1 Samuela 11 - Vakavakadewa Vou kei na iVola tale eso

Vakabula o Saula na Koro Levu o Jepesi

¹ Ni oti e rauta ni dua na vula, a sa liutaka yani na nona mataivalu o tui Neasi na Amonaiti me la'ki valuta na koro o Jepesi ena vanua o Kiliati. Era a qai kaya na kai Jepesi vei Neasi, “Mo cakava mada e dua na noda veiyalayalati, ka keimami na vakaio ki na nomu veiliutaki.”

² A sa kaya vei ira o Neasi na luve i Amoni, “Au na veiyalayalati kei kemuni, ia ena vakatautaki oqo ki na duabulu na ka: o ya me'u leuta tani kece sara na matamuni i matau me kauta mai na madua vei ira kecega na Isireli.”

³ Era sa kaya vua o ira na dauniveiliutaki e Jepesi, “Mo solia mada vei keimami e vitu na siga me keimami tala eso me ra vakau i tukutuku ki na vanua o Isireli. Ia kevaka sa sega ni dua me mai vakabulai keimami, keimami na qai soli keimami yani vei iko.”

⁴ Era sa yaco yani na talai ki na i tikotiko i Saula mai Qibea, ka ra vakadewataka na i tukutuku, ka ra a tabalaka cake na domodra ena tagi na tamata kecega.

⁵ A lesu tiko mai o Saula mai na i teitei kei na nona bulumakau, ka taroga sara, “A cava e manati ira na tamata ka ra tagi tiko kina?” Era a qai tukuna vua na i tukutuku mai vei ira na kai Jepesi.

⁶ Ni sa rogoca oqo o Saula, a sa curumi koya na Yalo ni Kalou, ka sa waqa vakalevu na nona cudru.

⁷ A qai taura e rua na bulumakau ka musumusuka vakalailai, ka solia ena ligadra na tamata talai eso me ra vakauta ki na veiyasana kecega e Isireli, ka kaya, “O ira yadua sa sega ni lako mai me muri Saula kei Samuela ena vakayacori vakakina na ka oqo ki na nodra bulumakau!” A sa bikai ira na tamata na rere ena vuku ni ka ena cakava o Jiova, ka ra sa duavata kece ni ra sa lako kece mai.

⁸ A vakasoqoni ira vata o Saula mai Peseki: era a lewe 300,000 na Isireli, ka ra lewe 30,000 na Juta.

⁹ Era a qai kaya vei ira na tamata era a talai mai Jepesi, “Ni la'ki tukuna vakaoqo vei ira na nomuni tamata ni ra na vakabulai ni bera na sigalevu ni mataka.” Ena gauna era rogoca kina na i tukutuku oqo na kai Jepesi, sa tuburi ira na marau levu

¹⁰ ka ra kaya vei Neasi, “Keimami sa na soli keimami yani vei iko ni mataka, ka mo qai lewa ga na ka o via cakava vei keimami.”

¹¹ Ena bogi o ya, a wasei ira na nona tamata o Saula me tolu na i wasewase vakaivalu, ka ra lako vakamataka lailai sara ki na nodra keba na meca ka valuti ira na Amonaiti. Era a vakadrukai na meca ena sigalevu tutu, ka ra sa dro ena vaqaqara bula o ira na vo-ni-bula.

¹² Era sa qai kaya vei Samuela na Isireli, “Evei sara mada o ira na tamata era tukuna voli me kakua ni noda tui o Saula? Mo soli ira mai na tamata oqori me keimami vakamatei ira!”

¹³ Ia a sa kaya o Saula, “Ena sega ni dua ena vakamatei ena siga oqo, ka ni oqo na siga sa vakabulai Isireli kina o Jiova.”

¹⁴ A sa kaya vei ira na tamata o Samuela, “Me da mai lako kece ki Kilikali ka la'ki vakataudeitaka tale ni o Saula sa noda tui.”

¹⁵ Era a lako na tamata kecekece ki Kilikali, ka ra vakataudeitaka ena tikina tabu mai kea ni sa nodra tui o Saula. Era sa vakacabora na nodra i madrali ni veivinakati, ka solevutaka o Saula kei ira kecega na Isireli na veika sa yaco oqo.