1 Samuela 17 - Vakavakadewa Vou kei na iVola tale eso

O Tevita kei Koliaci

¹ Era a soqoni vata e Soko mai Juta na nodra mataivalu na kai Filisitia, me ia na i valu, ka ra la'ki vakaitikotiko ena kedrau veimama o Soko kei Aseka mai Efesi-tamimi.

² A soqoni vata o Saula kei ira na Isireli ka ra vakaitikotiko ena buca o Ela, ka ra tuva i valu me ra vala kei ira na kai Filisitia.

³ Ia o ira na kai Filisitia era a tiko ena yasa ni ulunivanua kadua, kei ira na Isireli ena ulunivanua kadua, ka koto na buca ena kedrau veimama.

⁴ A cavutu mai na nodra i tikotiko na kai Filisitia e dua na tamata daubolebole, o Koliaci na yacana; a kai Kaca o koya, ka volekata yani na tolu na mita na kena balavu.

⁵ A daramaka tu o koya na i sala parasa, ka vakaisulu ena i sulu ni valu; ia na kena bibi na i sulu oqori e 57 na kilokaramu.

⁶ A vakaivava parasa o koya, ka tokara na i sasabai parasa ena usouso ni domona.

⁷ Ia na dia ni nona moto sa vaka na nodra kau balavu na dautalitali; ia na mata ni nona moto kaukamea e rauta ni 7 na kilokaramu na kena bibi; ka sa dau liu vua e dua na tamata me colata tiko na nona i sasabai.

⁸ A tucake o Koliaci ka kaci vakadomoilevu ki na nodra mataivalu na Isireli, ka kaya vei ira, “A cava o ni cakava tiko, ka tuvani vakaivalu tu oqori? Oi au na kai Filisitia ka o kemuni na tamata i Saula! Mo ni digitaka mada e dua na nomuni tamata me keirau vala.

⁹ Kevaka sa qaqa o koya ka vakamatei au, keimami sa na nomuni tamata; ia kevaka sa noqu na qaqa ka'u qai vakamatei koya, mo ni sa qai neimami tamata ka qaravi keimami.”

¹⁰ Sa qai kaya tale na kai Filisitia oqo, “Au sa bolei ira edaidai na nodra mataivalu na Isireli. Mo ni solia mada vei au e dua na tamata me keirau vala.”

¹¹ Ni sa rogoca o Saula kei ira na Isireli na vosa ni kai Filisitia oqo, a sa tuburi ira na yalolailai kei na rere.

O Tevita ena Loma ni Keba nei Saula

¹² A sa dua na cauravou na yacana o Tevita, ka luvei Jese na kai Efiraca mai Peceliema e Juta. E ratou lewe walu na luve i Jese tagane, ka sa qase sara o koya ena gauna e tui tiko kina o Saula.

¹³ Na i matai ni tolu ni luve i Jese tagane e ratou lewe ni mataivalu i Saula. E ulumatua o Iliavi, a kena i karua o Amenatave, ka kena i katolu o Sama.

¹⁴ A sa gone duadua vei iratou o Tevita. Ia me vaka ni ratou lewe ni mataivalu i Saula o iratou na lewe tolu ka qase cake,

¹⁵ sa dau veilakoyaki voli o Tevita mai vei Saula me la'ki vakatawani ira na qele ni sipi nei tamana.

¹⁶ A sa 40 taucoko na siga na nona bolei ira tiko na Isireli na kai Filisitia o Koliaci, o ya ena veimataka kei na veiyakavi.

¹⁷ Ena dua na siga, a sa kaya o Jese vei Tevita na luvena, “Mo kauta mada vakatotolo vei iratou na tuakamu ena nodratou keba e tini na kilokaramu na sila tavu kei na tini na i buli madrai.

¹⁸ Mo kauta vata tiko e tini na uma jisi oqo vei koya na turaganivalu. Mo raici iratou na tuakamu se vakaevei tu na nodratou i tuvaki ni bula, ka qai kauta lesu mai e dua na i vakadinadina ni o sa raici ratou rawa ka ratou bulabula vinaka tiko.

¹⁹ Era sa tiko oqori ena Buca o Ela o Saula na tui, kei iratou na tuakamu, kei ira kece na Isireli era sa vala tiko kei ira na kai Filisitia.”

²⁰ A sa sou vakamataka o Tevita, ka laiva na sipi vua e dua na i vakatawa me raici ira tiko, a sa kauta na kakana ka lako yani me vaka sa vakaroti koya kina o Jese na tamana. A yaco yani o koya ki na nodra i tikotiko ena gauna sara ga era a lako tiko kina na Isireli ki na buturara ni valu, ka ra kaila tiko ni vakacibi i valu.

