1 Samuela 22 - Vakavakadewa Vou kei na iVola tale eso

Nodra Vakamatei na Bete

¹ A lako tani mai Kaca o Tevita, ka dro bula ki na qara mai Etulama. Ni ra sa rogoca na tuakana kei ira kecega na lewe ni vale i tamana ni sa tiko mai kea, era sa qai lako sobu vua.

² O ira kece sa vakasaurarataki, se tiko na nodra dinau, se yalo rarawa voli, era sa soqoni vata yani vua, ka sa yaco me nodra i liuliu o koya. E rauta ni ra lewe 400 na tamata era sa tiko vata kaya.

³ Mai na vanua o ya, a sa lako yani o Tevita ki Misipa mai Moapi ka kaya vua na tui Moapi, “Au kerea me rau mai tiko mada eke na tamaqu kei na tinaqu me yacova na gauna au sa kila kina na ka ena cakava vei au na Kalou.”

⁴ A sa biuti rau na nona i tubutubu o Tevita ki vua na tui Moapi, ka rau tiko mai kea ena gauna kece a vunitaki koya voli kina o Tevita ena qara ni valu.

⁵ A sa lako mai vei Tevita na parofita o Kata ka kaya vua, “Mo kakua ni tiko eke: ia mo lako ki na vanua o Juta.” A sa lako yani o Tevita vaka ki na veikau mai Ereci.

⁶ A sa tiko o Saula mai Qibea ena dua na siga, ka dabe toka ena ruku ni vuni tamarisi, a roqota toka na nona moto e ligana ka ra duri wavoliti koya na nona tamata. Ni sa rogoca o Saula ni sa kune o Tevita kei ira na nona tamata,

⁷ a sa kaya vei ira na nona tamata, “Dou rogoca oqo, na yavusa Penijamini! Dou nanuma beka ni na solia kece vei kemudou o Tevita na veiloganivaini ka lesi kemudou talega mo dou turaganivalu ni nona mataivalu?

⁸ Oqori beka na vuna o ni sa bukiveretaki au tiko kina? E sega ni dua vei kemudou e bau tukuna vei au na veiyalayalati e rau sa vakayacora na luvequ vata kei Tevita. Sa sega ni dua e bau kauwaitaki au, se me tukuna vei au ni dua ga vei ira na noqu tamata, oqori o Tevita, e sa saga tiko me vakamatei au, ka sa vakauqeti koya o na luvequ me kitaka vakakina!”

⁹ A qai sauma o Teoki na kai Itomi, o koya sa lesi me vakaraici ira na tamata i Saula, ka kaya vua, “Au a raica na luve i Jese ni a lako mai ki Nopi, vei Eimeleki na luve i Eitupi.

¹⁰ A sa tarogi Jiova o Eimeleki se na cava me na vakayacora o Tevita, ka sa solia vua eso na kakana kei na i seleiwau i Koliaci na kai Filisitia.”

¹¹ A tala na tui me kacivi o Eimeleki na bete, na luve i Eitupi, kei ira kecega na lewe ni vale i tamana, kei ira na bete era tiko mai Nopi; era a qai lako kece vua na tui.

¹² A qai vosa vei Eimeleki o Saula, ka kaya vua, “Na luve i Eitipi, mo rogoca mada oqo!” A sa sauma o koya, “Oi au saka, na noqu turaga.”

¹³ A sa kaya vua o Saula, “A cava na vuna o sa bukiveretaki au kina vata kei Tevita? A cava na vuna o solia kina vua na kakana kei na i seleiwau, ka vakataroga na Kalou ena vukuna? Ia oqo sa vuki me saqati au o koya ka sa via vakamatei au!”

¹⁴ A vosa vua na tui o Eimeleki, ka kaya, “O cei vei ira kece na nomuni tamata sa yalodina me vakataki Tevita, na vugomuni na tui, ka liutaki ira na nomuni matayadra, ka dokai ena nomuni tikotiko vakatui?

¹⁵ Io, au a vakataroga na Kalou ena vukuna, ka sega ni qai kena i matai o ya! Ena vuku ni sasaga mo ni vakamatei na tui, me kakua sara ni beitaki e dua na ka vei au na nomuni tamata se dua vei ira na lewe ni noqu matavuvale. Au sa sega ni kila e dua na ka me baleta na ka oqo!”

¹⁶ A sa kaya na tui, “I Eimeleki, sa dodonu mo mate vakaidina, o iko kei na nomu matavuvale.”

¹⁷ A qai vosa na tui vei ira na tamata yadra era tu volekati koya, ka kaya vei ira, “Dou vakamatei ira na bete i Jiova! Era a duavata kei Tevita ka sega ni tukuna vei au na nona dro, ka dina ga ni ra kila vinaka tu.” Ia sa sega ni dua vei ira na tamata yadra me via laveta na ligana me vakamatei ira na bete i Jiova.

¹⁸ Sa qai tukuna o Saula vei Teoki, “Mo vakamatei ira kece o iko!” A sa vuki o Teoki na kai Etomi ka vakamatei ira kece. Ena siga o ya, sa vakamatea kina o Teoki e lewe 85 na bete ka ra sa yacova na i tutu vakabete era daramaka na efoti.

¹⁹ A sa vakarota talega o Saula na nodra vakamatei na lewe ni koro o Nopi, na nodra koro levu na bete, ka ra vakamatei na tagane kei na yalewa, na gone lalai kei ira se qai sucu, na bulumakau, na asa, kei na sipi.

²⁰ Ia a qai dro bula ga o Epaiaca, e dua vei iratou na luve i Eiimeleki tagane; a sa lako ka muri Tevita.

²¹ A sa tukuna vei Tevita o Epaiaca na nona a vakamatei ira na bete i Jiova o Saula.

²² A sa kaya vei Epaiaca o Tevita, “Ena gauna a tiko kina mai kea o Teoki na kai Itomi, au kila ena siga o ya ni na la'ki tukutuku dina vei Saula. Io sa baleti au na nodra mate o ira kecega na tamata ena mataqali i tamamu.

²³ Mo tiko ga vata kei au, ka kakua ni rere. E vinakata tiko o Saula me vakamatei kedaru ruarua, ia o na maroroi ka taqomaki vinaka ni o tiko vei au.”