1 Pita 2 - Vakavakadewa Vou kei na iVola tale eso

Na Vatu Bula kei Ira na Nona Tamata Digitaki

¹ O koya oqo mo ni qai biuta tani kece kina na veika ca; me sa kua na lasulasu se na veivakaisini, se na veivuvutaki, se na vosa ni veivakacacani.

² Mo ni vakataki ira na gone era se qai sucu, ni ra sa dau karamacataka wasoma na wai ni sucu vakayalo ka savasava, mo ni tubu cake kina ka vakabulai ni sa gunuvi.

³ Me vaka sa kaya na i Vola Tabu, “O ni sa tovolea oti na yalovinaka ni Turaga.”

⁴ Ni lako mai vua na Turaga, o koya na vatu bula era a cata na tamata, ia sa digitaki koya ga na Kalou ka dokai koya vakalevu.

⁵ Ni lako mai me vaka o ni sa vatu bula sa vakayagataki ena kena tara na valenisoro vakayalo, ka qarava kina na vakacaboisoro vakayalo sa vinaka vua na Kalou ena vuku i Jisu Karisito, me vaka o ni sa kena matabete yalosavasava.

⁶ Ni sa kaya na i Vola Tabu, “Raica, au sa digitaka e dua na vatu talei, Ka'u sa vakaduria me i vakadei ena tutu ni vale mai Saioni; Ia o koya sa vakabauti koya ena sega sara ni vakamaduataki.”

⁷ Sa talei sara na vatu oqo vei kemuni sa vakabauta, ia vei ira era sega ni vakabauta: “Na vatu era a cata na dautaravale, Sa yaco me i vakadei ni tutu ni vale.”

⁸ Ni sa kaya talega na i Vola Tabu, “Sa i koya oqo na vatu era na vakatarabetaki kina na tamata; Na vatu ena vakavuna me ra bale.” Era sa tarabe ga ena vuku ni nodra bese ni vakabauta na vosa; ia oqo sai naki ga ni Kalou me baleti ira.

Na Nona Matatamata Digitaki

⁹ Ia sai kemuni na kawatamata digitaki, na matabete vakatui, na matanitu yalosavasava, na matatamata sa taukena na Kalou, mo ni vakaraitaka kina na veika cecere sa vakayacora o koya sa kacivi kemuni mai na butobuto ki na nona rarama veivakurabuitaki.

¹⁰ E na dua na gauna, o ni a sega tu kina ni nona tamata na Kalou, ia o ni sa qai nona tamata oqo; ena dua na gauna, o ni a sega tu kina ni kila na yaloveivosoti ni Kalou, ia o ni sa qai ciqoma oqo na nona yaloveivosoti.

Na Bobula ni Kalou

¹¹ Kemuni na wekaqu lomani, au sa vakamasuti kemuni, me vaka ni da sa kai tani ka vulagi ena vuravura oqo! Ni kakua ni vakamalumalumu ki na veigagadre ca ni yagomuni, ni sa dau veivala tikoga kei na yalo na veika oqo.

¹² Me vinaka tikoga na nomuni i tovo ena kedra maliwa na tawa lotu, ka veitalia ga kevaka era se beitaki kemuni tikoga ena caka cala. Era na qai vakarokorokotaka ga na Kalou ena Siga ni veilewai ni ra sa sarava na nomuni cakacaka vinaka.

¹³ Ni vakarorogo ki na veiliutaki vakatamata kecega ena vuku ni Turaga: ki vua na tui, o koya na ulu ni veiliutaki,

¹⁴ se kivei ira na kovana, o ira sa talai mai vua na tui me ra totogitaki ira era caka cala ka vakacaucautaki ira era caka dodonu.

¹⁵ Ni sa vinakata na Kalou mo ni vagalui ira na tamata yalowai mai na nodra veitalanoa lialia ena veika vinaka o ni vakayacora.

¹⁶ Ni bula tiko me vaka na tamata sa sereki, ia me kakua ga ni vakayagataki na nomuni galala me i ubi ni nomuni caka ca; ia mo ni bula tikoga me vaka na tamata bobula ni Kalou.

¹⁷ Doka na tamata kecega. Lomani ira era sa nei Karisito. Rerevaka na Kalou. Vakarokorokotaka na tui.

Ai Vakaraitaki ni Rarawa ka sa Colata na Karisito

¹⁸ Oi kemuni na dauveiqaravi, e dodonu mo ni dau vakarorogo vei ira na nomuni turaga ena yalo e veidokai; me kua walega ni vakayacori vei ira sa yalovinaka ka yalomalua, ia vei ira talega sai tovo kaukauwa.

¹⁹ Ena vakalougatataki kemuni na Kalou ena vuku ni ka oqo kevaka o ni sa vosota rawa na veika rarawa sa caka vakatawadodonu vei kemuni, baleta ni o ni sa yalodina tiko ki na loma ni Kalou.

²⁰ Se o ni na vakavinavinakataki li vakaevei kevaka o ni sa vosota na nomuni mokulaki ena vuku ni nomuni cala? Ia kevaka o ni sa vosota na vakararawataki ni o ni sa caka dodonu, ena vakalougatataki kemuni kina na Kalou.

²¹ Ni sai koya na ka oqo sa kacivi kemuni kina na Kalou, baleta ni sa vakararawataki na Karisito ena vukumuni, ka sa biuta tu vei kemuni na kena i dusidusi, mo ni muria na we ni yavana.

²² A sa sega ga ni cakava e dua na i valavala ca o koya, ka sa sega talega ni kune e gusuna na veivakaisini.

²³ Ni sa vakasewasewani, a sa sega tale ni veivakasewasewani lesu; ni sa vakararawataki, sa sega ni yalataka me na sauma lesu; ia sa nuitaka ga na Kalou, o koya na Daunilewa yalosavasava.

²⁴ A sa colata vakai koya o Karisito na noda i valavala ca ki na kauveilatai ena yagona, me rawa kina me da mate ki na i valavala ca ka bula ki na i valavala dodonu. Ia na we ni kena kuita o ni sa vakabulai kina.

²⁵ O ni a vakataki ira tu na sipi sa lako sese, ia oqo o ni sa qai saumaki tale mai ka muri koya na i Vakatawa ka Dauveimaroroi ni yalomuni.