1 Samuela 10 - Vakavakadewa Vou kei na iVola tale eso

¹ A sa taura o Samuela na tavaya waiwai, ka livia e ulu i Saula, ka reguci koya, ka kaya vua, “Sa lumuti iko o Jiova mo nodra tui na nona tamata na Isireli. O sa na lewai ira na tamata i Jiova, ka vakabulai ira mai na kedra meca ka ra tu voliti ira. Oqo na i vakatakilakila ni sa lumuti iko o Jiova mo lewai ira na nona tamata.

² Ni kemuni sa na biuti au edaidai, o ni na sota kaya e lewe rua na tamata ni voleka yani ki na i bulubulu i Rejieli e Selisa, o ya ena loma ni nodra i yalayala na Penijamini. E rau na kaya vei kemuni ni sa kune tale na asa o ni a la'ki vakasaqara, ka sa sega tale kina ni na lomaleqataka na tamamuni; ia sa lomaleqataki kemuni ga o koya, ka vakatataro voli ga, ‘A cava me'u cakava me baleta na luvequ?’

³ Ia ni kemuni sa biuta na vanua o ya, o ni na yacova yani na vunioki mai Tepori ka sotava e kea e tolu na tamata eratou la'ki vakacaboisoro tiko vua na Kalou e Peceli. E dua vei ratou ena kauta tiko e tolu na luve ni me, e dua tale ena kauta voli e tolu na i buli madrai, ka dua e colata tiko e dua na bola kuli-ni-manumanu sa sinai ena waini.

⁴ E ratou na kidavaki kemuni, ka ratou na solia vei kemuni e rua na i buli madrai; ia mo ni taura oqo.

⁵ Ia mo ni qai lako ki na Delana ni Kalou mai Qibea ena vanua e tiko kina e dua na nodra keba na kai Filisitia. O ni na sotava ena matamata ni koro na matailawalawa parofita era lesu mai na delana ni vakacaboisoro, ka ra liutaki mai vei ira era vakatagitaka tiko na soliteri, kei na tibereli, kei na bitu ni vakatagi, kei na api. Era na mekemeke ka vosa ni parofisai ena domo levu.

⁶ Ena curumi kemuni na yalo i Jiova, ka o ni na meke ka vosa ni parofisai ena domo levu vata kei ira, ka na yaco na veisau ki na nomuni bula.

⁷ Ia ni sa yacovi kemuni na i vakatakilakila oqo, mo ni cakava ga na ka sa liutaki kemuni kina na Kalou mo ni kitaka.

⁸ O ni na liu sobu yani vei au ki Kilikali, ka'u na qai la'ki sotavi kemuni e kea ka vakacabora na i soro kama kei na i madrali ni veivinakati. Mo ni waraki au me vitu na siga me yacova ni'u sa yaco yani vei kemuni, me'u dusimaka kina na veika mo ni cakava.”

⁹ Ni sa vakanadaku o Saula me biuti Samuela, sa qai veisautaka na yalona o Jiova me vaka e dua na tamata buli vou. A yaco na veivakatakilakila kecega oqo ena siga o ya.

¹⁰ Ni rau yaco yani ki Qibea o Saula kei na nona tamata, e rau a sota sara kei ira na matailawalawa parofita, a sa curumi Saula na yalo ni Kalou, ka tomani ira na parofita ena mekemeke kei na vosa ni parofisai ena domo levu.

¹¹ Ia ni ra sa sotavi koya o ira era kilai koya e liu ni sa parofisai vata tiko kei ira na parofita, era sa veivosaki vakai ira ka kaya, “A cava e sa manati koya na luve i Kisi? E sa rairai yaco li me parofita o Saula?”

¹² A vosa mai e dua na tamata e kea, ka kaya, “E vakaevei o ira na i lawalawa parofita oqo - o cei beka na tamadra?” O koya oqo sa tekivutaki kina na i vosavosa o ya, “E sa tei yaco me parofita tale beka ga o Saula?”

