1 Samuela 23 - Vakavakadewa Vou kei na iVola tale eso

Vakabula o Tevita na Koro o Keila

¹ Era a qai kauta vei Tevita na i tukutuku, ka kaya, “Raica, era sa la'ki valuti Keila o ira na kai Filisitia, ka ra sa butakoca tiko na sila tamusuki vou.”

² E a qai tarogi Jiova o Tevita, ka kaya, “E sa dodonu li me'u la'ki mokuti ira na kai Filisitia oqo?” A sa kaya vei Tevita o Jiova, “Mo la'ki valuti ira na kai Filisitia, ka vakabulai Keila.”

³ Era a qai kaya vei Tevita o ira na nona tamata, “Raica, keimami sa rere na tu oqo e Juta; ia sa na qai wacava li kevaka eda na lako ki Keila ka vala kei ira na mataivalu ni Filisitia?”

⁴ Sa qai tarogi Jiova tale o Tevita. A sauma o Jiova ka kaya, “Mo lako ka valuti Keila, ni'u sa soli ira na kai Filisitia ki na ligamu.”

⁵ E a qai lako o Tevita kei ira na nona tamata ki Keila, ka valuti ira na kai Filisitia. Era a vakamatei kina e vuqa na Filisitia ka ra kauta na nodra manumanu. A vakabulai ira na kai Keila o Tevita.

⁶ Ena gauna sa dro kina vei Tevita ki Keila o Epaiaca na luve i Eimeleki, a sa kauta voli e dua na efoti.

⁷ Sa tukuni vei Saula ni a lako ki Keila o Tevita. A qai kaya o Saula, “Sa soli koya na Kalou ki na ligaqu. Sa coriti koya vakaikoya ga o Tevita ni sa curuma na koro sa vakabai ena kaukamea.”

⁸ A kacivi ira kina na tamata kecega o Saula me ra ia na i valu, ka me ra lako sobu ki Keila me buku na druadrua ni koro, ka vesu kina o Tevita kei ira na nona tamata.

⁹ Ni sa kila o Tevita na nona via nakicataki koya tiko o Saula; a qai kaya vei Epaiaca na bete, “Mo kauta mai na efoti.”

¹⁰ A qai vosa o Tevita ka kaya, “I Jiova na Kalou ni Isireli, sa rogoca vakaidina na nomuni tamata ni sa nakita tiko o Saula me lako mai Keila, me vakarusa na koro ena vukuqu.

¹¹ Era na soli au yani beka li na kai Keila ki na liga i Saula, se sega? Ena lako sobu li mai o Saula me vaka a rogoca na nomuni tamata se segai? Kemuni Jiova na Kalou ni Isireli, au vakamasuti kemuni mo ni tukuna mada vua na nomuni tamata!” Sa qai tukuna o Jiova, “Ena lako sobu mai o Saula.”

¹² A sa kaya tale o Tevita, “Era na soli au yani li kei ira na noqu tamata ki na liga i Saula o ira na kai Keila, se sega?” A sa kaya o Jiova, “Era na soli kemuni yani.”

¹³ Sa qai lako o Tevita kei ira na nona tamata era lewe ono beka na drau. Ia ni sa tukuni vei Saula ni sa dro tani mai Keila o Tevita, a sa vakadaroya na nona i tuvatuva.

Vunitaki Saula o Tevita ena Veidelana

¹⁴ A vunitaki koya voli o Tevita mai na ulunivanua ena loma ni veikau mai Sifi. A vakasaqarai koya ena veisiga kecega o Saula, ia sa sega ni via soli Tevita yani vei Jiova.

¹⁵ A rere o Tevita ni vakasaqarai koya o Saula me vakamatei koya. A tiko voli ga o Tevita mai Oresi ena vanua lala e volekati Sifi.

¹⁶ A cavutu o Jonacani na luve i Saula, ka lako yani vei Tevita ki Oresi, ka vakauqeti koya ena yalayala ni veitaqomaki ni Kalou.

¹⁷ A sa kaya vei Tevita o Jonacani, “Mo kakua ni rere; ni na sega ni rawai iko na liga i Saula na tamaqu; ni o sa na nodra tui na Isireli, ia oi au, au na tarovi kemuni; ia na ka kece oqo sa kila vinaka tu o Saula na tamaqu.”

¹⁸ E rau a qai veiyalayalati ena mata i Jiova; sa tiko ga o Tevita e Oresi, ia o Jonacani sa lesu tale yani ki na nona vale.

¹⁹ Era a qai lako cake na kai Sifi vei Saula ki Qibea, ka kaya vua, “Sa vunitaki koya tiko o Tevita ena veivanua dredre mai Oresi ena ulunivanua o Akila, ka koto ena ceva kei Jesimoni.

²⁰ Ia oqo mo ni lako sobu mada mai na tui me vaka na gagadre ni yalomuni; ia sa na neimami i tavi na soli koya yani ki na ligamuni.”

²¹ A sa kaya vei ira o Saula, “Me vakalougatataki kemuni o Jiova, ni o ni sa lomani au.

²² Ni lako mada yani ka vakadinadinataka sara; mo ni raica sara na tikina sa dau tiko kina, kei koya sa raici koya e kea. Au rogoca ni tamata qaseqase sara o koya.

²³ Ia mo ni vakaraica vakavinaka sara na veivanua eso e dau vunitaki koya voli kina. Ia au na lako vata kei kemuni; kevaka e tiko ena vanua oqo, au na vakasaqarai koya vei ira kecega na udolu e Juta.”

²⁴ Era a cavutu, ka liu vei Saula ki Sifi. Ia o Tevita kei ira na nona tamata, era a tiko ena veikau mai Maoni ki Arapa ena ceva kei Jesimoni.

²⁵ A lako o Saula kei ira na nona tamata me ra vakasaqarai koya. A tukuni vei Tevita; a lako sobu o koya ki na uluvatu, ka tiko ena veikau mai Maoni.

²⁶ A tiko o Saula ena dua na yasa ni ulunivanua, ia o Tevita kei ira na nona tamata era a tiko ena yasana ka dua; a vakatotolo o Tevita me dro tani mai vei Saula, ia o Saula kei ira na nona tamata era a voleka sara vei Tevita me ra vesuki koya.

²⁷ A lako mai vei Saula e dua na i talai, ka kaya vua, “Mo kusarawa, ka lako mai; ni ra sa curuma vakaivalu na vanua o ira na kai Filisitia.”

²⁸ A cegu mai na nona muri Tevita o Saula, ka lesu, ka la'ki vala kei ira na kai Filisitia; o koya ka vakatokai kina na tikina o ya me o Selamalikoci, a kena i balebale na Vatu ni Drobula

²⁹ A lako cake mai kea o Tevita, ka la'ki tiko ena veivanua dredre mai Eniketi.