1 Samuela 18 - Vakavakadewa Vou kei na iVola tale eso

O Tevita kei Jonacani

¹ Ia ni vosa oti o koya vei Saula, e rau a yalo vata o Tevita kei Jonacani, a lomani Tevita o Jonacani me vaka na nona lomani koya.

² A kauti koya o Saula ena siga o ya, ka sega ni laivi koya me lesu tale ki na vale i tamana.

³ E rau a qai veiyalayalati o Jonacani kei Tevita me baleta ni a lomani Tevita o Jonacani me vaka ga na nona lomani koya.

⁴ A luvata o Jonacani na kote lekaleka ka tokara tiko, ka solia vei Tevita, vata kei na nona i sulu ni valu, na nona i seleiwau talega, na nona dakaititi kei na nona i oro.

⁵ A dau lako yani o Tevita ki na veiyasana kecega a talai koya kina o Saula, ka vakayacora vakavinaka na ka a dau tukuni vua; a lesi koya kina o Saula me lewai ira na tamata i valu. A vinaka sara oqo e matadra na tamata kecega, ka vakakina vei ira era qaravi Saula.

Vuvutaki Tevita o Saula

⁶ Ia ni ra sa dui lesu ki na nodra i tikotiko na tamata, ena gauna a vakamatea oti kina o Tevita na nodra qaqa na kai Filisitia, era a qai lako mai na marama ena veikoro kece e Isireli me ra tavaki Saula na tui. Era a lagalaga sere, meke, ka ra vakatagitaka na tibereli kei na api.

⁷ Ena nodra mamarau oqo, era a lagata tiko na marama, “A vakamatei ira na veiudolu o Saula, ia o Tevita e vakatinitaki na veiudolu.”

⁸ A cudru vakalevu o Saula, ni a ca vua na vosa o ya; a kaya o koya, “Era a cavuta vei Tevita e tini na udolu, ia e dua wale ga na udolu vei au. Ia na ka ga sa vo me ra buli koya me tui?”

⁹ A tekivu me vuvutaki Tevita o Saula mai na siga o ya.

¹⁰ Ia ena mataka, a curumi Saula e dua na yalo ca mai vua na Kalou, ka vosa balavu me vaka na lialia ena nona loma ni vale; a qiria tiko o Tevita na nona api me vaka ga a dau kitaka ena veisiga. E a taura toka o Saula na nona moto;

¹¹ E a cokataka na moto o ya, ena nona a kaya, “Au sa na vakabiri Tevita ki na lalaga ena moto oqo.” Ia sa levea vakarua o Tevita na moto, ka cala ruarua.

¹² A rerevaki Tevita o Saula baleta ni sa la'ki tiko vata kei Tevita o Jiova, ka ni sa lako tani mai vua.

¹³ A talai Tevita yani o Saula, ka lesi koya me turaganivalu ni lewe 1,000 na tamata, ka sa liutaki ira yani ki na i valu.

¹⁴ A sa rawata vakavinaka o Tevita na veika kecega sa qarava, ni sa tiko vata kei koya o Jiova.

¹⁵ Ni sa raica o Saula ni rawa-ka vakalevu tiko o Tevita, sa vakavuna me rerevaki koya vakalevu.

¹⁶ Ia, era a lomani Tevita kecega na Isireli kei na Juta ena vuku ni vuavuai vinaka ni nona veiliutaki.

¹⁷ A sa kaya vei Tevita o Saula, “Raica, oqo na luvequ yalewa ulumatua o Merapi; au na soli koya vei iko me watimu kevaka o vakadonuya mo noqu sotia yalodina ka qaqa, ka mo dauvala ena i valu kece i Jiova.” (A sa vakasamataka lo voli o Saula ni sala oqo era na vakamatei Tevita kina na kai Filisitia, ka me galala mai kina o koya.)

¹⁸ A sa kaya vei Saula o Tevita, “O cei li oi au? O cei li o ira na wekaqu, kei na vuvale i tamaqu e Isireli, me'u mai vugona kina na tui?

¹⁹ Ia ni sa yaco mai na gauna me vakawatitaki Merapi kina o Tevita, a sa soli tale yani o Merapi vei Atirieli na kai Miola me watina.

²⁰ Ia sa domoni Tevita o Mikali, e dua tale na luve i Saula yalewa; ka sa marau sara kina o Saula ni sa rogoca.

²¹ A vosavosa i yalona o Saula, “Au na soli koya vua me na coriti koya kina, ka me ra tarai koya na kai Filisitia.” Ena i karua ni gauna, a sa tukuna tale kina o Saula vei Tevita, “O sa na vugoqu edaidai.”

²² A vakaroti ira na nona tamata o Saula, ka kaya, “Mo ni vosa vakatikitiki vei Tevita, ka kaya, ‘Raica sa marau vakalevu na tui kei ira kecega na nona tamata era sa vinakati iko, sa kena gauna vinaka oqo mo vakawatitaka na luvena!”

²³ Era a qai tukuna na ka oqo vei Tevita. A sa kaya o Tevita, “Sa vaka na ka wale beka li vei kemudou me yaco e dua me watina na luvenitui? Au sa tamata dravudravua ka sega ni kilai levu.”

²⁴ Era a tukuna vei Saula o ira na nona tamata na ka sa kaya o Tevita,

²⁵ A sa kaya o Saula, “Ni kaya vakaoqo vei Tevita, ‘Sa sega ni vinakata na tui na i yau ena vuku ni watimu, ia me dua ga na drau na vusodra na kai Filisitia me ra cudruvi kina na kemu meca.” Ia oqo a nanuma o Saula me ra vakamatei Tevita kina na kai Filisitia.

²⁶ Ia ni ra a tukuna na ka oqo vei Tevita na nona tamata, a qai donu vua me vugona na tui. Ni bera ni cava na kena gauna,

²⁷ A qai cavutu o Tevita ka lako yani, o koya kei ira na nona tamata, ka mokuta e lewe rua na drau vei ira na kai Filisitia; a kauta mai o Tevita na vusodra, ka wiliki ira taucoko vua na tui. Ia a qai solia vei Tevita o Saula na luvena o Mikali me watina.

²⁸ A qai kila vakamatata o Saula ni a tiko kei Tevita o Jiova; era a vinakati koya kecega na Isireli,

²⁹ A qai levu cake sara na nona rerevaki Tevita o Saula; a meca tikoga i Tevita o Saula.

³⁰ Era a qai lako yani na nodra turaga na kai Filisitia me ra la'ki vala, ia ena veigauna kece era a lako yani kina, a dau cakacaka vakavuku, ka rawa ka duadua ga o Tevita vei ira kecega era qaravi Saula; a rogo vakalevu na yacana.