1 Samuela 21 - Vakavakadewa Vou kei na iVola tale eso

Dro mai vei Saula o Tevita

¹ A lako ki Nopi o Tevita vei Eimeleki na bete. A curu mai ki tautuba ena sautaninini o Eimeleki me mai tavaki Tevita ka kaya vua, “A cava o lako taudua ga mai kina, ka sega ni dua o drau lako vata kaya mai?”

² A sa kaya o Tevita vei Eimeleki na bete, “Au a tiko e ke ena nona talai au mai na tui, ka kaya vei au, me kakua ni dua e kila na ka au sa talai mai kina. Au a kaya vei ira na noqu tamata me keimami na sota ena dua na vanua.

³ E dua li na ka e tu vei iko oqori? Mo solia mada vei au e lima na i buli madrai, se na cava ga e tu e ke.”

⁴ A vosa vei Tevita na bete, ka kaya vua, “Sa sega na madrali wale sa tu vei au, ia na madrai tabu ga; kevaka era sa tabu yalewa o ira na cauravou sa na qai rawa me soli vei ira.

⁵ A vosa vua na bete o Tevita, ka kaya vua, “Sa vakatabui vakaidina vei keimami na yalewa ena veigauna keimami lako kina ena i lakolako vakaoqo; era dau taqomaki ira na noqu tamata me ra savasava kevaka era lako ena dua ga na i lakolako. Sa qai wacava mada oqo ni i lakolako digitaki. E savasava talega na nodra bilo na cauravou.”

⁶ A solia vua na bete na madrai tabu, ni sega ni dua tale na mataqali madrai e tiko e kea, na madrai dauraici ga, ka kau tani mai na mata i Jiova, ka me vakaisosomitaki ena madrai vou ena siga a kau tani kina.

⁷ (A tiko mai kea ena siga o ya na nodra i liuliu na i vakatawa ni manumanu i Saula, e dua na kai Itomi ka yacana o Toeki, ka sa tiko voli e kea baleta ni dodonu me vakaitavi ena dua na cakacaka ni sokalou.)

⁸ A sa kaya vei Eimeleki o Tevita, “E sega beka ni tu vei iko e dua na moto se dua na i seleiwau? Au sega ni kauta mai na noqu i seleiwau kei na noqu i yaragi, ni a vakatotolotaki au na tui ena vuku ni ka a vinakata.”

⁹ A sauma o Eimeleki, “Raica, sa viviraki tu oqori ena dua na i sulu mai na daku ni efoti na i seleiwau i Koliaci, na kai Filisitia o a vakamatea ena buca o Ela; kevaka o via kauta, ia mo kauta yani baleta ni sa sega tale ni dua na i yaragi e tiko eke.” “A sa kaya o Tevita, “Mo solia mai vei au. Sa sega tale ni dua na i seleiwau e tautauvata kaya!”

¹⁰ A cavutu o Tevita ka dro ena siga o ya, ni sa rerevaki Saula, ka lako yani vei Akisa na tui Kaca.

¹¹ Era a qai kaya vei Akisa o ira na nona tamata, “E sega li ni o Tevita oqo, na tui ni vanua? E sega li ni o koya oqo era a seretaka voli na marama ena nodra meke voli, ka kaya, Sa vakamatea na udolu o Saula, kei na tini na udolu o Tevita?”

¹² A tugana ki yalona na vosa oqo o Tevita, ka rere vakalevu e mata i Akisa na tui Kaca.

¹³ A veisautaka o Tevita na nona i vakarau me vaka e dua na lialia, sa vakavola na veisogo ni matamata ni koro, ka cakava me savu tu na nona weli ki kumina.

¹⁴ A sa kaya vei ira na nona tamata o Akisa, “Ni raica mada, sa lialia na tamata oqo; a cava oqo o ni kauti koya mai kina vei au?

¹⁵ Sa lewe lailai beka na tamata lialia era tiko e ke, ka o ni sa kauta mai kina na tamata oqo, me mai vakalialiai koya e mataqu? Ena curuma li na noqu vale na tamata oqo?