1 Samuela 14 - Vakavakadewa Vou kei na iVola tale eso

Na Sasaga Rerevaki nei Jonacani

¹ Ena dua na siga, a sa kaya o Jonacani na luve i Saula vua na cauravou ka dau colata voli na nona i yaragi, “Mai, daru lako takoso mada ki na nodra keba na kai Filisitia mai yasana kadua.” Ia sa sega ni tukuna o Jonacani na ka oqo vei Saula na tamana,

² ka tara keba voli ena ruku ni vuni pomekaraneti mai Mikironi, ka sega soti ni yawa mai Qibea. Era a tiko vata kaya e lewe 600 na tamata,

³ ka tiko maliwai ira o Eaia, ka daramaka tiko na i sulu vakabete na efoti. Oqo na luve i Eiitupi na tuakai Ikapote, na luve i Finiasi, ka makubui Ilai na bete i Jiova mai Sailo. A sega ni dua e kila na lako nei Jonacani.

⁴ Ena i curucuru mai Mikimasi, o ya me curuma yani o Jonacani me yaco rawa ki na nodra keba na Filisitia, e koto kina e rua na vatu momoto lelevu, ka rau toka veitikivi me vaka na matamata ni i curucuru: na yacana e dua o Posesi ka yacana na kena i karua o Sene.

⁵ E dua e tiko ena vualiku ka vakanamata ki Mikimasi, ka toka na kena i karua ena ceva ka vakanamata ki Kipa.

⁶ A qai kaya o Jonacani vua na cauravou ka colata tiko na nona i yaragi, “Mai, daru takoso mada yani ki na nodra keba na tamata tawa cili oqori; de dua ena vukei kedaru o Jiova; ni sega sara ni dredre vua me solia vei keda na qaqa, ka veitalia ga ni da lewe lailai wale sara.”

⁷ A sa sauma lesu na cauravou ka kaya, “Mo ni vakayacora ga na veika o ni vinakata; au sa duavata kei kemuni.”

⁸ A sa kaya o Jonacani, “Raica, e daru na lako yani vei ira na tamata oqori, ka laiva me ra raici kedaru mai.

⁹ Kevaka era kaya mai vei kedaru, ‘Drau wawa mada, me keimami na qai lako yani vei kemudrau,’ ia me daru na qai tiko ga eke, ka sega ni lako cake vei ira.

¹⁰ Ia kevaka era kaya vakaoqo, ‘Drau lako cake mai vei keimami,’ e daru na qai lako cake, baleta oqori na i vakatakilakila ni sa soli ira o Jiova ki ligadaru.”

¹¹ E rau sa qai vakaraitaki rau ki na nodra i tikotiko vakaivalu na kai Fillisitia: era a qai kaya vei rau na kai Filisitia, “Raica, era sa lako tiko mai oqo na Iperiu mai na veiqara ka ra a vunitaki ira tu kina.”

¹² Era a qai kailavaki Jonacani kei koya na nona cauravou daucola i yaragi na mataivalu ni Filisitia, ka kaya, “Mo drau lako cake mai vei keimami, ia keimami na qai vakatakila vei kemudrau e dua na ka.” A sa kaya o Jonacani vua na daucola i yaragi, “Mo muri au mai; ni a soli ira o Jiova ki na ligadra na Isireli.”

¹³ A cabeta cake o Jonacani na i curucuru ena ligana kei na yavana, ka muri koya cake yani na nona cauravou daucola i yaragi. A sa ravuti ira na kai Filisitia o Jonacani ka ra sa bale e yasana, ka sa ia na veivakamatei mai dakuna o nona cauravou ena nona muri voli yani.

¹⁴ Ena i matai ni ravuravu o ya, e rau a vakamatea kina o Jonacani kei na nona daucola i yaragi e rauta ni ra lewe ruasagavulu na tamata ena loma ni dua na vanua ka rauta ni dua na i kava ni ekatea na kena levu.

¹⁵ A tubu na taqaya ena i tikotiko, ena veiwere, vei ira kecega na tamata; na mataivalu kei na batikadi, ni a sakure ka yavavala na vanua ka vakavuna e dua na ka vakadomobula.

¹⁶ Ia ni ra rai yani na tamata yadra i Saula mai Qibea e Penijamini; era a raici ira na kai Filisitia ni ra veiciciyaki ena veilecayaki.

¹⁷ A vosa vei ira na tamata era a tiko kaya o Saula. “Ni wiliki ira mada na tamata; ka raica se o cei e yali vei keda.” Era a kacivi yaca ka raica, ni sa yali o Jonacani kei koya na dau cola i yaragi.

¹⁸ A sa kaya vei Eaia o Saula, “Mo kauta mada mai na Kato ni Veiyalayalati.” Ni sa tiko na Kato ni Veiyalayalati vei ira na Isireli ena gauna o ya.

