena yasa i Saula, era sa vanai koya na dauvana ka sa mavoa bibi kina.

⁴ A sa kaya o Saula vua na nona dau cola i yaragi, “Mo ucuna na nomu i seleiwau, ka suaki au kina; de ra lako mai na tamata tawa cili oqo, ka suaki au, ka vakalialiai au.” A sa bese na daucola nona i yaragi; ni a rere vakalevu. A taura o Saula na nona i seleiwau ka bikaca.

⁵ Ia ni sa raica na dau cola i yaragi ni sa mate o Saula, sa bikaca talega na nona i seleiwau, ka mate vata kaya.

⁶ A sa mate o Saula vata kei iratou na luvena tagane, na nona dau cola i yaragi, kei ira kecega na nona tamata ena siga o ya.

⁷ Ia ni ra sa raica na Isireli era a tiko ena yasa ni buca ka dua, kei ira era tiko mai na tai ka dua ni Joritani, ni ra sa dro na Isireli, ka ratou sa mate o Saula kei iratou na luvena, era a qai biuta na nodra veikoro ka dro; era a curuma na kai Filisitia, ka la'ki tawana.

⁸ Ia ena mataka, ni ra a lako na kai Filisitia me ra luvata tani na nodra i sulu na moku, era a kunei Saula kei iratou na luvena tolutolu ni ratou a bale mate koto mai Ului Qiliboa.

⁹ Era a tamusuka na uluna, luvata tani na nona i yaragi, ka ra vakatadumata voli ki na nodra vanua na kai Filisitia, me ra tukuna ena burekalou ni nodra veimatakau, vei ira talega na tamata.

¹⁰ Era a ciqira na nona i yaragi ena burekalou i Aseteroci; ka ra vakota na yagona ki na bainikoro mai Pecisani.

¹¹ Ia ni ra rogoca na kai Jepesi Kiliati na ka era a kitaka vei Saula na kai Filisitia,

¹² era a cavutu o ira kecega na tamata qaqa, ka lako ena bogi taucoko o ya, ka la'ki kauta sobu na yago i Saula, kei na yagodratou na luvena, mai na bainikoro mai Pecisani, ka kauta tale mai ki Jepesi, ka vakama kina.

¹³ Era a kauta na suidratou, ka buluta ena ruku ni vunikau na Tamarisiki mai Jepesi, ka ra lolo me bogi vitu.