1 Samuela 19 - Vakavakadewa Vou kei na iVola tale eso

Vakacacani Tevita o Saula

¹ A vosa vei Jonacani na luvena o Saula, kei ira kece talega na nona tamata, me ra vakamatei Tevita. Ia a vinakati Tevita vakalevu o Jonacani, na luve i Saula.

² A vosa vei Tevita o Jonacani ka vaka, “Sa vakasaqara tiko o Saula na tamaqu e dua na sala me vakamatei iko kina; ia mo qarauni iko ni mataka, mo tiko ena dua na tikina vuni, ka mo vunitaki iko;

³ keirau na la'ki tu vata kei tamaqu ena tikinivanua o na vuni tiko kina, au na tukuna vua na veika e baleti iko. Ia au na qai tukuna tale vei iko na ka au sa raica rawa.

⁴ A vakacaucautaki Tevita o Jonacani vei Saula na tamana, ka kaya, “Me kakua ni kitaka na ka ca o koya na tui vei Tevita, na nona tamata; ni sa sega ni kitaka na ka ca vei iko o koya, ka ni sa vinaka sara na nona i vakarau vei iko;

⁵ E a bolea na mate o koya ka la'ki vakamatei koya kina na kai Filisitia, ka sa rawata kina o Jiova e dua na qaqa levu vei ira kecega na Isireli. O a raica ka marau kina; a cava li na vuna o sa via cakava kina na ka ca vua na tamata sa sega ni cala, e dua li na i naki ni nomu via vakamatei Tevita?”

⁶ A tarai Saula vakabibi na vosa i Jonacani ka mani bubului kina o koya, “Me vaka sa bula tiko o Jiova, ena sega ni vakamatei o koya.”

⁷ A kacivi Tevita o Jonacani, ka tukuna vua na ka kecega. A qai kauti Tevita vei Saula o Jonacani, me dau la'ki veiqaravi tiko vua na tui me vaka e liu.

⁸ A ia tale na i valu; a lako yani o Tevita ka vala kei ira na kai Filisitia, ka ravuti ira ena dua na veiraravui levu; a ra a dro tani sara mai vua.

⁹ A curumi Saula na yalo ca mai vei Jiova. E a tiko o koya ena nona loma ni vale ka taura toka e ligana na nona moto ena gauna a qiria tiko kina o Tevita na nona api.

¹⁰ A saga o Saula me cokai Tevita me vakabiri koya ki lalaga ena moto; sa levea o Tevita na moto ka coba sara kina ki lalaga. A dro bula o Tevita ena bogi o ya.

¹¹ A tala yani eso na tamata o Saula ki na vale i Tevita, me ra la'ki raici koya, ka vakamatei koya ena mataka. A qai vakasalataki Tevita o Mikali na watina, ka kaya, “Kevaka o na sega ni dro ena bogi edaidai, o na vakamatei ni mataka.”

¹² A tukuci Tevita sobu o Mikali mai na katubaleka e cake; a sa dro yani o koya me bula.

¹³ A kauta o Mikali e dua na matakau, ka la'ki vakotora ena i mocemoce, ka dua na i lokoloko vutika ni me ena i lokoloko ka tutuvitaki ena dua na i tutuvi.

¹⁴ Ia ni ratou yaco yani na tamata i Saula me ratou kauti Tevita, a qai kaya vei iratou o Mikali, “Sa tauvi mate o koya.”

¹⁵ A talai iratou tale na tamata o Saula me ratou la'ki raici Tevita, ka kaya vei iratou, “Ni kauti koya cake mai vei au ena i mocemoce, me'u vakamatei koya.”

¹⁶ Ia ni ratou yaco yani ki loma ni vale, ka raica, sa no e dua na matakau ena i mocemoce, kei na dua na i lokoloko vutika ni me na kena i lokoloko.

¹⁷ A sa kaya vei Mikali o Saula, “A cava o sa vakaisini au kina vakaoqo, ka laivi koya kina na kequ meca me bula? A sa kaya vei Saula o Mikali, “Sa kaya vei au o koya, Mo laivi au mada me'u lako de'u na qai vakamatei iko?”

¹⁸ A dro bula o Tevita, ka lako vei Samuela ki Rama, ka tukuna vua na ka kecega a cakava o Saula. E rau a qai lako vata kei Samuela ki Naioci me rau tiko kina.

¹⁹ A tukuni vei Saula, ka vaka ne, “Raica, sa tiko mai Naioci e Rama o Tevita.

²⁰ A qai tala eso na tamata o Saula me ra la'ki vesuki Tevita mai, ia ni ra raici ira na i vavakoso parofita ni ra sa parofisai tiko ka liutaki ira tiko o Samuela a curumi ira tale na tamata i Saula na Yalo ni Kalou, ka ra parofisai talega o ira.

²¹ Ia ni rogoca o Saula na ka oqo, a qai talai ira tale eso na nona tamata, era a parofisai vaka talega kina o ira oqo. A qai tala tale o Saula na i katolu ni lakolako, ka yacovi ira talega na ka vata ga sa yacovi ira e liu.

²² A lako talega ki Rama o Saula, ka yaco ki na i keliwai levu mai Seku; a taroga o koya, “E rau tiko beka e vei o Samuela kei Tevita?” A qai kaya vua e dua na tamata, “Raica, e rau sa tiko mai Naioci e Rama.”

²³ A lako yani o koya ki Naioci mai Rama; a curumi koya talega na Yalo ni Kalou ka parofisai tiko me yaco sara ki Naioci e Rama.

²⁴ A luvata o koya na nona i sulu, ka parofisai ena mata i Samuela, a sa koto luvawale ena siga taucoko o ya kei na bogi talega. O koya oqo sa dau tukuni kina, “E sa bau dua talega vei ira na parofita o Saula?”