1 Samuela 3 - Vakavakadewa Vou kei na iVola tale eso

Rairai vei Samuela o Jiova

¹ Ena gauna o ya, ena nona qaravi Jiova tiko na cauravou lailai o Samuela ena veituberi nei Ilai, sa vakavudua sara na kena voqa mai na vosa i Jiova ka sa sega ni levu na raivotu.

² Ena dua na bogi, a davo koto ena nona loga o Ilai, ni sa buwawa sara mai na matana.

³ A sa davo koto ena Vale i Jiova o Samuela, oqori ena tikina e koto kina na Kato ni Veiyalayalati. Ni voleka ni kida cake na mataka ni se bera ni boko na cina,

⁴ a sa kacivi Samuela o Jiova, ka kaya, “I Samuela! I Samuela!” A sa kaya o koya, “Sai au oqo!”

⁵ Sa cici yani vei Ilai, ka kaya, “Sai au oqo, o ni a kacivi au.” Sa kaya vua o Ilai, “Au a sega ni kacivi iko, mo la'ki davo tale.” A mani lesu tale o Samuela me la'ki davo.

⁶ A kaci tale o Jiova, ka kaya, “I Samuela!” A tucake o Samuela ka lako vei Ilai, ka kaya, “Sai au oqo, o ni a kacivi au?” A sauma o Ilai ka kaya, “Au a sega ni kacivi iko na luvequ; mo la'ki davo tale.”

⁷ Ia a sega mada ni se kilai Jiova o Samuela, ka sega talega ni se vakatakilai vua na vosa i Jiova.

⁸ A kacivi Samuela tale ena i katolu ni gauna o Jiova. A tucake o koya, ka lako vei Ilai, ka kaya, “O ni kacivi au, sa i au oqo.” A qai kila e kea o Ilai ni sai Jiova dina ga ka a kacivi Samuela tiko.

⁹ A sa kaya vei Samuela o Ilai, “Mo la'ki davo ga; ia kevaka e mani kacivi iko tale o koya, mo kaya vakaoqo, “Mo ni vosa mai, Jiova, ni'u sa vakarorogo na nomuni tamata!” Sa qai lako o Samuela ka davo ena nona i davodavo.

¹⁰ A sa lako mai o Jiova, ka tucake tu, ka kaci vaka e liu, “I Samuela! I Samuela!” A sauma o Samuela, “Mo ni vosa mai, ni'u sa vakarorogo na nomuni tamata.”

¹¹ A qai tukuna o Jiova vei Samuela, “Raica, au na cakava e dua na ka levu ka vakadomobula e Isireli ena kidroa kina na tamata kecega era rogoca.

¹² Ena siga o ya, au na vakayacora vei Ilai na veika kecega au a sa tukuna oti ena vukudra na nona lewe ni vuvale, mai na kena i tekivu ki na kena i tinitini.

¹³ Ni'u sa tukuna oti vua ni'u na totogitaki ira na nona lewe ni vuvale ka tawa mudu ena vuku ni valavala ca sa kila o koya, me baleta na nodrau vosacataka na Kalou o rau na luvena tagane ruarua, ka qai sega sara ni tarovi rau o koya.

¹⁴ Ia oqo, au sa bubului kina ena vukudra na lewe ni vuvale i Ilai ni na sega tale ni qai buluti na i valavala ca oqo mai na vakacaboisoro se madrali.”

¹⁵ A davo koto o Samuela me yacova na mataka; a sa qai duri cake ka dolava na i sogo ni vale i Jiova. A sa rere ni vakatakila na nona raivotu vei Ilai.

¹⁶ A kacivi Samuela o Ilai, ka kaya, “I Samuela na luvequ!” A sauma mai o Samuela, “Oi au saka oqo.”

¹⁷ A sa kaya vua o Ilai, “A cava sa tukuna vei iko o Jiova? Mo kakua ni vunia vei au e dua na ka. Ena cudruvi iko na Kalou kevaka o sega ni tukuna kece vei au na vosa e cavuta vei iko.”

¹⁸ Sa qai tukuna na veika kece o Samuela ka sega ni vunia e dua na ka. A sa kaya o Ilai, “Sa i koya ga o Jiova; ena vakayacora ga o koya na ka e vinaka ki vua.”

¹⁹ Ni sa tubu cake voli o Samuela, a sa tiko ga kei koya o Jiova ka vakavuna me yaco dina sara na veivosa kece e tukuna o Samuela.

²⁰ Era sa qai kila kecega na Isireli ka me vakatekivu mai dua na yasa ni vanua ki na dua tale ni sa parofita vakaidina i Jiova o Samuela.

²¹ A sa vakatakilai koya tikoga o Jiova mai Sailo, o ya mai na vanua ka a rairai kina vei Samuela ka vosa talega kina vua. Ia ni sa vosa o Samuela, era sa vakarorogo kecega o ira na Isireli.