¹⁹ Ia ni vosa tiko o Saula vua na bete, a qai tubu cake tiko na maue me levu ena nodra i tikotiko na mataivalu ni Filisitia, a qai kaya vua na bete o Saula, “Mo sa tei wawa mada.”

²⁰ Ia a qai cavutu o Saula kei ira kecega era tiko kaya me ra la'ki vala, ka raica, era a veiraravui vakataki ira, ka ra veita vaka ira ena nodra i seleiwau o ira na kai Filisitia, ka sa dua na veilecayaki levu.

²¹ Ia o ira na Iperiu ka ra sa tiko makawa kei ira na kai Filisitia, ka ra a lako vata mai kei ira mai na veiyasana voleka ki na nodra dui tikotiko, era a vuki tale me nodra i to na Isireli era a tiko vei Saula kei Jonacani.

²² Ni rogoca o ira kecega na Isireli ka ra a vunitaki ira tu ena ulunivanua o Ifereimi, ni ra a dui se na ka Filisitia, era a cici talega ka muri ira ena i valu.

²³ A vakabulai ira na Isireli ena siga o ya o Jiova, ka lako tiko na i valu me yacovi Peciaveni.

²⁴ Era a malumalumu na Isireli ena siga o ya ena vuku ni nodra viakana, ni a vosa ni bubuluitaki ira o Saula, ka vaka, “Me cudruvi na tamata sa kania e dua na kakana me yacova sara na yakavi, me yacova ni'u sa sauma oti na noqu cudru vei ira na kequ meca.” Era a sega ni kania e dua na kakana o ira na tamata.

²⁵ Era a qai yaco na tamata kecega ki na dua na veikau, ka raica ni sa tu ena veiyasana kecega na de ni oni.

²⁶ Ia ni ra curuma yani na veikau na tamata, ka raica ni sa titiri tu na de ni oni; ka sega sara ni dua na tamata e dulaka na ligana ki gusuna ni ra rerevaka na nodra bubului.

²⁷ Ia ni sega ni rogoca o Jonacani ni a bubuluitaki ira na tamata o tamana; a dodoka na nona i titoko ka golea na muana ki na de ni oni, ka tonisua, kauta cake ki gusuna, ka waqa kina na matana ena kena kana vinaka.

²⁸ A vosa mai e dua vei ira na tamata, ka kaya, “Me cudruvi e dua na tamata sa kania e dua na kakana edaidai” Era a malumalumu o ira na tamata ena viakana.

²⁹ A sa kaya vei ira o Jonacani, “Sa vakaleqa na vanua o tamaqu; ni raica mada na kena serau mai na mataqu, ni'u sa kania vakalailai na de ni oni oqo.

³⁰ Sa na wacava mada na kena uasivi cake edaidai, kevaka era kania na tamata na kakana era taura ena gauna e vakamalumalumutaki kina o ira na meca. Ena vica tale mada na kai Filisitia era na vakamatea?

³¹ Era vakadrukai ira na kai Filisitia na Isireli ena siga o ya me vakatekivu mai Mikimasi ka yaco sara ki Eijaloni. Era a malumalumu sara vakalevu na tamata ena viakana.

³² Era a qai goleva na veika era a taura vakaukauwa mai vei ira na meca, na sipi, na bulumakau, kei na bulumakau tagane ni cakacaka, ka vakamatea e dela ni qele, ka ra kania vata kei na kedra dra.

³³ A tukuni vei Saula ni ra sa caka cala vei Jiova na tamata, ni ra sa kania vata na lewe ni manumanu kei na kena dra. A qai vosa o Saula, ka kaya, “O ni sa vakayacora na i tovo ca; mo ni vaqiqica mada mai vei au eke e dua na vatu levu.”

³⁴ A sa kaya tale o Saula, “Mo ni lako yani ena kedra maliwa na tamata ka kaya vei ira, ‘Na tamata yadua me ra dui kauta mai na nona bulumakau tagane, se nona sipi, ka vakamatea eke, ka kania; ia mo ni kakua ni caka cala vei Jiova ena nomuni kania vata kei na kena dra! Era a kauta mai ena bogi o ya na nodra bulumakau na tamata yadua, ka vakamatea.

³⁵ A cakava o Saula e dua na i cabocabonisoro vei Jiova; o ya na i sevu ni cabocabonisoro a tara o koya vei Jiova.

³⁶ A qai vosa o Saula vei ira na tamata, ka kaya, “Me da lako ka la'ki valuti ira na kai Filisitia ena bogi ka vakasosataki ira tiko me yacova sara na siga; ia me da qai vakamatei ira kece sara vakadua.” Era a qai kaya na tamata, “Mo ni kitaka ga na ka sa dodonu vei kemuni.” Ia sa kaya ga na bete, “Me da taroga taumada e liu na Kalou.”

