1 Samuela 28 - Vakavakadewa Vou kei na iVola tale eso

¹ Ena gauna o ya, era a qai vakasoqona vata na nodra mataivalu o ira na kai Filisitia, me ra vala vata kei ira na Isireli. A sa kaya vei Tevita o Akisa, “Mo kila vakavinaka ni o sa na lako vata kei au ki na i valu, o iko kei ira na nomu tamata.”

² A sa kaya vei Akisa o Tevita, “O ni sa na qai kila vakaidina na ka e rawa ni cakava na nomuni tamata.” A sa kaya vei Tevita o Akisa, “O koya oqo, au sa lesi iko kina mo dau yadravi au ena vo ni nomu bula.”

Vakataroga na Daurairai o Saula

³ Ia oqo, a mate o Samuela, era a tagicaki koya o ira kecega na Isireli, ka buluti koya mai Rama ena nona koro. A vakatalai ira tani na daucurumi kei ira na daurairai o Saula mai na vanua o Isireli.

⁴ Era a soqoni vata o ira na kai Filisitia, ka ra la'ki vakaitikotiko e Sunemi; a soqoni ira vata kecega na Isireli o Saula, ka ra la'ki tiko mai Ului Qiliboa.

⁵ Ia ni raica o Saula na nodra mataivalu na kai Filisitia, sa tuburi koya na rere kei na loma taqaya.

⁶ E a vakasaqarai Jiova me taroga vua se na cava me vakayacora. Ia a sega vakadua ni sauma lesu o Jiova e dua na ka, ena tadra, se na vakawiri madigi, se ena gusudra na parofita.

⁷ Sa qai vakaroti ira na nona tamata o Saula ka kaya, “Ni vakasaqara mada mai e dua na yalewa sa daucurumi, me'u la'ki tarogi koya.” Era a qai kaya vua na nona tamata, “Raica, sa tiko mai Edoa e dua na yalewa sa daucurumi.”

⁸ A vakalecalecavi koya o Saula, sulumaka na i sulu tani, lako vata kei rau e lewe rua na tamata, ka ratou a qai lako yani vua na yalewa ena bogi. A sa kaya vua na yalewa o Saula, “Mo caka i sausau mada ena vukuqu ni o sa daucurumi, ka kauti koya mai vei au ka'u na cavuta vei iko.”

⁹ A sa kaya vua na yalewa, “Raica, o sa kila na ka sa cakava na tui o Saula, ni a vakamatei ira laivi na daucurumi kei ira na daurairai ena vanua o Isireli; ia ena vuku ni cava o sa qai via corita kina na noqu bula, me'u vakamatei?”

¹⁰ A bubului vua o Saula, ena yaca i Jiova, ka vaka, “Me vaka sa bula o Jiova ena sega ni yacovi iko e dua na ka ca ena vuku ni ka oqo.”

¹¹ A qai kaya vua na yalewa, “O cei me'u kauta cake mai vei iko?” A sa kaya vua o Saula, “Mo kauti Samuela cake mai vei au.”

¹² Ia ni raici Samuela na yalewa, a qoqolou ena domoilevu ka kaya vei Saula, “A cava o sa vakaisini au kina? O iko ga o Saula na tui?”

¹³ A sa kaya vua na tui, “Mo kua ni rere. A cava o sa raica tiko?” A sauma na yalewa ka kaya, “Au raica tiko oqo e dua na yalo e lako cake tiko mai na loma ni qele.”

¹⁴ A sa kaya vua o Saula, “E vakacava na kena i rairai?” A sa kaya vua na yalewa, “E dua na turaga ka sa qase sara e lako cake tiko mai. E tokara voli e dua na i tutuvi.” A qai kila e kea o Saula ni sai Samuela dina ga o ya; a sa cuva ki na qele ena vakarokoroko.

¹⁵ A sa kaya vei Saula o Samuela, “Na cava o vakayavalati au kina, ka vakavuna na noqu lako cake tale mai?” A sa kaya vua o Saula, “Au sa leqa vakalevu ni ra sa mai vala kei au na kai Filisitia, ka sa lako tani mai vei au na Kalou. E a sega mada ga ni vosa vei au, sega ena gusudra na parofita se ena tadra; ia au sa kacivi iko kina mo vakatakila vei au na ka me'u cakava.”

¹⁶ A sa kaya vua o Samuela, “Ia na cava o sa tarogi au kina, ni sa lako tani vei iko o Jiova, sa vuki tani o koya me kemu meca.”

¹⁷ Sa cakava vei iko o Jiova me vaka na nona vosa ka'u a tukuna; ni sa kaliraka mai vei iko na matanitu ka solia vei Tevita, o koya na kai nomu.

¹⁸ Ni o a sega ni vakarorogo ki na vosa i Jiova, ka sega ni vakarusai ira vakadua na Amalekaiti kei na ka kece era taukena; o koya oqo, sa cakava kina vei iko o Jiova edaidai na ka oqo.

¹⁹ Ia ena soli iko kei ira na Isireli o Jiova ki na ligadra na kai Filisitia; ia o iko kei iratou na luvemu dou sa na tiko kei au ni mataka, ena solia talega o Jiova na nodra mataivalu na Isireli ki na ligadra na kai Filisitia.”

²⁰ A bale vakasauri sara ka dodo ki na qele o Saula, a rere vakalevu ena vuku ni vosa i Samuela; a malumalumu sara o koya ni a sega tu ni kana ena siga taucoko o ya kei na kena bogi taucoko.

²¹ A toro vei Saula na yalewa, ka raica ni a taqaya vakalevu o koya, a kaya vua, “Raica, sa vakarorogo na nomuni vada ki na nomuni vosa, au sa tauca ki ligaqu na noqu bula, ka'u sa talairawarawa ki na nomuni vosa;

²² ia mo ni qai muria na vosa ni nomuni vada, ka me'u vakarautaka mada e dua na kemuni kakana; mo ni kana ka kaukauwa kina, ena nomuni i lakolako.

²³ A bese o koya ka kaya, “Au na sega ni kana.” Ia e ratou a cikevi koya, o rau na nona tamata kei koya na yalewa; ia e muri a qai muria na nodratou vosa. A duri cake mai na qele, ka dabe ena mocemoce.

²⁴ E a susuga voli na yalewa oqo ena nona i tikotiko e dua na bulumakau yalewa yago vinaka. A kusarawa na yalewa, vakamatea, taura na valawa, natuka, ka vavia na madrai sega ni vakatubu.

²⁵ A kauta vei Saula, vei ira talega na nona tamata; era a qai kana, cavutu, ka lako yani ena bogi tikoga o ya.