²¹ Era sa qai tuvani vakaivalu na Isireli kei ira na kai Filisitia, ka ra sa veiqaraqaravi tu me ia na i valu.

²² A sa biuta na veika e kauta voli yani o Tevita vei koya na dauvakatawa i yaya, ka cici ki na buturara ni valu, ka tarogi iratou na tuakana se ratou bula vinaka tiko se segai.

²³ Ia ni ratou sa veivosaki tiko, raica sa lako cake mai o Koliaci ka bolei ira na Isireli me vaka ga e dau cakava e liu o koya. A sa rogoci koya sara o Tevita.

²⁴ Ia ni ra raici Koliaci o ira kecega na Isireli, era sa dro tani mai vua ena levu ni nodra rere.

²⁵ Era sa veitukunitaka vakataki ira na Isireli, “Raici koya mada! Rogoca na nona vosa ni bolebole! Sa yalataka tiko na tui o Saula e dua na i yau levu me soli vua na tamata ena vakamatei koya. Ena solia talega na tui ki vua na luvena yalewa me watina, ka na solia na galala ki na mataqali i tamana me kakua ni saumi vakacavacava e Isireli.”

²⁶ A sa tarogi ira na tamata ka ra tu volekati koya o Tevita, ka kaya, “A cava beka na ka ena soli vua na tamata ena vakamatea na kai Filisitia oqo, ka kauta tani na i rogorogo ca mai vei ira na Isireli? O cei sara mada na kai Filisitia tawa cili oqo me mai vosa veibeci ki na nona mataivalu na Kalou bula?”

²⁷ Era a qai tukuna vua na ka ena vakayacori vua e dua na tamata ena vakamatei Koliaci.

²⁸ A sa rogoca o Iliavi na tuakana na veika sa kaya o Tevita vei ira na tamata. A sa cudruvi Tevita ka kaya, “A cava o mai cakava eke? O cei sa vakatawani ira tiko na sipi mai veikau? A gone siosio o iko! O sa lako sobu ga mai mo mai sarava na i valu!”

²⁹ A qai vosa o Tevita, ka kaya vua, “Na cava beka au cakava? Sa sega ni rawa beka me'u taroga e dua na ka?”

³⁰ A sa vuki tani o koya ka vosa vua e dua tale na tamata, ka taroga na taro vata ga o ya, ka sa saumi vua mai na i sau ni taro vata ga.

³¹ Era sa rogoca na vosa i Tevita eso na tamata ka ra sa la'ki tukuna vei Saula; a sa talatala vei Tevita o Saula me lako mada yani vua.

³² A vosa vei Saula o Tevita, ka kaya, “Kemuni na tui, me kakua ni dua me rerevaka na kai Filisitia oqo! Au na lako oi au na nomuni tamata ka vala kaya.”

³³ A sa sauma lesu vei Tevita o Saula, ka kaya, “E sega. Mo na valuti koya rawa vakaevei? O iko o sa cauravou lailai ga, ia na tamata o ya sa dauvala tu mai ena nona bula taucoko!”

³⁴ A sa kaya vei Saula o Tevita, “Na nomuni tamata oqo sa dau vakatawana voli na sipi i tamaqu. Ni lako mai na laione se na bea me kauta tani e dua na luve ni sipi mai na qele ni sipi,

³⁵ au dau muria ka vakamatea, ka vakabula na luve ni sipi mai gusuna. Ia kevaka sa golevi au mai, au dau vesuka kaukauwa na domona, ka mokulaka me mate.

³⁶ Sa vakamatea oti na laione kei na bea na nomuni tamata, ka'u na vakamatea vakakina na kai Filisitia tawa cili oqo, ni sa beca na mataivalu i Jiova na Kalou bula.

³⁷ Sa ia na veivakabulai o Jiova mai na laione kei na bea; ka na vakabulai au mai na ligana na kai Filisitia oqo.” A sa kaya o Saula vei Tevita, “Mo lako ga, ka me salavata kei iko o Jiova!”

³⁸ A daramaka vei Tevita o Saula na nona i sulu ni valu; a sa vakaisalataki koya ena i sala parasa, ka daramaka vua na kote kaukamea ni vala.

³⁹ A sa vauca o Tevita na i seleiwau nei Saula ki na nona i sulu ni valu; ia ni sa tovolea me lako, sa sega ni rawa baleta ni sega ni matau vua. A sa kaya vei Saula o Tevita, “Au sa sega ni lako rawa ena ka oqo, ni sega ni matau vei au na daramaka.” A sa luvata tani o Tevita.

