1 Samuela 30 - Vakavakadewa Vou kei na iVola tale eso

Na i Valu kei Ira na Amalekaiti

¹ Ia ni lako mai o Tevita kei ira na nona tamata ki Sikilaki ena i katolu ni siga, era a kaba koro kina na Amalekaiti, ka vaka talega kina ki Nejevi. Era a samuti Sikilaki ka vakama na koro ena bukawaqa,

² era a vakabobulataki ira na yalewa era tiko kina; era a sega ni vakamatea e dua e lailai, se e dua e levu, era a kauti ira ga, ka lako yani ena nodra i lakolako.

³ Ia ni tadu yani ki na koro o Tevita kei na nona tamata, era sa raica ni sa vakamai tu ena bukawaqa na nodra koro, era a kau vakabobula na watidra na luvedra tagane, kei na luvedra yalewa.

⁴ A tagi vakadomoilevu o Tevita kei na nona tamata me yacova ni ra sa oca sara ka sega ni tagi rawa.

⁵ E rau a kau talega vakabobula o rau na wati Tevita, o Einoami na yalewa ni Jesireli, kei Apikali na yalewa ni Kameli, na yada i Nepali.

⁶ A leqa vakalevu o Tevita; ni ra a rarawa vakabibi na nona tamata ena vuku ni luvedra era a kau vakabobula, ka ra nanuma kina me ra vakaviriki koya ena vatu. A vakaukauwataki koya ga o Tevita ena vuku i Jiova na nona Kalou.

⁷ A vosa o Tevita vei Epaiaca na bete, na luve i Eimeleki, ka kaya, “Mo kauta mada mai vei au na efoti.” A kauta mai na efoti vei Tevita o Epaiaca.

⁸ A tarogi Jiova o Tevita, ka kaya, “Kevaka au sa muria na mataivalu oqo, au na tauri ira li se sega?” A sa kaya o Jiova, “Mo muri ira ni o na tauri ira vakaidina, ka o na vakabulai ira na kau vakabobula.”

⁹ A lako yani o Tevita kei na lewe ono na drau na tamata era a tiko kaya, ka yaco yani ki na uciwai o Pisori, ka ra biu tiko kina eso vei ira.

¹⁰ Ia a tomana tikoga na veicemuri o Tevita kei ira na lewe va na drau na tamata; era a biu laivi tiko mai e lewe rua na drau na tamata ni ra a malumalumu, ka sega ni vuto kosova rawa na uciwai na Pisori.

¹¹ Era a kunea ena buca e dua na kai Ijipita, ka ra kauta vei Tevita, ka solia vua na kakana; a kana o koya, ka ra vagunuva ena wai.

¹² Era a solia vua e dua na tiki ni buli lolo, ka rua na i soso qerepi. Ia ni kana oti o koya, a vakilai koya tale, ni a sega tu ni kana se gunu me siga tolu ka bogi tolu.

¹³ A sa kaya vua o Tevita, “O cei na nomu turaga? E vei na vanua o lako mai kina?” A sa kaya vua o koya na cauravou, “Au kai Ijipita, ka'u nona tamata e dua na Amalekaiti; ka sa oti oqo e siga tolu na nona biuti au na noqu turaga ni'u a tauvi mate.

¹⁴ Keimami a valuta yani na vanua vaka-Kireci, oqori ena ceva kei Juta kei na nodra yasayasa na mataqali i Kelevi, ka keimami a vakamai Sikilaki.”

¹⁵ A sa kaya vua o Tevita, “O rawa li ni kauti au sobu ki na mataivalu oqori?” A sauma lesu na kai Ijipita, “Au na vakayacora vakakina kevaka o vosa ni bubuluitaka vei au ena yaca ni Kalou ni o na sega ni vakamatei au, se soli au yani vua na noqu turaga.”

¹⁶ A sa kauti Tevita sobu o koya. Ia o ira na i lala oqo era sa robota na vanua kece ni ra sa kana ka gunu, ka marau tiko baleta na i toki levu era a rawata mai na nodra vanua na kai Filisitia kei Juta.

¹⁷ A ravuti ira o Tevita kei ira na nona tamata, me vakatekivu mai na kida ni mataka ka yacova yani na yakavi ni siga kadua. A sega ni dua na tamata me dro bula rawa, ka vakavo ga era lewe 400 na cauravou era a vodo kameli rawa ka dro yani.

¹⁸ A rawata tale o Tevita na veika kecega era a kovea na Amalekaiti; ka rau vakabulai talega na watina ruarua.

¹⁹ A sega ni yali vei ira e dua na ka lailai se dua na ka levu, se na luvedra tagane, se na luvedra yalewa, se na i toki, se e dua na ka era a kovea me nodra, ka rawata kece tale mai o Tevita.

²⁰ A taura talega o Tevita na sipi kecega kei na bulumakau; era a qai liu yani na nona tamata, ka ra kaya, “Oqo na i toki ni valu i Tevita.”

²¹ A lako yani o Tevita vei ira na lewe rua na drau na tamata, me vaka ni ra a malumalumu sara ka sega ni muri Tevita rawa, ka ra mani kaya me ra tiko koso ga ena uciwai o Pisori; era a lako yani me ra tavaki Tevita, kei na nona tamata; a torovi ira yani o Tevita ka kidavaki ira.

²² Era a qai kaya o ira kecega na tamata ca, kei ira na vu ni ca era a lako vata kei Tevita, “Keimami na sega ni solia vei ira e dua na ka ena i toki ni valu eda sa rawata, ni ra a sega ni lako vata kei keda; ia me ra tauri ira yani na watidra kei na luvedra na tamata yadua, ka lako yani.”

²³ A sa kaya vei ira o Tevita, “Mo ni kakua sara ni cakava na ka oqo, na wekaqu, ena veika a solia vei keda o Jiova, o koya ka a vakabulai keda, ka solia ki ligada na mata i lala a mai vala kei keda.

²⁴ Ia o cei ena vakarorogo vei kemuni ena ka oqo? Me vaka na nona i votavota o koya e lako sobu ki na i valu, ena vakakina na nona i votavota o koya sa vakatawa i yaya: ena tautauvata na nodra i votavota.

²⁵ Ia mai na siga o ya a lesia o Tevita me kena i vakarau oqo, ka virikotora o koya na kena lawa me vakabau tiko ka yacova sara mai na siga oqo.

²⁶ Ia ni lako mai ki Sikilaki o Tevita, a vakauta eso na i toki vei ira na nona i tokani, o ira na qase mai Juta, ka sa kaya, “Raica, oqo e dua na ka ni loloma vei kemuni mai na i toki vei ira na meca i Jiova.”

²⁷ A sa vakauta yani vei ira sa tiko mai Peceli, o ira mai Remoci-nekipa, kei ira talega mai Jatiri,

²⁸ vei ira mai Aroeri, mai Sifimoci, mai Esitimoa;

²⁹ Rakali, vei ira na tiko ena nodra veikoro na kai Jiramieli, vei ira ena nodra veikoro na Kenaiti;

³⁰ vei ira mai Orima, Kori-asani, vei ira mai Ataki;

³¹ mai Epironi, kei na tikina kecega a dau tiko voli kina o Tevita kei ira na nona tamata.