1 Samuela 26 - Vakavakadewa Vou kei na iVola tale eso

Karua ni Gauna e Sega ni Vakamatei Kina o Saula

¹ Era a qai lako mai vei Saula ki Qibea o ira na kai Sifi, ka kaya vua, “Sa vunitaki koya tiko o Tevita ena ulunivanua o Ekila, ena tokalau kei Jesimoni.”

² A cavutu o Saula kei ira e lewe tolu na udolu na sotia digitaki ni Isireli ka ra lako sobu ki na veikau mai Sifi me ra vakasaqarai Tevita.

³ A la'ki tiko o Saula ena ulunivanua o Ekila, ka koto ena bati ni sala ena tokalau kei Jesimoni. A tiko ga mai veikau o Tevita; ia ni raica ni a muri koya yani ki veikau o Saula;

⁴ a qai tala eso na tamata o Tevita me ra yamata, ka qai kila kina ni a lako dina mai o Saula.

⁵ A qai cavutu o Tevita ka lako ki na tikina a tiko kina o Saula; a raica o Tevita na tikina e koto kina o Saula kei Epineri na luve i Neri, na kavetani ni nona mataivalu. A moce o Saula ena loma ni keba, ka ra a moce vakavolivoliti koya na nona tamata.

⁶ A vosa vei Eimeleki na Itaiti o Tevita, vua talega na luve i Seruwaia, o Avisai, na taci Joape, ka kaya, “O cei vei kemudrau ena lako sobu vata kei au vei Saula ki na nona i tikotiko?” A sa kaya o Avisai, “Au na lako sobu vata kei iko.”

⁷ E rau a qai lako vei ira na tamata ena bogi o Tevita kei Avisai; ka raica a moce koto o Saula ena loma ni tikotiko, a cobaraki tu ki na qele na nona moto volekata na uluna; era a moce vakavolivoliti koya o Epineri kei ira na nona mataivalu.

⁸ A sa kaya vei Tevita o Avisai, “Sa solia edaidai na kemu meca ki na ligamu o Jiova na Kalou; ia oqo, me'u cokai koya mada vakadua ena moto ki na qele, ia ka'u na sega ni vakaruataka vua.”

⁹ A sa kaya vei Avisai o Tevita, “Mo kakua ni vakamatea; o cei li me dodoka na ligana vua sa lumuta o Jiova, ka sega ni cala kina?”

¹⁰ A sa kaya tale o Tevita, “Me vaka sa bula o Jiova ena vakamatei koya ga o Jiova; se na yaco na siga me na mate kina, se ena lako sobu ki na i valu, ka mate kina.

¹¹ Sa vakatabuya vei au o Jiova me'u dodoka na ligaqu vua e dua sa lumuta me tui; ia mo kauta mada mai na moto ka tu ena uluna, kei na saqa wai, me daru qai lako.”

¹² A kauta o Tevita na moto kei na saqa wai mai na ulu i Saula, ka rau mani lako sara yani. A sega sara ni dua na tamata a raica se kila na ka sa yaco se dua e yadrava; era a moce lutu kecega me vaka sa vakavuna vei ira o Jiova.

¹³ A lako ki na yasana kadua o Tevita, ka tu vakayawa e dela ni ulunivanua, me veiyawaki sara kei ira;

¹⁴ a qai kaci vei ira na tamata i valu o Tevita, vei Epineri talega na luve i Neri, ka kaya, “O sa sega beka ni rogoci au Epineri?” A vosa mai o Epineri, ka kaya, “O cei sa kaciva na tui?”

¹⁵ A sa kaya vei Epineri o Tevita, “Sa sega li ni tagane qaqa o iko? O cei vei ira na Isireli e veiucui kei iko? Ia ka cava o sa sega kina ni yadrava na nomu turaga, na tui? Ni sa lako mai e dua na tamata me vakamatea na tui na nomu turaga.

¹⁶ A sega ni vinaka na ka o cakava oqo. Me vaka sa bula o Jiova, sa dodonu mo mate, ni o a sega ni yadrava na nomu turaga me vaka a lumuti koya o Jiova na Kalou. Ia sa e vei mada na moto ni tui kei na saqa wai ka a koto e uluna?”

¹⁷ A kila na domo i Tevita o Saula, ka kaya, “E sega li ni oqo na domo i Tevita na luvequ?” A sa kaya o Tevita, “A domoqu ga, noqu turaga na tui.”

¹⁸ A sa kaya vua o Tevita, “A cava beka na vuna o ni vakasasataki au kina, na nomuni tamata? Na cava au cakava? Na cala cava beka au sa beitaki kina?

¹⁹ Kemuni saka na tui, mo ni rogoca mada na nona vosa na nomuni tamata. Kevaka e vakavuna o Jiova mo ni kequ meca, ena rawa ni veisautaka na nona vakatulewa o Jiova ke cabori vua e dua na i madrali. Ia ke ra cakava oqo o ira ga na tamata, me qai vakarusai ira o Jiova e matana baleta ni ra sa vakatalai au tani mai na nona vanua o Jiova me'u gole yani kina ki na dua na vanua e qaravi duadua ga kina na veikalou tani.

²⁰ Mo ni kakua ni vakatara me'u la'ki mate ena dua tani na vanua, ka yawa mai vei Jiova. A cava na vuna me lako mai kina na tui Isireli me mai vakamatea e dua na kutu ni manumanu me vakataki au? Na cava e mai vakasasataki au kina me vaka e dua na manumanu ni veikau?”

²¹ Sa qai sauma o Saula, “Au sa caka cala; mo lesu tale mai Tevita na luvequ! Au na sega ni vakacacani iko tale, ni o a maroroya na noqu bula ena bogi edaidai. Au a vakayacora eso na cakacaka vakalialia, kau sa cala vakalevu sara kina.”

²² A sauma lesu o Tevita ka kaya, “Sa tu saka oqo na nomuni moto, kemuni na tui! Me lako mada mai e dua vei ira na nomuni cauravou me mai kauta yani.

²³ Sa dau saumi ira na yalododonu kei na yalodina o Jiova. Sa soli kemuni o Jiova ki na ligaqu edaidai, ia au a sega ni vakamavoataki kemuni, oi kemuni na i lumuti i Jiova.

²⁴ Me vaka ga ni'u sa vakabulai kemuni edaidai, me yalololoma o Jiova me vakayacora vakakina vei au ka vakagalalataki au mai na noqu leqa kece sara!”

²⁵ Sa tukuna vei Tevita o Saula, “I na luvequ, me vakalougatataki iko o Jiova! O na vakayacora e vuqa na ka, ka o na rawata sara vakavinaka!” Sa qai lako yani o Tevita ena nona i lakolako, ka lesu tale o Saula ki na nona vale.