1 Samuela 20 - Vakavakadewa Vou kei na iVola tale eso

Vukei Tevita o Jonacani

¹ A dro o Tevita mai Naioci e Rama ka lako vei Jonacani, ka kaya vua, “A cava au sa cakava? A cava na noqu cala? A ca cava au cakava ena mata i tamamu ka saga tiko kina o koya me'u mate?

² A sa kaya vua o Jonacani, “Me kakua sara oqo! O na sega ni mate. Raica, a sega ni kitaka o tamaqu e dua na ka levu se dua na ka lailai, ni bera ni tukuna taumada vei au, ia na cava li me vunia kina vei au na ka oqo o tamaqu? E sega ni vakakina.

³ A qai sauma o Tevita ka kaya, “E kila vakavinaka sara tu o tamamu na levu ni nomu taleitaki au, ka nanuma kina o koya, ka vaka, ‘Me kakua sara ni kila na ka oqo o Jonacani de na rarawa kina o koya.’ Ia me vaka sa bula o Jiova ka o sa bula talega o iko, sa vo wale ga me'u kalawa vakadua ka'u na qai mate.”

⁴ A sa kaya vei Tevita o Jonacani, “Na ka kecega o vinakata, au na cakava.”

⁵ A sa kaya vei Jonacani o Tevita, “Raica, ni mataka na siga ni Solevu ni Vula Vou, ka sa dodonu kina me keirau na kana vata kei na tui ena teveli ni kana; ia mo laivi au mada me'u la'ki vunitaki au ena lomanivanua me yacova na i katolu ni yakavi.

⁶ Kevaka e mani taroga o tamamu na vu ni noqu yali, mo qai kaya, ‘A vakamasuti au matua o Tevita me'u soli koya me cici vakatotolo yani ki Peceliema na nona koro, ka ni caka kina na nodra i soro vakayabaki na lewe ni nona vuvale kece.’

⁷ Ia kevaka e mani kaya, ‘Sa vinaka!’ mo ni kila ni na vinaka vei au o ya; ia kevaka e cudru vakalevu o Saula, mo kila ni sa nakita vei au e dua na i naki ca.

⁸ Ia ni vaka tu oqo, mo caka vinaka vei au na nomu tamata; ka me dei tu ga na veiyalayalati o a vakayacora vei au ena yaca i Jiova. Ia kevaka sa tu vei au e dua na cala, mo vakamatei au ga o iko. Me cava na betena mo kauti au kina vei tamamu?”

⁹ A sa kaya o Jonacani, ‘Me yawa dina sara vei iko oqo. Kevaka ka'u kila ni sai naki dei i tamaqu me vakaleqai iko, ena sega li ni rawa vei au me'u tukuna vei iko na ka oqo?

¹⁰ A qai vosa vei Jonacani o Tevita, ka kaya, “O cei li ena qai tukuna vei au kevaka e vosa vakacudrucudru vei iko o tamamu?”

¹¹ A sa kaya o Jonacani vei Tevita, “Lako mai, me daru lako ki na lomanivanua.”

¹² A sa kaya vei Tevita o Jonacani, “O Jiova na Kalou ni Isireli me nodaru i vakadinadina! Ena gauna vata oqo ni mataka, se ena siga ka tarava, au sa na vakatarogi tamaqu kina; ia kevaka e vinaka tiko na lomana me baleti iko, au na vakaraitaka yani vei iko.

¹³ Kevaka sa via caka ca vei iko o tamaqu, ia me qai vakamatei au o Jiova kevaka ka'u sa sega ni vakatakila vei iko, mo dro bula rawa kina.

¹⁴ Ia kevaka ka'u sa bula tiko, mo qai maroroya na nomu vosa bubului ka yalodina tikoga vei au; ia kevaka au sa mate,

¹⁵ mo vakatakila tikoga na nomu yalololoma vei ira na noqu lewe ni vuvale ka tawa mudu. Ena gauna sa vakarusai ira kece na veimeca yadua i Tevita mai na dela i vuravura o Jiova,

¹⁶ me kakua sara ni taqusi na yaca i Jonacani mai vei ira na lewe ni vuvale i Tevita. Me cudruvi ira kecega na meca i Tevita o Jiova.”

¹⁷ A sa bubuluitaki Tevita tale o Jonacani ni sa lomani koya; a sa lomani Tevita vakalevu o Jonacani me vaka ga sa lomana na nona bula.

¹⁸ A qai kaya vei Tevita o Jonacani, “Me vaka ni siga tiko ni Solevu ni Vula Vou ni mataka, na nomu yali ena vakilai baleta ni sa na lala tiko na nomu i dabedabe.

¹⁹ Ia ena siga ka tarava yani, mo lako sara ki na vanua o a vuni tiko kina ena siga o ya, ka la'ki vuni toka ena tutu ni vatu o Eseli.

²⁰ Ia au na vanataka yani e tolu na gasau ni dakaititi ki na yasa ni vatu, me vaka ga e noqu takete ni vana.

²¹ Au na qai tala yani e dua na cauravou lailai, ka kaya vua, ‘Mo lako ka la'ki vakasaqara na gasau.’ Ia kevaka au sa kaya vua na cauravou, ‘Raica, na gasau e tiko volekata na yasamu; mo taura mai,’ o ya e kena i balebale ni o sa galala. Au sa yalataka oqo ena vuku i Jiova ni sa sega na ka mo taqayalaka se leqataka.

