1 Pita 1 - Vakavakadewa Vou kei na iVola tale eso

¹ Mai vei Pita, e dua na i apositolo i Jisu Karisito. Kivei ira na tamata digitaki ni Kalou era sa tiko vakavulagi ka duiveiseyaki tu mai Ponito, kei Kalatia, kei Kapatosia, kei Esia, kei Picinia.

² O ni sa digitaki ka lesi oti tu mai vua na Kalou na Tamada, ena veivakatabui ni Yalo Tabu, mo ni talairawarawa vei Jisu Karisito ka vakasavasavataki ena nona dra. Me qai nomuni na loloma-savu kei na vakacegu sa vuabale.

Na i Nuinui Dei ka Bula

³ Me da ia na vakavinavinaka vua na Kalou na Tama ni noda Turaga o Jisu Karisito! Ena vuku ni cecere ni nona yalololoma, sa solia kina vei keda e dua na bula vou ena nona vakaturi Jisu Karisito cake tale mai na mate. Eda sa vakasinaiti kina ena i nuinui dei ka bula,

⁴ ka da namaka me da taukena na noda i votavota sa maroroya na Kalou mai lomalagi ka sa sega ni rusa rawa, se tauvi duka, se malai rawa, se seavu yani.

⁵ A veika oqo era sa nomuni, oi kemuni ka sa taqomaki tiko ena kaukauwa ni Kalou ena vuku ni vakabauta, me na nomuni kina na veivakabulai sa vakarau me vakatakilai ena i otioti ni gauna.

⁶ Mo ni reki tikoga ena ka oqo, ka dina ga ni sa kilikili kei kemuni mo ni kune rarawa vakalailai ena vuku ni veimataqali veivakararawataki e vuqa sa yaco tiko vei kemuni.

⁷ Sa kedra i naki ga me vakadinati kina na dina ni nomuni vakabauta ni sa vakatovolei. Ni sa talei vakalevu cake na nomuni vakabauta mai na koula sa caca rawarawa, e dina ga ni dau vakatovolei ena bukawaqa. O ni na qai vakaivotavota emuri ena lagilagi kei na dokai ena Siga sa vakatakilai kina o Jisu Karisito.

⁸ E dina ga ni o ni se bera ni raici koya, ia o ni sa lomani koya. E dina ga ni sa sega ni rawa mo ni raici koya edaidai, ia o ni sa vakabauti koya ga, ka reki tiko ena reki sa lagilagi ka tawa vakamacalataki rawa,

⁹ baleta ni o ni sa ciqoma tiko na nomuni vakabulai, ka sai koya ga oqo na i naki ni nomuni vakabauti koya.

¹⁰ Era a vakasaqara ka vakataroga matua na veivakabulai oqo o ira na parofita, ka ra parofisaitaka kina ni na solia na Kalou na i solisoli oqo vei kemuni.

¹¹ Era a vakataroga tiko se na yaco ena gauna cava ka yaco vakaevei me vaka sa dusia tiko na Yalo i Karisito sa tiko e lomadra, ni na sota kaya mada eliu na veika rarawa na Karisito ka qai muria mai na veika lagilagi ka dokai.

¹² A sa vakatakila na Kalou vei ira na parofita oqo ni ra sa sega ni cakacaka tiko ena vukudra ga, ia ena vukumuni, ena nodra sa tukuna na veitukutuku eso o ni sa qai rogoca oqo mai vei ira sa vunautaka na i Tukutuku Vinaka ena kaukauwa ni Yalo Tabu sa talai mai lomalagi. A veika oqo era sa bau gadreva tale tu ga na agilosi me ra kila.

Na Kaci ki na Bula Savasava

¹³ O koya oqo, me yadra tiko kina na nomuni vakasama ena vuku ni cakacaka mo ni kitaka. Ni yalomatua ka nuitaka ga na loloma-savu ena soli vei kemuni ena gauna sa rairai mai kina o Jisu Karisito.

¹⁴ Ni talairawarawa vua na Kalou, ni kakua ni muria tale na nomuni veigagadre ca eliu ena gauna o ni se lecaika tu kina.

¹⁵ Ia me vaka sa yalosavasava o koya sa kacivi kemuni, mo ni yalosavasava talega vakakina ena nomuni i valavala kecega;

¹⁶ ni sa kaya na i Vola Tabu, “Mo ni yalosavasava, ni'u sa yalosavasava oi au.”

¹⁷ Me vaka ni o ni sa masuta e dua na Tama sa dau lewa vakadodonu na cakacaka ni tamata yadua ka sega ni dau veitotaki, mo ni qai vakaitovotaki kemuni kina ena vakarokoroko vua na Kalou ena gauna taucoko ni nomuni bula e vuravura.

¹⁸ O ni sa kila na ka o ni sa voli kina mai na i vakarau ni bula tawayaga ka a dewa sobu mai vei ira na nomuni qase. Ni o ni a sega ni voli ena veika caca wale me vaka na siliva se koula,

¹⁹ ia ena dra talei ga i Karisito, me vaka na dra ni lami sa sega ni ca se duka e dua na tikina.

²⁰ A sa digitaki koya oti tu na Kalou ni bera ni tauyavutaki o vuravura, ia sa qai vakatakilai ga mai ena i otioti ni gauna oqo ena vukumuni.

²¹ Ena vuku i Karisito duadua ga o ni sa vakabauta kina na Kalou, o koya sa vakaturi koya cake tale mai na mate ka solia vua na lagilagi; ni sai koya ga na Kalou ka sa vakataudeitaka na nomuni i nuinui kei na vakabauta.

²² Ia oqo, ena vuku ni kena sa vakasavasavataki na yalomuni mai na nomuni talairawarawa ki na ka dina ena kaukauwa ni Yalo Tabu, kei na nomuni sa lomani ira na wekamuni vakayalo, mo ni qai veilomani dina sara kina ena vu ni yalomuni taucoko.

²³ Ni sa yaco mo ni sucu vou tale, ka segai ena i tei sa vakaiyalayala ga na nona bula, ia sa tawa vakaiyalayala ga, ena vosa ga ni Kalou sa bula ka tudei.

²⁴ Me vaka sa kaya na i Vola Tabu, “Sa vaka na co na tamata kecega, Kei na nodra lagilagi sa vaka na se ni co. Sa dau malai na co, Ka sa mira na sena,

²⁵ Ia na vosa ni Turaga sa tudei ga ka tawamudu.” Sa i koya ga oqo na i Tukutuku Vinaka sa vunautaki vei kemuni.