⁴⁰ A taura o koya na nona i titoko, ka digitaka e lima na vatu yagoyago vinaka mai na uciwai, ka tawana ki na nona taga ni vakatawa sipi. A sa taura na nona i rabo ka lako yani vei Koliaci.

Vakamatei Koliaci o Tevita

⁴¹ A tekivu me toro volekati Tevita na kai Filisitia ka liutaki koya tiko yani na nona tamata daucola i sasabai. Ni toso voleka tiko mai,

⁴² a sa raici Tevita vinaka o koya ka sa beci koya sara baleta ni dua na cauravou gone sara o koya, e damudamu, ka mata vinaka.

⁴³ A sa kaya vei Tevita na kai Filisitia, “Na i titoko beka ni cava oqori? Oi au beka na koli?” A sa rukaki Tevita ena vosa minimini ni nona kalou.

⁴⁴ A sa bolei Tevita ni sa kaya, “Lako mai, ka'u na qai solia na lewemu ki na manumanu vuka kei na manumanu ni vanua me ra kania.”

⁴⁵ A qai kaya vua na kai Filisitia o Tevita, “O sa lako mai mo valuti au ena i seleiwau, ena moto levu, kei na moto lailai; ia au sa lako mai vei iko ena yaca i Jiova ni lewevuqa, o koya na nodra Kalou na mataivalu ni Isireli, o ira o sa sega ni rokova.

⁴⁶ Ena siga oqo, ena soli iko kina o Jiova ki ligaqu; ia au na vakamatei iko, ka tamusuka laivi na ulumu; au na solia talega na yagodra na tamata i valu ni Filisitia ena siga oqo vei ira na manumanu vuka, kei na manumanu kila ni vanua. Ena ka oqo, era na kila kece kina na kai vuravura ni tiko na nodra Kalou na Isireli,

⁴⁷ ka me ra kila na lewenivanua taucoko ni sa sega ni veivakabulai o Jiova ena i seleiwau kei na moto; ni sa nei Jiova na i valu, ka na soli kemuni vakakina ki na liga i keimami.”

⁴⁸ A sa toro volekati Tevita yani o Koliaci me ravuti koya, ka sa vuki totolo o Tevita ka ciciva yani na buturara ni valu me rau sota.

⁴⁹ A tatara o Tevita ki na nona taga ka taura mai kina e dua na vatu, ka rabotaka yani vei Koliaci. A sa coba donu ena qaqa ni yadrena na kai Filisitia na vatu o ya, ka bale vakatoboicu ki na qele o Koliaci.

⁵⁰ A sa rawata na qaqa o Tevita vua na kai Filisitia ena i rabo kei na vatu ni sa vakamatea; a sa segai na i seleiwau e ligana.

⁵¹ A sa cici yani o Tevita, ka tucake e dela i Koliaci. A sa ucuna na nona i seleiwau mai na kena taga, ka vakamatei koya ena nona tamusuka laivi na uluna. Ia ni ra raica na kai Filisitia ni sa mate na nodra qaqa, era sa qai dro.

⁵² Era sa qai lamata cake mai o ira na Isireli kei ira na Juta, ka ra kaila, ka cici muri ira na kai Filisitia me yaco sara ki Kaca kei na matamata ni koro mai Ekironi.

⁵³ Ia ni ra a lesu tale mai na Isireli ena nodra a cemuri ira na kai Filisitia, era a qai mai kauta na i toki ni valu mai na nodra i tikotiko.

⁵⁴ A sa tomika cake na ulu i Koliaci o Tevita ka kauta ki Jerusalemi; ia sa maroroya ga na i yaragi ni valu i Koliaci ena nona valelaca.

⁵⁵ Ia ni sa saravi Tevita o Saula ena nona la'ki vala kei Koliaci, a sa tarogi Epineri na i liuliu ni nona mataivalu, ka vaka, “I Epineri, na luve i cei mada na cauravou oqo?” A sauma o Epineri ka kaya, “Au sa sega saka ni kila kemuni na Tui.”

⁵⁶ A sa qai vakaroti Epineri o Saula, ka kaya, “Ia mo la'ki taroga mada mai se na luve i cei na cauravou oqo.”

⁵⁷ Ia ni lesu mai o Tevita ena nona a vakamatea na kai Filisitia, a sa qai sotavi koya o Epineri ka kauti koya sara yani vei Saula. A sa taura voli ga o Tevita na ulu i Koliaci.

⁵⁸ A qai tarogi koya o Saula, ka kaya, “Cauravou, o cei na tamamu?” A sa kaya vua o Tevita, “O au na luvena na nomuni tamata o Jese mai Peceliema.”