¹³ Ia ni oti na mekemeke kei na parofisai ena domo levu, a sa lako tale o Saula ki na vanua ni vakacaboisoro ena delana.

¹⁴ E a raici Saula kei koya na nona tamata o tamana lailai, ka tarogi rau, “O drau a tu mai vei?” E a sauma o Saula, ka kaya, “Keirau a la'ki vakasaqarai ira na asa; ia ni keirau a sega ni kunei ira, keirau a mani lako vei Samuela.”

¹⁵ E a taroga lesu o tamana lailai, “Mo tukuna mada vei au, se cava sara mada sa kaya vei kemudrau o Samuela?”

¹⁶ A sauma lesu o Saula vua, “Sa tukuna vakamacala vei keirau ni ra sa kune na asa.” Ia, sa sega ga ni tukuna vei tamana lailai na vosa i Samuela me baleta na kena vakarau soli vua na i tutu vakatui.

Kacivaki ni sa Tui o Saula

¹⁷ A vakasoqoni ira vata mai na tamata vei Jiova o Samuela e Misipa;

¹⁸ ka sa kaya vei ira na Isireli, “Sa vosa vakaoqo o Jiova na Kalou ni Isireli, ‘Au a kauti kemuni cake mai Ijipita na Isireli ka vakabulai kemuni mai na ligadra na kai Ijipita, kei na ligadra na veimatanitu kecega era a vakasaurarataki kemuni.

¹⁹ Ia edaidai o ni sa beca na nomuni Kalou, o koya ka a vakabulai kemuni mai na nomuni vakalolomataki kei na nomuni vakararawataki; ia o ni sa besetaki au ka kerea vei au me'u lesia ga vei kemuni e dua na tui. Sa vinaka, ia oqo, mo ni vakasoqoni kemuni vata sara vakamataqali kei na veiwasewase ka duri ena mata i Jiova.’ ”

²⁰ Sa qai vakasoqoni ira vata mai na veimataqali kece e Isireli o Samuela, ka sa digitaka na mataqali i Penijamini o Jiova, mai na vakawiri madigi.

²¹ A sa soqoni ira vata mai ki liu na veimatavuvale ena mataqali i Penijamini o Samuela, ka sa digitaki na vuvale i Matiri. Era sa qai tucake mai na tagane yadua ni vuvale i Matiri, ka sa digitaki o Saula na luve i Kisi. Ia ni sa vakasaqarai, era sa sega ni kunei koya.

²² Era a mani tarogi Jiova tale ka kaya, “A sa lako beka li mai ki ke na tamata oqo?” A sauma vei ira o Jiova, “Io, e vuni tu oqori o koya ena i binibini i yaya.”

²³ Era a cici yani ka kauti koya mai kea, ka ra raica ni balavu duadua o koya ni mai tucake ena kedra maliwa na tamata.

²⁴ A qai vosa vei ira na tamata kecega o Samuela, ka kaya, “Mo ni raica mada na tamata ka sa digitaka o Jiova; ena sega tale ni dua me tautauvata kaya ena matanitu taucoko oqo.” Era qai kaila ni veitokoni vua o ira na tamata kecega, ka kaya, “Me bula balavu na tui!”

²⁵ A qai vakamacala vei ira o Samuela ena veika dodonu eso kei na i tavi ni i tutu vakatui ena matanitu; ka sa volai oqo ena dua na i vola, ka maroroya ena mata i Jiova. A qai vakasukai ira yani na tamata kecega ki na nodra veivale yadua.

²⁶ A lako talega o Saula ki na nona vale ki Qibea, ka ra lako vata kaya yani eso na tamata i valu sa vakauqeta na yalodra na Kalou.

²⁷ Ia, era a qai kaya vakaoqo eso na tamata ka sega na betedra, “E rawa vakacava vua na tamata oqo me vakabulai keda?” Era a beci koya ka sega ni kauta vua e dua na i loloma. Ia sa galu ga o Saula.