²² Ia kevaka ka'u sa kaya vakaoqo vua na cauravou, ‘Raica, e tiko tale yani ki liu na gasau,’ mo qai lako, ni sa vakatalai iko yani o Jiova.

²³ Ia ena vuku ni veiyalayalati e daru sa vauca vata oqo, mo nanuma matua ni sai vakadinadina ena kedaru maliwa o Jiova ka sega ni mudu.”

²⁴ A vunitaki koya ena veikau o Tevita; ia ena Solevu ni Vula Vou, a sa tiko sobu na tui me kana.

²⁵ A sa dabe na tui ena nona i dabedabe vakatui ka voleka ki lalaga. A dabe tikivi koya o Epineri, ka dabe o Jonacani ena yasana veibasai. Ia sa lala koto na i dabedabe i Tevita.

²⁶ E a sega na ka e tukuna o Saula ena siga o ya; ni a nanuma, “E rairai yaco beka vua e dua na ka, ka sa vakavuna me sega kina ni savasava ena vuku ni soqo oqo.”

²⁷ Ia ena siga ka tarava ni oti na siga ni Solevu ni Vula Vou, sa se lala tu ga na i dabedabe i Tevita. A vosa o Saula vei Jonacani na luvena, ka kaya, “A cava e sega ni lako mai kina na luve i Jese me mai kana ena noa ka vakakina nikua?”

²⁸ A sauma o Jonacani ka kaya, “A kerea vakabibi vei au o Tevita me'u vakadonuya me lako i Peceliema.

²⁹ A sa kaya o koya, ‘Mo vakadonuya mada me'u lako, baleta ni ratou vakacaboisoro tiko mai kea na noqu vuvale, ka sa vakaroti au o tuakaqu me'u lako kina. Kevaka ka'u sa kune loloma e matamu, mo vagalalataki au mada me'u la'ki raici ira na wekaqu.’ Oqo na vuna e sega kina ni tiko rawa o koya ena nona teveli na tui.”

³⁰ A sa cudruvi Jonacani o Saula, ka kaya vua, “A luve ni yalewa ca ka talaidredre o iko! Au sa qai kila oqo ni o totaka tiko na luve i Jese, ka o sa vakamadualaki iko kina kei tinamu!

³¹ O sega beka ni kila ni kena dede tikoga na bula voli i Tevita, ena sega ni rawa ni o tui ni na vanua oqo? Ia oqo, mo la'ki kauti koya mai vei au, ni sa dodonu me mate o koya!”

³² A sa tarogi tamana o Jonacani ka kaya, “Na cava na vuna me vakamatei kina? A cava sa cakava o koya?”

³³ Ena ka oqo, a sa cokai Jonacani kina ena nona moto o Saula me vakamatei koya, ka sa kila e kea o Jonacani ni sa nakita o tamana me vakamatei Tevita.

³⁴ A sa tucake o Jonacani mai na teveli ena cudru waqawaqa; a sa sega ni kania e dua na kakana ena i karua ni siga ni Solevu ni Vula Vou, baleta ni sa rarawataka vakalevu na tamana ena vuku ni nona i tovo vakamadua vei Tevita.

³⁵ Ia ena mataka cake, a sa lako yani ki na lomanivanua o Jonacani me vaka e rau a lokuca kei Tevita, e rau a lako vata kaya yani e dua na cauravou lailai.

³⁶ A sa kaya vua na cauravou lailai, “Mo cici mada, ka mo la'ki vakasaqara mai na gasau ka'u na vanataka.” Ni a cici tiko na cauravou lailai, a sa qai vanataka o Jonacani e dua na gasau me la'ki tau ki liu vua.

³⁷ Ia ni yaco yani ki na tikina a vanataka kina na gasau o Jonacani, a kailavaka yani vua na cauravou lailai o Jonacani, “E tiko tale yani ki liu na gasau!

³⁸ Kusa! Kua ni o tucake tu ga e keri! Totolo!” A sa kumuna vata na gasau na cauravou lailai ka lesu vua na nona turaga.

³⁹ A sega ni kila e dua na ka na cauravou lailai; e rau a kila ruarua ga o Jonacani kei Tevita.

⁴⁰ A sa solia o Jonacani na nona i yaragi vua na nona cauravou lailai, ka kaya vua, “Mo lako, ka kauta ki na koro.”

⁴¹ Ni sa lako oti yani na cauravou lailai, sa qai tucake mai o Tevita ena daku ni binibini vatu, ka sa cuva vakatoboicu vakatolu ki na qele. A rau sa veireguci ka veitagicaki o Tevita kei Jonacani; ia sa levu cake na tagi nei Tevita.

⁴² A sa kaya vei Tevita o Jonacani, “Me tiko vata kei iko na Kalou. Sai vakadinadina ena kedaru maliwa o Jiova ena vuku ni nodaru veiyalayalati me baleti kedaru kei na ira na nodaru kawa me tawa mudu.” A sa qai lako yani o Tevita ka lesu tale ki na koro o Jonacani.