1 Samuela 12 - Vakavakadewa Vou kei na iVola tale eso

Vosa o Samuela vei Ira na Lewenivanua

¹ A qai vosa vei ira kecega na Isireli o Samuela, ka kaya “Raica, au a vakarorogo vei kemuni ena veika kecega o ni a kerea vei au, ka'u sa vakatikora kina vei kemuni e dua na tui me vakataulewa ena vukumuni.

² Ena gauna oqo, e sa na liutaki kemuni na tui. Ia, oi au sa qase sara ka ratou sa tiko kei kemuni na luvequ. Au a liutaki kemuni voli mai na gauna ni noqu cauravou me yacova mai na siga oqo.

³ Sai au oqo. Kevaka au sa vakayacora e dua na cala, mo ni beitaki au ena gauna sara ga oqo ena mata i Jiova kei na mata ni nona lumuti, na tui. Au a kovea beka li na nona bulumakau e dua na tamata, se na nona asa? Au a lawakitaka beka li e dua na tamata? Au a taura li mai vua e dua na tamata e dua na ka ena sala dukadukali? Ia kevaka au sa vakayacora e dua vei ira na ka oqo, au na sauma lesu tale vei kemuni.”

⁴ Era sa kaya na lewenivanua, “O sa sega ni lawakitaki keimami, se vakasaurarataki keimami se taura e dua na ka mai na ligana e dua na tamata.”

⁵ A sauma o Samuela ka kaya, “Sai vakadinadina ni nomuni sa sega ni kunea vei au e dua na cala ena siga edaidai o rau oqo: o Jiova kei koya na nona i lumuti, na tui, ka sa digitaka o koya.” Era sa kaya, “Io, sa neimami i vakadinadina o Jiova.”

⁶ A tomana na nona vosa o Samuela ka kaya, “Sai Jiova ka digitaki rau o Mosese kei Eroni, ka rau a la'ki kauti ira mai na nomuni qase mai na vanua o Ijipita.

⁷ Ia oqo, mo ni tu mada vakadua me'u vosa vakadodonu vei kemuni ena mata i Jiova ena vuku ni nona cakacaka dodonu kecega ni veivakabulai sa vakayacora vei kemuni kei ira na nomuni qase.

⁸ Ena gauna sa lako kina ki Ijipita o Jekope ka ra vakararawataki mai vei ira na kai Ijipita, era a qai tagi vei Jiova o ira na nomuni qase ka qai talai Mosese kei Eroni kina o Jiova me rau la'ki kauti ira tani mai Ijipita, ka mai vakatikori ira ena vanua oqo.

⁹ Ia era a guilecavi Jiova na nodra Kalou, ka sa qai vakatara o Jiova me ra valuti ka vakadrukai mai vei ira na kai Filisitia, kei na tui Moapi, kei Sisera na kavetani ni mataivalu i Asori.

¹⁰ Era sa qai tagi vei Jiova, ka kaya, ‘Keimami sa vakadinadinataka na neimami caka cala baleta ni keimami sa biuti Jiova ka qaravi Peali kei Aseteroci. Ia oqo mo ni vakabulai keimami mai na ligadra na neimami meca, ka keimami na qai qaravi kemuni!’

¹¹ Sa qai talai Jerupeali, kei Baraki, kei Jefica, vata kei au o Jiova. O keitou yadua a vueti kemuni mai na ligadra na nomuni meca era a tiko volivoliti kemuni, ka o ni a qai tiko vakacegu kina.

¹² Ia ena gauna o ni raica kina ni vakarau valuti kemuni na tui o Neasi mai Amoni, o ni a qai besetaki Jiova me nomuni tui ka tukuna vei au, ‘Keimami sa vinakata me dua na neimami tui ka me liutaki keimami.’

¹³ “Raica, sa tu oqo na tui o ni a digitaka; o ni a kerea, ka sa solia vei kemuni o Jiova e dua na tui.

¹⁴ Ia ena basika na vinaka kevaka o ni na rerevaki Jiova ka qaravi koya, ka vakarorogo ki na nona vosa, ka sega ni talaidredre ki na nona i vakaro, oi kemuni kei koya talega na tui sa lewai kemuni.

¹⁵ Ia kevaka o ni na sega ni vakarorogo ki na vosa i Jiova, ka talaidredre ki na nona i vakaro, ena qai saqati kemuni kei ira na nomuni tui na liga i Jiova.

¹⁶ Ia oqo, mo ni tu mada ka raica na ka levu ena cakava e matamuni o Jiova.

¹⁷ Sa sega li ni vula i mamaca ni tamusuki witi oqo? Ia, ka'u na masuti Jiova me solia mai na kurukuru kei na uca. Ni sa yaco vakakina, o ni na qai raica ka kila kina na levu ni nomuni valavala ca o ni a cakava ena mata i Jiova ena vuku ni nomuni kerea me dua na nomuni tui.”

¹⁸ A qai masu vei Jiova o Samuela; a sa solia mai o Jiova na kurukuru kei na uca ena siga o ya. Era sa qai rerevaki Jiova vata kei Samuela o ira kecega na tamata.

¹⁹ Era a kaya vei Samuela o ira kecega na tamata, “Mo masulaki keimami mada vei Jiova na nomuni Kalou, me keimami kakua ni mate; keimami sa kuria na neimami i valavala ca ena neimami kerea me dua na neimami tui.”

²⁰ A qai vosa o Samuela vei ira na tamata, ka kaya, “Ni kakua ni rere, ni o ni sa cakava oti na ka oqo; ia ni kakua ga ni gole tani mai vei Jiova;

²¹ Mo ni kakua ni goleva na veikalou buli ena liga; era na sega ni vukei kemuni se vakabulai kemuni, baleta ni ra sega ni ka dina.

²² Ni sa cakava o Jiova na nona yalayala, io ena sega ni laivi kemuni ka ni sa marautaka na nona vakayacori kemuni me nona tamata digitaki.

²³ Ia vei au, me'u kakua sara ni caka cala vei Jiova mai na noqu tarova na noqu dau masulaki kemuni. Ia, au na vakavulici kemuni ena i valavala vinaka ka dodonu.

²⁴ Mo ni rerevaki Jiova ga, ka qaravi koya vakaidina ena yalomuni taucoko. Ia mo ni nanuma na veika lelevu sa cakava vei kemuni o koya.

²⁵ Ia kevaka o ni vakayacora tikoga na i valavala ca, o ni na vakarusai vata kei na nomuni tui.