1 Pita 5 - Vakavakadewa Vou kei na iVola tale eso

Na Qele ni Sipi ni Kalou

¹ Au sa vakamamasu vakaoqo vei ira na qase ni lotu ena kemuni maliwa me vaka e dua sa qase ni lotu talega ka sa vakadinadinataka oti na sotavi ni veivakararawataki i Karisito, ka'u na vakaivotavota talega ena veika lagilagi sa vakarau vakatakilai:

² Mo ni vakania na qele ni sipi ni Kalou era sa tiko ena kemuni maliwa; me kakua ni ka ni veivakasaurarataki, ia me caka ga ena yalo makutu me vaka sa vinakata vei kemuni na Kalou; me kakua ni ka ni vaqaqara i sau ga, ia ena yalo ga e taleitaka me veiqaravi.

³ Ni kakua ni valavala vakaboso vei ira o ni sa qarava, ia mo ni dau i vakaraitaki vinaka ga vei ira na qele ni sipi.

⁴ Ia ni sa rairai mai o koya na i Vakatawa Liu, o ni na rawata kina na i sala lagilagi sa sega ni takali rawa na kena i serau.

⁵ Oi kemuni na i tabagone, mo ni vakamalumalumutaki kemuni vakakina vei ira era qase cake vei kemuni. Sa dodonu kina vei kemuni vakayadua mo ni vakaisulutaki ena yalomalumalumu ena vuku ni nomuni veiqaravi vakai kemuni, ni sa volai, “Sa vorati ira sa viavialevu na Kalou, Ia sa lomani ira ga sa yalomalumalumu.”

⁶ Ni vakayalomalumalumutaki kemuni kina ena ruku ni liga kaukauwa ni Kalou, ni na vakacerecerei kemuni o koya ena nona gauna taudonu.

⁷ Ni biuta vua na nomuni lomaocaoca kecega, ni sa daunanumi kemuni o koya.

⁸ Ni yalomatua, ni yadra tiko! Sa veilakoyaki voli na nomuni meca na tevoro, me vaka na laione sa tagi ni sa vakasaqara eso me tiloma.

⁹ Mo ni tudei sara ena nomuni vakabauta ka vorati koya, ni o ni sa kila ni sa yaco tale tikoga na veivakararawataki vakaoqo vei ira na wekamuni e vuravura taucoko.

¹⁰ Ia ni sa oti na nomuni vakararawataki, ena qai vakayacori kemuni mo ni vinaka sara ka vakataudeitaki kemuni ka vakaukauwataki kemuni na Kalou dauloloma, o koya sa kacivi kemuni mo ni vakaivotavota ena nona lagilagi tawamudu ena vuku i Karisito.

¹¹ Me nona na lewa ena gauna kecega ka tawamudu! Emeni.

A Kena i Tinitini kei na Loloma

¹² Au sa vola yani na i vola lekaleka oqo ena veivuke i Silivenusi, o koya ka'u sa okata me noda i tokani Vakarisito sa yalodina. Au gadreva me'u vakayaloqaqataki kemuni ka'u sa vakadinadinataka ni sai koya oqo na loloma-savu dina ni Kalou. Ni tudei tikoga kina.

¹³ Era sa loloma yani vei kemuni na i soqosoqo lotu e Papiloni, o ira sa digitaki talega mai vua na Kalou me vakataki kemuni, ka vaka talega kina na luvequ o Marika.

¹⁴ Ni veikidavaki vakai kemuni ena i regu ni veilomani Vakarisito. Me qai tiko yadudua vei kemuni kece sara sa nei Karisito na vakacegu. Emeni.