1 Pita 4 - Vakavakadewa Vou kei na iVola tale eso

A i Vakaraitaki ni Bula sa Veisau

¹ Me vaka ni sa vakararawataki vakaoqo na Karisito ena yagona, mo ni vakaiyaragitaki kemuni talega vakakina ena nona i tovo ni rai, baleta ni o koya sa vakararawataki ena yago sa tarovi koya mai na i valavala ca.

² Ena vuku ni ka oqo, mo ni bulataka kina na bula sa liutaki mai vua na Kalou ena vo ni nomuni bula, ka me kua tale ni lewai kemuni na veigagadre vakayago.

³ A sa bau dua toka na gauna balavu na nomuni a bulataka voli mai na nodra i tovo ni bula na tawalotu. O ni a dau goleva kina na veika tawa kilikili, na garogaro ca, na mateni, na i tovo vakasisila ni yago, na i soqosoqo ni gunu eso, kei na i vakarau lialia ni qaravi kalou tani.

⁴ Era sa kurabui kina oqo na tawalotu ena vuku ni nomuni sa sega ni duavata kei ira ena vakayacori ni i tovo velavela vakaoqo, ka ra sa vosa vakacacataki kemuni kina.

⁵ Ia era na qai saumi taro ga vakai ira vua na Kalou, o koya sa tu vakarau me lewai ira na bula kei na mate.

⁶ Oqori na vuna sa vunautaki talega kina na i Tukutuku Vinaka vei ira na mate, o ira sa lewai oti ena vuku ni nodra bula vakayago me vaka ni sa ia na veilewai vei ira na tamata kecega; a sa vunautaki vei ira me rawa ni ra bula ga kina vua na Kalou ena yalodra.

Na Dauniyau Vinaka ni Solisoli ni Kalou

⁷ Sa voleka mai na i vakataotioti ni veika kecega. O koya oqo mo ni taura vakabibi sara kina na veika vakayalo kei na bulataki ni bula vakaivakarau, ena vuku ni kena yadravi na masumasu.

⁸ Sa ka bibi duadua mo ni veilomani dina sara vakai kemuni, ni sa ubia na i valavala ca e vuqa na loloma.

⁹ Ni dolava na nomuni vale vei ira na wekamuni ka kakua ni vosa kudrukudru kina.

¹⁰ Me vaka e dua na dauniyau vinaka ni solisoli ni Kalou, mo ni vakayagataka vinaka kina ena vukudra na tani na veisolisoli duidui eso sa solia vei kemuni na Kalou.

¹¹ Kevaka e dua sa dauvosa, me ia ga o koya na vunautaka na vosa ni Kalou; o koya sa dauveiqaravi me ia ga na veiqaravi ena kaukauwa sa solia vua na Kalou, me rawa kina ni vakalagilagi na Kalou ena veika kecega ena vuku i Jisu Karisito, o koya sa nona na lagilagi kei na kaukauwa ka tawamudu. Emeni.

Na Noda Vakararawataki ni Da sa Lotu Vakarisito

¹² Oi kemuni na wekaqu lomani, ni kakua ni kurabui ena vuku ni rarawa levu sa yaco tiko vei kemuni mo ni vakatovolei kina, me vaka beka ni sa yaco tiko vei kemuni e dua na ka vou.

¹³ Ia mo ni yalo vakacegu ka marau ga ena vuku ni nomuni sa vakaivotavota tiko ena veivakararawataki i Karisito, me rawa ni ka taucoko kina na nomuni reki ni sa vakatakilai na nona lagilagi.

¹⁴ Kevaka o ni sa vakacacani ena vuku ni yaca i Karisito, o ni sa kalougata sara kina. Sa dusia oqo ni sa mai tiko vei kemuni na Yalo sa lagilagi, na Yalo ni Kalou.

¹⁵ Kevaka e dua vei kemuni sa vakararawataki, ia me kakua ga ena vuku ni laba, se butako, se basulawa, se vakaucaca ena kemuni maliwa.

¹⁶ O koya oqo mo ni kakua kina ni maduataka na veivakararawataki sa yaco vei kemuni ena vuku ni vakabauta Vakarisito, ia mo ni vakavinavinaka ga vua na Kalou ni o ni sa tokara na yaca i Karisito.

¹⁷ Sa yaco mai na gauna me tekivutaki kina na veilewai, ka ra na lewai taumada eliu na tamata ni Kalou; ia kevaka sa tekivu vei keda, a cava ena qai kedra i tinitini o ira era sa sega ni vakabauta na nona i Tukutuku Vinaka na Kalou?

¹⁸ Me vaka sa kaya na i Vola Tabu, “Sa dredre sara vei ira na tamata vinaka Me ra vakabulai; A cava ena yacovi ira na tamata ca Era sa sega ni kila na Kalou?”

¹⁹ O koya oqo me ra qai soli ira taucoko kina vua na Dauveibuli o ira era sa vakararawataki me vaka na loma ni Kalou, ka me ra ia ga na caka dodonu.