1 Pita 3 - Vakavakadewa Vou kei na iVola tale eso

O Ira na Yalewa kei na Tagane Vakawati

¹ Oi kemuni na yalewa vakawati, ni vakamalumalumutaki kemuni taumada vei ira na watimuni. Kevaka eso vei ira era sega ni vakabauta na vosa ni Kalou, ena rawa ni yaco me ra vakabauta ena vuku ni nomuni i vakarau, ka na sega ni yaga mo ni tauca e dua na vosa

² ni ra sa na raica tikoga na nomuni i vakarau vakarokoroko ka savasava.

³ Ni kakua ni vakayagataka na i yaya ni sasauni me vakatakila na totoka ni kemuni i rairai e taudaku, me vaka na tali drauniulu, se na vakaiukuuku koula, se na tokari i sulu vinaka.

⁴ Ia me sauni ga na yalo sa tabogo ena i ukuuku talei sa sega ni vuca rawa, o ya na yalomalumalumu kei na yalomalua, ni sa ka talei sara oqo ena mata ni Kalou.

⁵ Ni ra a dau sauni ira talega vakakina e liu na yalewa lotu dina, o ira era a dau vakanuinui vua na Kalou, ka ra dau yalomalumalumu vei ira na watidra.

⁶ E a vaka o ya o Sera, ni a dau talairawarawa vei Epara-ama ka vakatokai koya me nona turaga. Ia oqo o ni sa luvena oi kemuni, kevaka o ni sa caka dodonu ka sega ni rerevaka e dua na ka.

⁷ Sa vaka talega kina vei kemuni na tagane, mo ni dau nanumi ira na watimuni ni ra sa nomuni i tokani malumalumu. Mo ni dau dokai ira me vaka o ni na taukena vata na bula soli wale sa mai vua na Kalou. Ni vakayacora oqo me kakua kina ni dua na ka me vakalatilati ki na nomuni masu.

Vakararawataki ena Vuku ni Caka Dodonu

⁸ Me'u tinia: e dodonu mo ni yalo vata tiko ka wasea vata e dua ga na i tovo ni rai: ni veilomani me vaka na veitacini, ka matanataka ena kemuni maliwa na yalovinaka kei na yalomalua.

⁹ Ni kakua ni sauma na ca ena ca, se na veivakasewasewani ena veivakasewasewani; ia mo ni sauma ga ena veivakalougatataki, baleta ni sa yalataka ga na Kalou na nona veivakalougatataki ni sa kacivi kemuni.

¹⁰ Ni sa kaya na i Vola Tabu, “O koya vakayadua sa via marautaka na bula Ka via raica na gauna vinaka, Me tarova na yamena mai na vosa vere, Ka muduka na vosa lasu.

¹¹ Me ra gole tani sara mai na ca ka kitaka na ka vinaka; Me ra vakasaqara na vakacegu ena yalodra taucoko.

¹² Ni sa dau wanonovi ira na tamata yalododonu na Turaga, Ka rogoca na nodra masu; Ia sa saqati ira ga sa dau kitaka na i valavala ca.”

¹³ O cei me na qai vakacacani kemuni kevaka o ni sa gumatua tiko ena caka dodonu?

¹⁴ Ia kevaka mada ga o ni mani vakararawataki ena vuku ni valavala dodonu, o ni sa kalougata ga kina. Ni kakua ni rerevaka e dua, ka kakua talega ni lomaleqa.

¹⁵ Ia ni vakarokorokotaki Karisito ga ena yalomuni, ka dokai koya ni sa nomuni Turaga. Ni dau vakarau tu ena veigauna kecega mo ni vakamacalataka vua na tamata yadua e via kila na i nuinui sa tu vei kemuni,

¹⁶ ia mo ni kitaka oqo ena yalomalumalumu kei na vakarokoroko. Ni qarauna me savasava tiko na nomuni lewa-e-loma, me yaco kina, ni o ni sa vakasewasewani, me ra madua o ira sa vosavakacacataka na nomuni i vakarau vinaka ena nomuni sa tu vata kei Karisito.

¹⁷ Ni sa vinaka cake mo ni vakararawataki ena vuku ni caka dodonu, kevaka sa loma ni Kalou oqo, ka ca ga na caka cala.

¹⁸ Ni sa mate oti vakadua ga me baleta na i valavala ca na Karisito, o koya na yalododonu ena vukudra na dau caka cala, me kauti keda rawa kina vua na Kalou. A sa yaco o koya me mate ena yago, ia sa qai yaco me bula vakayalo,

¹⁹ ka sa la'ki vunau kivei ira na yalo era sa tiko ena valeniveivesu.

²⁰ Oqo na yalodra o ira era a talaidredre vua na Kalou ena nona a vosoti ira tu vakadede ena gauna sa taya tiko kina o Noa na nona waqa. O iratou na lewe vica ga ka tiko ena loma ni waqa, eratou lewe walu taucoko, sa vakabulai ga ena wai.

²¹ Na wai oqo sai dusidusi ni papitaiso, ka sa ia na veivakabulai edaidai. Oqo e sega ni kena vakasavasavataki na duka mai na yago, ia sa dusia ga na vosa ni yalayala sa vakayacori vua na Kalou mai na lewa-e-loma savasava. Sa vakabulai kemuni ena vuku ni tu cake tale mai na mate i Jisu Karisito,

²² o koya sa lako cake ki lomalagi ka sa tiko ena liga i matau ni Kalou. A sa lewai ira kece sara na agilosi o koya, ka vakakina o ira sa kaukauwa ka daulewa mai lomalagi.