1 Samuela 25 - Vakavakadewa Vou kei na iVola tale eso

Na Mate i Samuela

¹ Sa qai mate o Samuela; era a soqoni vata o ira kece na Isireli, tagicaki koya, ka buluti koya ena nona vale mai Rama. A cavutu o Tevita, ka lako sobu ki na veikau mai Perana.

O Tevita kei Apikali

² A sa dua na tamata mai Maoni, a tiko mai Kameli na nona i yau. A vutuniyau sara na tamata o ya; e tolu na udolu na nona sipi mai Kameli.

³ Na yaca ni tamata o ya o Nepali, ia na yaca i watina o Apikali. A yalewa yalomatua ka matavinaka; ia na tagane e yalo takelo, ka ca na nona i valavala; e dua vei ira na mataqali i Kelevi o koya.

⁴ A rogoca mai veikau o Tevita ni a kotivi ira tiko na nona sipi o Nepali.

⁵ A qai tala e lewe tini na cauravou o Tevita ka kaya, “Ni lako cake ki Kameli vei Nepali, kidavaki koya ka cavuta vua na yacaqu.

⁶ Ia mo dou vosa vua, ka kaya, ‘Me nomu na vakacegu, kei ira kece na lewe ni vale, ka me sautu na veika kecega e nomu.

⁷ Au rogoca ni ra tiko na nomu daukoti sipi; ia era a tiko vei keimami na nomu i vakatawanisipi; ka keimami a sega ni vakacacani ira, a sega ni dua na ka a yali vei ira ena gauna kece era a tiko kina mai Kameli.

⁸ Mo tarogi ira mada na nomu cauravou, ka ra na tukuna vei iko. Ia me ra kune loloma e matamu o ira na noqu cauravou, ni keimami na lako yani ena siga ni kana magiti. Au masuta mo solia mada vei keimami, ka vakakina vei ira na nomu tamata, kei na luvemu o Tevita eso na ka sa tu vei iko.’ ”

⁹ Ia ni ratou a lako mai na cauravou i Tevita, e ratou a qai tukuna vei Nepali na ka kecega sa tukuna vei iratou o Tevita; ka ratou mai wawa toka yani.

¹⁰ A vosa vei iratou na tamata i Tevita, ka kaya, “O cei o Tevita? Ia o cei na luve i Jese? Era lewe levu sara na tamata ena gauna oqo era a biuta na nodra turaga, ka dro.

¹¹ Ia me'u taura na kequ kakana, na mequ wai, kei na lewe ni noqu manumanu ka'u sa vakamatea me kedra na noqu tamata daukoti sipi, ka solia vei ira na tamata au sega ni kila na vanua era lako mai kina?”

¹² E ratou a lesu tale na tamata i Tevita, ka la'ki tukuna vua na vosa kece i Nepali.

¹³ A sa kaya vei ira na nona tamata o Tevita, “Me vauci ki tolona na nona i seleiwau na tamata kece!” Era a dui vauca kece na nodra i seleiwau ka vaka talega kina o Tevita; era a muri Tevita yani e lewe va na drau na tamata, ka ra vakatawa i yaya e lewe rua na drau.

¹⁴ A qai tukuna vei Apikali na wati Nepali e dua vei ira na cauravou ka kaya, “Raica, sa tala mai eso na nona tamata mai veikau o Tevita me veikidavaki kei Nepali na neitou turaga; ia a qai cudruvi iratou o koya.

¹⁵ Ia ni keitou a tiko ena veiwere, era a caka vinaka sara vei keitou o ira na nona tamata, ka sega ni yacovi keitou e dua na leqa; a sega talega ni dua na ka yali vei keitou ena veisiga kece keitou a tiko kina kei ira.

¹⁶ Era a neitou bai ena bogi kei na siga kei na gauna kecega keitou a tiko kina kei ira ena neitou a vakatawa sipi tiko.

¹⁷ Ia oqo mo kila ka lewa mada na ka mo cakava; ni a cakacaka na vu ni ca me vakarusa na neitou turaga kei ira kecega na nona lewe ni vale; ni sa vu ni ka o koya, ka sega ni via vakarorogo vua e dua na tamata.”

¹⁸ A cakacaka totolo sara, o Apikali, ka taura e rua na drau na i buli madrai, rua na tavaya na waini, lima na sipi a vakarautaki oti, lima na i vakarau sila tavu, dua na drau na i soso qerepi, rua na drau na i buli lolo, ka vakavodoka ki na asa.

¹⁹ A vosa vei ira na nona cauravou o Apikali, ka kaya, “Ni liu yani, au na qai muri kemuni yani.” Ia sa sega ni tukuna o koya vei Nepali na watina.

²⁰ Ia ni vodoka yani na nona asa o Apikali, ka yacova sara na ruku ni ulunivanua, a raica ni a lako sobu mai donui koya o Tevita kei ira na nona tamata; ka toro volekati ira yani o koya.

²¹ Ia se qai kaya oti toka o Tevita, “E dina a sega ni yaga na noqu vakatawana na nona manumanu kei na nona ka kecega mai veikau o la na tamata oqo, ka sega kina ni dua na ka e yali mai na veika kecega e nona, ia a sauma vei au ena ca, me i sau ni ka vinaka.

²² Me cakacaka vakakina na Kalou vei ira na meca kecega i Tevita, ka vakaikuritaka kevaka au na vakabula e dua bulu na nona tamata me yacova na mataka.”