³⁷ A sa qai taroga kina na Kalou o Saula, ka kaya, “Me'u valuti ira li na kai Filisitia, se me'u kakua? O ni na soli beka vei keimami na qaqa se segai?” Ia sa sega ni tukuna lesu vua na Kalou e dua na ka ena siga o ya.

³⁸ A sa qai kaya o Saula, “Ni toro mai kike, oi kemuni kecega sa veiliutaki vei ira na tamata; ka me da vakaqaqa mada se i valavala ca cava sara mada sa vakayacori edaidai.

³⁹ Ia me vaka sa bula o Jiova, o koya sa vakabulai ira na Isireli, au sa yalataka vua ni na vakamatei o koya sa caka cala, ka veitalia ga kevaka sa vakayacora oqo na luvequ o Jonacani, ena mate vakaidina ga.” Ia sa sega ga ni dua na tamata e tukuna e dua na ka.

⁴⁰ Sa qai kaya vei ira o Saula, “Ni la'ki tucake kece mada i kea oi kemuni kece oqo, ka keirau na tucake e yasana oqo kei Jonacani na luvequ.” Era a kaya vei Saula na tamata, “Mo ni kitaka ga na ka sa dodonu vei kemuni.”

⁴¹ A sa qai vosa o Saula vei Jiova, na Kalou ni Isireli, ka kaya, “I Jiova, a cava na vuna o ni sa galuvi au kina ena siga oqo? Mo ni vakatakila mai se o cei sa dodonu mai na vatu tabu ni vakawiri madigi. Kevaka e cala nei Jonacani se noqu cala, mo ni dusia ena Urimi; ia kevaka e nodra cala na nomuni tamata na Isireli, ia mo ni dusia ena Cumimi.” A sa dusi rau o Jonacani kei Saula na vakawiri madigi, ka ra sa galala kina o ira na tamata.

⁴² Sa qai tukuna o Saula, “Ni vakawiri madigi mada vei keirau kei Jonacani na luvequ.” A sa dusi Jonacani na madigi.

⁴³ Sa qai tarogi Jonacani o Saula, “Mo tukuna mada vei au se na cava o a cakava?” A sauma o Jonacani, ka kaya, “Au a tovolea wale ga e dua na oni lailai mai na mua ni titoko au a taura toka e ligaqu. Sai au ga oqo; au sa bolea me'u mate kina.”

⁴⁴ A sa kaya o Saula, “Me na vakamatei au na Kalou kevaka o na sega ni vakamatei o iko Jonacani!”

⁴⁵ Ia era a qai kaya vei Saula na tamata, “Me na vakamatei li o Jonacani, o koya sa kitaka na veivakabulai levu oqo e Isireli? Sega, me kakua sara! Keimami sa yalataka vua na Kalou bula ni na sega mada ga ni bau lutu ki na qele e dua na drauniuluna. Na ka sa vakayacora o koya edaidai sa vakayacori ena veivuke ni Kalou.” Era a mani vakabulai Jonacani kina na tamata ka sega ni vakamatei.

⁴⁶ A lako cake o Saula, ka sega ni muri ira tale na kai Filisitia; era a dui lesu tale ki na nodra tikina na kai Filisitia.

Na Veiliutaki i Saula kei na Nona Vuvale

⁴⁷ Ni sa vakataudeitaki oti na i tutu ni veiliutaki vakatui i Saula, a sa valuti ira kece na kena meca ena veiyasana kece: o ira na Moapi, o ira na Amoni, o ira na kai Itomi, o ira na veitui mai Sopa, kei ira na kai Filisitia. A sa rawata na qaqa ena vanua kecega sa valuta.

⁴⁸ A sa vala tiko o Saula me vaka na qaqa, ka vakadrukai ira na Amalekaiti. A sa vakabulai ira na Isireli mai na ligadra na dauveivakacacani.

⁴⁹ Ia o iratou na luve i Saula, o Jonacani, Isivi, kei Malikisua; na yacadrau na luvena yalewa, o Merapi na ulumatua, kei Mikali o koya e gone vei rau.

⁵⁰ Na yaca i watina o Elinoami, na luve i Elimasi, ia na yaca i koya na nona kavetani ni valu o Epineri na luve i Neri. O Neri e gone mai vei Kisi na tama i Saula.

⁵¹ Na tama i Saula o Kisi; ia o Kisi kei Neri e rau luve i Epieli.

⁵² A kaukauwa sara na vala vata tiko i Saula kei ira na kai Filisitia ena nona gauna, ia ni dau raica o koya e dua na tamata kaukauwa, se dua na tamata qaqa, a dau kauti koya me lewe ni nona mataivalu.