²³ Ia sa ni raici Tevita o Apikali; a sobu sara mai vakatotolo ena nona asa ka cuva vakatoboicu e mata i Tevita, cuva sobu ki na qele,

²⁴ ka cuva ki na yavana, ka kaya, “Me saumi vei au, na noqu turaga, na ka ca, ia me'u vosa mada vei kemuni oi au na nomuni vada, ka mo ni rogoci koya mada.

²⁵ Mo ni kakua ni kauwaitaki Nepali, a tamata sega na betena! O koya e tautauvata vinaka sara ga kei na i balebale ni yacana — a tamata lialia! Au a sega ni tiko e kea ena gauna e ratou a yaco mai kina na nomuni tamata.

²⁶ Ia oqo, na noqu turaga, me vaka sa bula o Jiova ka sa bula na yalomuni, ni sa tarovi kemuni o Jiova mo ni kakua ni lako yani me ia na veivakamatei, ka sauma na ka sa caka vei kemuni, ena ligamuni; ia me ra vakataki Nepali mada ga o ira na kemuni meca kei ira era saga me ra vakayacora na ka ca vei kemuni na noqu turaga.

²⁷ Ia na ka ni loloma oqo, au sa kauta mai na nomuni vada vei kemuni na noqu turaga, mo ni solia vei ira na nomuni cauravou era muri kemuni mai.

²⁸ Mo ni kakua ni cudruvi au na nomuni vada ena vuku ni noqu cala; ni sa vakataudeitaka vakaidina o Jiova na nomuni vale; ni o ni sa valataka tiko na i valu i Jiova o kemuni, ka na sega na ca e kune vei kemuni ena gauna taucoko ni nomuni bula.

²⁹ Ia kevaka era na tucake eso na tamata me ra cemuri kemuni mo ni mate kina, ena vauca ga na yalomuni na i vau bula ni veimaroroi i Jiova na nomuni Kalou; ena rabotaka tani o koya na nodra bula na kemuni meca, me vaka mai na loma ni rabo.

³⁰ Ia ni sa cakava oti vei kemuni o Jiova na veika vinaka kecega a yalataki oti ena vukumuni, ka lesi kemuni mo ni nodra turaga na Isireli;

³¹ ia me qai kakua ni ka ni rarawa vei kemuni na ka oqo, se me ca kina na lomamuni na noqu turaga, ni sa vakadavei wale ga na dra ni tamata, se na nomuni sauma na ka ca sa caka vei kemuni na noqu turaga. Ia ni sa vakalougatataki kemuni oti o Jiova, au sa kerea na noqu turaga mo ni qai nanumi koya saka mai na nomuni vada.”

³² A qai kaya vei Apikali o Tevita, “Me vakacaucautaki o Jiova na Kalou ni Isireli, o koya ka a talai iko mai edaidai mo tavaki au.

³³ Ia me vakavinavinakataki na nomu vuku, ka mo kalougata o iko ka tarovi au edaidai me'u kakua ni ia na veivakamatei, ka sauma na ca sa caka vei au.

³⁴ Ia sa dina me vaka sa bula o Jiova na nodra Kalou na Isireli, o koya ka tarovi au me'u kakua ni vakacacani iko, kevaka o a sega ni kusarawa mo lako mai ka tavaki au, sa na sega dina ga ni vo vei Nepali e dua tale na tagane me yacova na mataka.”

³⁵ A ciqoma e ligana o Tevita na veika a kauta mai ka kaya vua, “Mo lako cake ena vakacegu ki na nomu vale; ni ka'u sa rogoca na nomu vosa, ka vakadonuya na nomu vakatutusa.”

³⁶ A lesu tale vei Nepali o Apikali; ka ni a caka magiti tiko o koya ena nona vale me vaka na magiti sa ganita e dua na tui; a marau na yalo i Nepali, ni a mateni tiko, ia sa sega ni tukuna vua o koya e dua na ka me yacova na rarama ni mataka.

³⁷ Ia ena mataka ni sa seyavu tani vei Nepali na mateni; a qai tukuna vua o watina na ka kecega, a mate na yalona e lomana ka galu me vaka na vatu.

³⁸ Ni oti e rauta ni tini na bogi, a qai mokuti Nepali o Jiova ka mani mate kina.

³⁹ Ia ni rogoca o Tevita ni sa mate o Nepali, a kaya, “Me vakavinavinakataki o Jiova; o koya sa cudruvaka na vosa ka cakava vei au o Nepali, ka tarovi ira kina na nona tamata me ra kakua ni vakayacora na cala. A sauma vei Nepali o Jiova na nona i valavala ca. A qai talatala o Tevita me la'ki vosaki o Apikali, me mai watina.

⁴⁰ E ratou a qai lako vei Apikali ki Kameli na tamata i Tevita, ka vosa vua, ka kaya, “Sa talai keitou mai o Tevita me keitou kauti iko mo la'ki watina.”

⁴¹ A cavutu o koya ka vakacuva na matana ki na qele, ka kaya, “Raica, na nomu vada e dauveiqaravi ga me vuya na yavadra na nona tamata na noqu turaga.

⁴² A tucake vakatotolo o Apikali, la'ki vodoka na nona asa, ka ratou muri koya yani e lewe lima na nona goneyalewa dauveiqaravi, e ratou a qai muri iratou yani na tamata i Tevita. A yaco me wati Tevita o Apikali.

⁴³ A sa kauti Einoami talega na yalewa ni Jesireli o Tevita; a rau sa watina ruarua.

⁴⁴ Ia o Saula sa soli Mikali na luvena yalewa oti tu, o koya ka a wati Tevita, kivei Paliti na luve i Leisi, o koya na kai Kalimi.